« Te mana o te Atua ’ei ō ! » Hoa, Tetepa 2025, 20–21.

Te mana o te Atua ’ei ō !

Nā te Peresideni Emily Belle Freeman

Peresideni rahi nō te Feiā ’Āpī Tamāhine

Fa’atanohia nō roto mai i te « ’A ora mai te au i tō ’outou mau ha’amaita’ira’a », Liahona, Novema 2024, 7–10.

Tē pārahi ra ’o Emma Smith i roto i te tahi fare rā’au e te tāpe’a ra i te hō’ē ’āu’a ’āuri

’Aita i maoro a’enei, ’ua tere au i Harmony, Pennsylvania, i te Fenua Marite. I reira, i raro a’e i te mau tumu rā’au ’ērapa, i fa’aho’i-fa’ahou-hia mai ai te autahu’ara’a ia Iosepha Smith ’e ia Oliver Cowdery. ’Ua haere ato’a vau i te fare i reira ’o Iosepha ’e ’o Emma Smith i te orara’a. I roto, ’ua ti’a vau i te ha’amāramarama ’e ’ua uiui au, e aha ra tā Emma i feruri ’a hi’o noa ai ’oia i rāpae i te ha’amāramarama.

’Ua hōro’a te Fatu ia Emma i te hō’ē poro’i faufa’a rahi nā roto i tāna peropheta, ’o Iosepha. E nehenehe tātou e tai’o i teie parau poro’i i roto i Te Ha’api’ira’a Tumu ’e te mau Fafaura’a 25.

’A tahi, ’ua ha’api’i te Fatu ia Emma ē, e vāhi tōna i roto i Tāna fa’anahora’a. ’Ua fa’aha’amana’o ’oia iāna ē, e tamāhine ’oia i roto i Tōna bāsileia.

’A piti, ’ua hōro’a te Fatu iāna i te tahi fā. E ’ohipa faufa’a rahi roa tā Emma i rave i roto i te Fa’aho’i-fa’ahou-ra’a-hia mai. ’Ua anihia ’iāna ’ia ha’api’i i te mau pāpa’ira’a mo’a ’e ’ia hāmani i te buka hīmene mātāmua !

’E te hope’a, ’ua ha’api’i te Fatu ia Emma i ni’a i tāna mau fafaura’a. Nā te ha’apa’ora’a i tāna mau fafaura’a e tauturu iāna ’ia nīoa parau i te Vārua, ia riro ’ei mea maita’i roa a’e, ’e te fa’ari’i i te arata’ira’a nō tōna orara’a.

Te tamaroa ’e te tamāhine e pārahi ra i ni’a i te pārahira’a fare pure ma te rave i te pāne nō te ’ōro’a

Tē ti’aturi nei au ē, e ha’api’i ’outou e nāhea te mau ’ōro’a o te autahu’ara’a ’e te mau parau fafau nō te fafaura’a e fa’ati’a i te mana o te Atua i roto i tō ’outou orara’a. E roa’a ia tātou pā’āto’a i te hōro’a o te mana o te Atua. I te mau taime ato’a ’a rave ai tātou i te ’ōro’a mo’a. I te mau taime ato’a e tomo ai tātou i roto i te hiero.

Te ha’uti tāora e te pehe

’Ua anihia ia Emma Smith ’ia hāmani i te buka hīmene mātāmua. Tē hīmene noa nei ā tātou i tāua mau hīmene ra i teie mahana ! Hō’ē i muri i te tahi ’a tāora i tā ’outou tiri ’e ’aore rā i te hō’ē tao’a ha’uti i ni’a i te tāpura. ’Ia topa ana’e te reira i ni’a i te hō’ē hōho’a, ’a feruri i te hō’ē hīmene i ni’a i taua tumu parau ra. I muri iho ’a hīmene ’āmui i te reira !