O Le Vaifofō o le Paolo

“E mafai ona ta o i le palasa?” Na fesili atu ai le tuafafine o Aiveni o Cristal.

Sa tilotilo atu Aiveni i fafo. “Ou te fia alu!” na ia fai atu ai. “Ae atonu e tatau ona ta faatali seia goto le la. E vevela tele.”

O le palasa o se fanua mutia telē e latalata i lo latou fale. Sa la fiafia e tuli pe ive’a ai iina ma a laua uo. Ae sa leai se paolo i le palasa latou te malōlō ai mai le vevela. Ma o le taumafanafana lenei, sa o se faafitauli tele lava.

Sa filemu Crustal mo sina taimi. Ona ia fai mai lea, “Ae a pe a tatou totoina ni laau? O le ala lena o le a paolo ai le palasa. Ona mafai lea ona tatou taaalo e tusa lava pe vevela!”

Sa ataata Aiveni. “Ese lo’u fiafia i lena manatu!”

Sa ta’u atu e Aiveni ma Cristal ia Papá mea uma e uiga i la la’ua fuafuaga. “O le a ou fesili atu i le aai mo se faatagaga,” o lana tala lea.

I ni nai vaiaso mulimuli ane, na laua maua ai le faatagaga sa laua manaomia ma saunia ai e amata! Sa ave e Papá ia Aiveni ma Cristal i le laau telē lea na ola i tua o le latou fale. I lalo o le laau, sa ola ai ni laau laiti.

“A fua le laau telē, e toulu ifo fatu i le eleele,” o le faamalamalama mai lea a Papá. “Ona tutupu ae lea o laau laiti mai ia laau. E pei lava o ni vavega laiti o le natura!”

Sa faasino atu e Papá ia i laua le auala e eli ai ma le faaeteete ia laau laiti. Sa totō lemu e Aiveni ma Cristal i totonu o ulo fugalaau.

Ona oo lea i se aoauli o se tasi o Aso Toonai ina ua natia le la i tua atu o ao, sa uta ai e Aiveni ma Cristal ia laau laiti i luga o se taavale toso. Sa la’ua tulei lemu atu i le palasa. Sa fesoasoani uso ma tuafafine laiti o Aiveni e ave pakete vai. Sa aumai e Mamá ma Papá ni suo.

Sa latou filifilia faatasi se nofoaga mo laau taitasi. Sa latou eliina pu ma totō laau taitasi ma le alofa. Sa faasino atu e Mamá ia i la’ua le auala e eli ai alavai faataamilo i laau e fui ai. “E manaomia e laau le susulu o le la, vai, ma le tele o meaai ina ia ola malolosi ai,” sa ia fai atu ai. “E pei lava o tamaiti!”

Sa mafaufau Aiveni i le laau i tua atu o lo latou fale ma mafaufau pe o le a faape’ī foliga o laau i se aso. “E mafai ona e talitonu i ai?” na ia fai atu ai. “E i ai se aso o le a maualuga atu ai nei laau nai lo i tatou!”

I le tautotogo, e faaofo ai e laau ia tagata uma i o latou fugalaau piniki matagofie ma sesega. I le taumafanafana, e oo atu lo latou paolo i le isi itu o le palasa. Ma i le tautoulu, e ufitia ai e laulaau le eleele i se kapeta samasama.

O aso uma lava, e asiasi atu ai Aiveni ma Cristal i le palasa e siaki ia laau. Sa laua faamautinoaina ua lava vai o laau taitasi. Ma o taimi uma lava e totogo mai ai se lau po o se lala fou, la te lagona lava le mitamita tele. Sa tauia a laua galuega mamafa!

Sa fiafia Aiveni i le mafaufau i tagata uma o le a fiafia i le paolo i le palasa i se aso. Sa fesoasoani o Ia e fai le lalolagi o se nofoaga e sili atu ona matagofie mo fanau uma a le Tama Faalelagi.

Tatala le PDF

Ata na tusia e Colleen McKeown