« E paraparaura’a ’e ’o Gabby nō ni’a i te tāvinira’a i te fare purera’a », Hoa, Tetepa 2025, 40–41.
Hō’ē paraparaura’a ’e ’o Gabby nō ni’a i te tāvinira’a i te fare purera’a
E tamāhine ’o Gabby e 11 matahiti nō Harare, Timipāpue. ’Ua ui mātou iāna i te tahi mau uira’a nō ni’a i te arata’ira’a i te pehe i te fare purera’a.
’A fa’a’ite mai na ia mātou nō ni’a ia ’oe.
E mea au roa nā’u ’ia tunu i te mā’a monamona ’e te mea ’ava’ava ’e e ha’uti i te tā’iritete ’āfirīta. Tē hīmene nei au ’e te ’ori, ’e tē ha’api’i nei au i te ha’uti i te mapu, te tā’iritete ’e te piāna.
’A fa’ati’a mai na ia mātou nō ni’a i tā ’oe ’ohipa ’āpī.
’Ua ani mai te ’episekōpo iā’u ’ia tauturu i te arata’ira’a i te pehe i roto i te purera’a ’ōro’a. ’Aita vau i tīa’i i te reira ’e ’ua mana’o vau e mā’iti rātou i te hō’ē ta’ata pa’ari a’e. ’Ua ’ite ato’a rā vau i te here ’e te ’oa’oa nō te mea e mea au nā’u te hīmene.
I te tahi taime e mata’u noa ā vau ē, e hīmene au i te hō’ē mea hape ’e e fa’aro’o te ta’ata i te reira. Terā rā e tauturu te Vārua Maita’i iā’u ’ia vai maita’i i mua i te mau ta’ata ato’a. I teienei tē fa’a’ohipa nei au i te reira, e mea ’ārearea roa !
E aha te huru ’ia arata’i i te pehe nō te fa’anahora’a a te mau tamari’i i te purera’a ’ōro’a ?
I te ha’amatara’a e mea fifi roa. ’A ha’api’ipi’i noa ai mātou, i te tahi taime e mo’ehia iā’u te tahi mau ta’o. Nō reira ’ua ha’api’ipi’i au i te hīmene ’e tō’u māmā i te fare, ’e ’ua tauturu rahi te reira. ’Ia ha’api’ipi’i ana’e mātou i roto i te Paraimere, e hīmene pūai a’e au nō te tauturu i te feiā e’ita e nehenehe e tai’o ’aore rā ’aita i ’ite i te mau parau.
’Ua ’oa’oa roa vau i te taera’a mai te mahana o te fa’a’ite’itera’a. ’Ua tere nehenehe te mau mea ato’a. ’Ua fa’ari’i au i te hau ’e te māniania ’ore, ’e ’ua tae mai te mau parau i roto iā’u.
E aha te ha’api’ira’a tā ’oe e nehenehe e ’apo mai i roto i teie ’itera’a ?
’Ua ha’api’i mai au ē i te tahi taime e’ita te mau mea e tere maita’i roa, e mea maita’i rā ’e e nehenehe tā ’outou e ha’api’i mai nā roto mai i te reira. ’Ua fa’aineine ato’a te arata’ira’a i te pehe i roto i te Paraimere iā’u nō tā’u ’ohipa ’āpī !
E aha te a’o tā ’oe e hōro’a ia vetahi ’ē nō ni’a i te tāvinira’a i te fare purera’a ?
I te tahi taime e mea fifi ’ia tāvini i mua i te mau ta’ata e rave rahi, terā rā te mea nō ni’a ia tātou te mau tamari’i ’oia ho’i e nehenehe tātou e arata’i noa atu tō tātou matahiti ’aore rā tō tātou poto ’aore rā tō tātou rahi. E parau vau ia rātou ē noa atu i te tahi taime e nehenehe tō tātou mata’u e fa’atopa ia tātou, e nehenehe te Vārua Maita’i e tauturu ia tātou ’ia fa’ari’i i te hau. E tauturu ’oia ia tātou ’ia ti’a fa’ahou mai.