Tō Harvey ’ahu bāpetizora’a

’Ua piriha’o roa ’o Harvey i muri i te taxi i rōpū ia Ibu (Māmā) ’e Bapak (Pāpā). Tē tere ra rātou i te fare purera’a nō te bāpetizora’a ’o Harvey.

’Ua ani Harvey : « Bapak, e aha tō ’oe mana’o i tō ’oe bāpetizo-ra’a-hia ? » ’Ua bāpetizohia Bapak tau ’āva’e i ma’iri i teienei. I teienei e va’u tō Harvey matahiti, e bāpetizo-ato’a-hia ’oia !

’Ua feruri a’era Bapak hō’ē minuti. ’Ua parau ’oia ma te mata ’ata’ata : « E mea to’eto’e roa te pape ! » « ’Ua fa’ari’i ato’a rā vau i te here rahi. Noa atu e ’ere te rahira’a ’o tō mātou ’utuāfare i te melo nō tā tātou ’ēkālēsia, ’ua ’ite au i tō rātou here ’e te here ’o te Atua ».

I te taera’a rātou i te fare purera’a, ’ua tauturu te tahi atu mau ta’ata nō te ’Ēkālēsia ia rātou nō te fa’a’ī i te vāhi bāpetizora’a i te pape ’e nō te fa’aineine ia rātou.

« Harvey, ’ua tae i te taime nō te taui i tō ’oe ’ahu bāpetizora’a » i te parau a Ibu. ’Ua tu’i upo’o Harvey i tōna upo’o ’e ’ua rave mai i tōna pūtē ’ahu. Terā rā tōna noa piripou ’āvae roa ’uo’uo tō roto i te pūtē. ’Aita i ’itehia iāna tōna ’ahu tāne ’uo’uo ! ’Ua ’imi ’oia i roto i te tahi mau pūtē ē ’ati a’e te fare purera’a.

Parau atura Harvey : « Ibu, ’aita tō’u ’ahu ’ōmono i ’ōnei ».

’Ua fa’atu’atu’a ihora Ibu i tōna mata. ’Ua ’imi ato’a ’oia i roto i te tahi mau pūtē. « ’Ua mo’ehia ia tātou i roto i te taxi ».

Parau atura tuahine Putri : « Tē vai ra te tahi atu ā ’ahu bāpetizora’a i roto i te ’afata ahu ». « E haere au e ti’i i te reira ».

Terā noa rā, te ’ahu bāpetizora’a i roto i te ’āfata ’ahu e mea rahi roa ïa nō Harvey. E mata pe’ape’a tō Ibu. ’Ua fātata te bāpetizora’a i te ha’amata. E rave rahi ta’ata tei tae a’ena mai, ’e ’aita ā tō Harvey ’ahu i noa’a mai.

Parau mai nei Harvey : « E nehenehe paha tātou e pure ’ia fa’aho’i mai te ta’ata fa’ahoro taxi i te ’ahu ». « Mai te mea rā e’ita ’oia e hōpoi mai i te reira, e nehenehe ïa vau e ’ō’omo i te hō’ē ’ahu rahi roa. ’Aita vau e ha’afifi nō te mea tā’u e ’ō’omo. Tā’u noa hina’aro ’ia bāpetizohia vau ».

’Ua fa’ari’i Ibu ’e Bapak. Haere ’āmui āna’e atura rātou i te fare tūtu, i te hō’ē vāhi māniania ’ore. I reira, tūfene āna’e atura rātou i tō rātou rima ’e pi’o ihora i tō rātou upo’o.

Nā Harvey i pure. « E tō Metua here i te Ao ra, māuruuru nō te mea e bāpetizohia vau i teie mahana. E ti’a ānei ia ’oe ’ia tauturu i te fa’ahoro taxi ’ia fa’aho’i mai i tō’u ’ahu. Mai te mea ’aita, e’ita ato’a te reira i te fifi ».

I muri a’e i tā rātou pure, ’ua haere Harvey e ’ō’omo i te ’ahu rahi ra. ’Ua tae roa te reira i ni’a i tōna nā turi ’āvae.

’Ua tuō te tuahine Putri nā roto i te aroā : « Harvey ! » « Tei ’ōnei te ta’ata fa’ahoro taxi ».

’Ua ’ite ’o Harvey ’e ’o Ibu i te ta’ata fa’ahoro taxi nā te ’ōpani nō mua. Tei tāna rima te ’ahu ’o Harvey !

Nā ’ō mai nei : « ’Ua hi’o vau ’e ’ua ’ite au i te reira i ni’a i te pārahira’a i muri ». Nā ’ō atura Ibu : « ’Ua mana’o vau e’ita e ’ore nō ’oe te reira ».

« Māuruuru maita’i ».

Rave atura Harvey i te ’ahu i taua ta’ata ra. « Māuruuru ».

Ma te mata ’ata’ata nānā maira taua ta’ata ra.

’Aita i maoro roa, ’ua tae te taime e ha’amata te bāpetizora’a. ’Ua ’ō’omo Harvey i tōna ’ahu. ’Ua tano maita’i te reira ! ’E e mea teatea ’e te mā.

I tō Harvey tomora’a i te vāhi bāpetizora’a, e mea to’eto’e te pape ! ’Ua fa’aoti ’o Bapak i te pure ’e ’ua bāpetizo ia Harvey. I tōna haerera’a i rāpae i te pape, ’ua iho mai i roto iāna te mana’o ’āpī ’e te hau.

’Ua arata’i Bapak ia Harvey i te vāhi bāpetizora’a, ’e ’ua pū’ohu i te hō’ē tauera marū i ni’a i te tapono ’o Harvey. ’Ua mana’o Harvey i te mau ta’ata ato’a tei tauturu ’e tei pāturu iāna. Ibu, Bapak, te ta’ata fa’ahoro taxi ’e tōna ’utuāfare. E tō tātou Metua i te Ao ra ’e ’o Iesu Mesia ato’a.

’Ua tauahi Harvey ia Bapak. « Ua tano ’oe. E mea to’eto’e te pape ! » ’Ua ’ata rāua. I muri iho ’ua hi’o Harvey i roto i te mata ’o Bapak. « ’Ua tano ato’a rā ’oe nō te tahi atu mea. « Tē iho nei te here rahi i roto iā’u ».

Pia i te PDF

Fa’ahōho’ara’a nā Bethany Stancliffe