O Se Lotu Fou mo Jamesi
Sa ese lagona o Jamesi iinei nai lo le isi a latou lotu.
O se tala moni mai Fiti.
Sa savali atu Jamesi i fafo i le tamai sai lea sa tausi ai e lona aiga ia puaa. “Ia lea, puaa!” Sa ia tauai atu i ai ni meaai, ma sa pisa fiafia ai puaa.
Ona ave atu lea e Jamesi ni fagu vai mamā i le paipa i fafo. Sa pasī atu vai malulu i totonu o le fagu ao ia kiina le paipa. O le fafagaina o puaa ma le la’uina o vai mo lona aiga o le auala lea sa ia fesoasoani ai i aso uma.
“Jamesi!” Na valaau mai ai Tina. “Ua e sauni i le lotu?”
Na tapē e Jamesi le paipa ma ave atu le fagu mamafa mulimuli i totonu. “A lea ua ou sauni.”
O Aso Sa uma lava e o ai le aiga o Jamesi i se lotu Kerisiano i lo latou nuu. Sa fiafia o ia e aoao e uiga ia Iesu Keriso.
E lei umi ae savavali atu Jamesi ma ona tuafafine laiti, o Unaisi ma Marama, ma le isi vaega o lo latou aiga i le lotu. Sa oteote ni nai moa taase i le auala.
Ae ina ua latou taunuu atu, sa tapunia faitotoa. “Ua galo ia te au e tapunia le lotu i le vaiaso lenei ma le vaiaso a sau talu ona ua alu le faifeau,” o le tala lea a Tama.
“E i ai se isi lotu e mafai ona tatou o i ai?” o le fesili lea a Jamesi. O le a faanoanoa o ia pe a leai se lotu i lenei vaiaso.
Sa mafaufau Tama mo sina taimi. “Ioe!” o lana tala lea. “Pei a ou te iloa.”
Sa mulimuli atu Jamesi ma lona aiga ia Tama i lo latou fale. Sa latou o uma i totonu o la latou vaa laupapa laitiiti i le faatausiusiuga o le vaitafe. Sa nofo Tama i le pito i tua e faaola le afi.
Sa pa’o atu le vaa i le vaitafe. Sa su’e e Jamesi ni manulele na lalafi i laau lanumeamata uumi. Ina ua mavae le tusa ma le 15 minute, ae latou vaaia loa se tamai falelotu. Sa i ai se faailo e faapea, “O Le Ekalesia a Iesu Keriso o le Au Paia o Aso e Gata Ai.”
“O le lotu lenei sa ou mafaufau i ai,” o le tala lea a Tama. Sa ia aveina le vaa i le matafaga, ma sa o ese tagata uma. Sa mafai ona latou faalogoina musika o sau mai le falesa.
I totonu, sa saofafai ai Jamesi ma ona matua ma nai ona tei. Sa latou faalogologo i failauga ma pese. Sa lagona e Jamesi le mafanafana ma le fiafia i lona loto.
Ina ua uma le sauniga, sa sau se tamaitai lelei e talanoa ia i latou. “E i ai sa matou vasega faapitoa mo tamaiti,” o lana tala lea. “E ta’ua o le Peraimeri. Tou te fia o mai i ai?”
Sa tilotilo atu Jamesi i ona tuafafine. Sa ia lagona sina popole laitiiti e alu i se vasega e leai se tasi na te iloaina! O le mea sili e mafai ona o mai foi ona tuafafine. Atonu o le a malie.
“Ua lelei,” sa fai atu ai Jamesi.
“Tatou o!” Sa foliga fiafia Marama.
Sa mulimuli atu Jamesi ma ona tuafafine laiti i le tamaitai i se potuaoga. Sa toatele tamaiti sa nonofo i nofoa laiti, na talanoa ma taliē. Ina ua nofo i lalo Jamesi, sa latou ataata atu ia te ia. Sa ese le lelei o tagata uma!
Sa latou usuina pese, ma sa fesoasoani isi tamaiti ia Jamesi ma ona tuafafine e aoao upu. Ona fai lea o se latou lesona e uiga ia Iesu Keriso. Sa ese lagona o Jamesi iinei nai lo le isi a latou lotu. Sa o se ese lelei.
Ina ua uma le lotu, sa toe tulioso le aiga o Jamesi i totonu o le vaa e o i le fale. Sa toe tilotilo atu Jamesi i le faailo i fafo o le falelotu. Sa i ai le igoa o Iesu Keriso. Atonu la o le Ekalesia lea a Iesu Keriso! Sa manao Jamesi e mulimuli ia Iesu.
“E mafai ona tatou toe o mai iinei i le vaiaso a sau?” na fesili ai Jamesi.
Na ataata Tina ma Tama. “Sa ma mafaufau foi i le mea lava lena e tasi,” o le tala lea a Tina.
“Yay!” Sa alalaga ai Unaisi.
Sa ataata Jamesi. Sa ia iloaina ua latou maua se mea faapitoa. Ma sa le mafai ona ia faatali e aoao atili.
Ata na tusia e Bethany Stancliffe