Hilom nga Pag-ampo ni Kimber

Gitudlo ni Kimber ang mga baso sa counter. Siya nag-undak-undak, nagbagulbol, ug mitudlo pag-usab.

Milingi si Mama. “Duna ka bay gikinahanglan?”

Mitudlo pag-usab si Kimber sa mga baso. Naghimo og kinumo nga migawas ang iyang kumingking, mihimo siya og pinakurbada nga linya pinaagi sa iyang ba-ba, ang sinyas alang sa juice sa American Sign Language.

“Aw. Ganahan ka og juice,” miingon si Mama.

Miyango si Kimber, naghulat samtang gisudlan ni Mama ang baso.

Ang pagkadili pa makasulti ni Kimber nakahimo niya nga maglisod og sulti og kusog. Dili siya ganahan sa iyang tingog kon makahimo siya og sayop. Makapasakit kini sa iyang dunggan! Kon korehian siya sa ubang tawo, masakitan siya. Mogamit siya og sign language ngadto ni Mama sa panimalay, apan mas lisod didto sa eskwelahan ug sa simbahan tungod kay ang kadaghanan sa mga tawo dili makamao og sign language.

Makigkita siya og speech therapist matag pila ka adlaw aron tabangan siya sa pagbansay sa pagsulti. Apan lisod gihapon. Gibati niya nga napakyas.

Unya pipila ka adlaw sa Primary, si Kimber naglingkod ug naminaw sa leksiyon. Nagkat-on sila mahitungod sa pag-ampo. “Makaistorya ka ngadto sa Langitnong Amahan mahitungod sa bisan unsa,” miingon si Sister Dees. Motubag Siya kanunay.”

Ganahan si Kimber nga maghunahuna nga ang Langitnong Amahan mitubag og mga pag-ampo. Apan unsaon man niya sa pagpakig-istorya Kaniya? Lisod ang paggamit nianang daghang pulong.

Atol sa oras sa pamilya sa pagbasa sa kasulatan nianang gabhiona, si Kimber ug ang iyang mga manghod nga igsoong lalaki naminaw samtang nagpuli-puli og basa si Mama ug Papa. Ganahan si Kimber nga maminaw sa bugnaw nga tingog si Papa samtang si Mama motudlo sa mga pulong diha sa pahina aron si Kimber makasunod.

“Pagtawag sa iyang balaan nga ngalan, nga siya maluoy kaninyo,” basa ni Papa. “Oo, pangamuyo kaniya alang sa kaluoy; kay siya gamhanan sa pagluwas.”

“Pangamuyo kaniya?” ang iyang igsoong lalaki nga si Hunter nangutana. “Unsay buot ipasabot niana?”

“Nagpasabot kana nga mag-ampo,” miingon si Papa. “Kon ikaw anaa sa kasamok, mangayo ka og panabang. Ang pagpangayo pinaagi sa pag-ampo mao ang pagpangamuyo ngadto sa Langitnong Amahan alang sa panabang.”

Mitando si Kimber. Morag mibati siya kannunay nga kinahanglan siya og tabang. Apan unsaon niya sa pagpangamuyo ngadto sa Langitnong Amahan nga dili makasulti og kusog?

“Kining sunod nga mga bersikulo ang tanan mahitungod sa pag-ampo,” miingon si Mama. “Makaampo kita mahitungod sa bisan unsa—sa atong pamilya, sa atong pagkaon, ug sa bisan unsa nga tingali atong gikinahanglan.” Dayon nagpadayon siya sa pagbasa. “‘Kon kamo dili mangamuyo sa Ginoo, himoa nga ang inyong mga kasingkasing mapuno, magpadayon sa pag-ampo ngadto kaniya sa kanunay.’”

Mihunong si Mama ug mitan-aw ni Kimber. “Kana nagpasabot nga kon ikaw mag-ampo diha sa imong kasingkasing ug hunahuna, ang Langitnong Amahan maminaw kanimo.”

Gibati ni Kimber nga malaumon, malipayon nga pagbati. Tingali ang Langitnong Amahan sa tinuod makadungog sa iyang mga pag-ampo, bisan kon siya dili mogamit og kusog nga mga pulong. Makaampo siya diha sa iyang kasingkasing.

Nianang gabhiona, si Kimber miluhod sa kilid sa iyang higdaanan uban ni Mama alang sa mga pag-ampo sa dili pa matulog. Sa kasagaran si Mama ang mosulti sa pag-ampo samtang si Kimber maminaw. Apan niining higayona, si Kimber gusto nga mosulay sa pag-ampo diha sa iyang kasingkasing.

Akong turno, misinyas siya, nagtudlo sa iyang kaugalingon ug nagkyugpos sa iyang mga bukton. Gipiyong niya ang iyang mga mata ug naghunahuna mahitungod sa tanang butang nga gusto niya nga mahibaloan sa Langitnong Amahan. Sa iyang hunahuna, gisultihan niya Siya unsa nga mga butang nga siya mapasalamaton. Gisultihan niya Siya kon unsa ka lisod ang pagsulti. Ug nangayo siya sa Iyang tabang.

Sa wala madugay mibati siya og pagbati sa kalinaw gikan sa iyang ulo hangtod sa iyang mga kumagko sa tiil.

Sa dihang nahuman na siya, si Kimber mibuka sa iyang mga mata.

Gigakos siya ni Mama. “Maayo nga pag-ampo, Kimber.”

Mipahiyom si Kimber. Nasayod siya nga ang Langitnong Amahan nakadungog kaniya. Ug nasayod siya nga ang malinawon nga pagbati sa iyang kasingkasing mao ang Iyang tubag.

Ablihan ang PDF

Mga paghulagway pinaagi ni Brooke Smart