Ua Auauna Aposetolo i se Misiona i Peretania Tele

Na fetalai atu le Alii ia Iosefa Samita e auina atu nisi o Aposetolo i se misiona i Peretania Tele. Sa faigata i Aposetolo ona tuua o latou aiga, ae na folafola mai le Alii e faamanuia i latou.

Sa i ai se aiga talavou o Heber C. Kimball ma lona toalua o Vilate. O le toatele o i latou sa mama’i tigaina.

Sa ma’i foi Polika Iaga, ma sa matitiva lona aiga. Ae sa fai atu le toalua o Polika, o Mary Ann, ia te ia, “Alu e faataunuu lau misiona, ma o le a faamanuia oe e le Alii.”

Sa toe malosi Heber ma Polika, ae sa matuai vaivai lava i laua. Sa laua mananao e talai atu le talalelei, o lea sa laua faatofa atu ai i o laua aiga ma fea’ei i tua o se taavale solofanua e amata ai la laua malaga.

Ina ua mavae se malaga umi i le sami, ona taunuu lea o Heber ma Polika i Peretania Tele. Faatasi ai ma isi Aposetolo, sa latou aoaoina ai le toatele o tagata i le talalelei. E faitau afe tagata na papatisoina i le Ekalesia a Iesu Keriso. O le toatele o i latou na folau atu i le isi itu o le sami e faatasi ma le Au Paia i le Iunaite Setete.

Sa tausia e le Alii Lana folafolaga e tausia aiga o Heber ma Polika a o laua auauna atu ia te Ia o ni faifeautalai.