O Paionia i Atunuu Uma
E Tai Pei o le Lagi
“E te fia sau i le lotu?” Na fesili ai Uncle Reza.
O se tala moni mai Initia ma Kanata.
Sa gaugau e Tahira le ofutino mulimuli ma tuu i lana atopau. Sa tapena o ia mo se malaga e faaalu le taumafanafana ma le fafine ma le tamaloa o lona aiga i Kanata. Sa fiafia o ia ae sa popole teisi foi. Sa mamao ese Kanata mai lona aiga i Initia.
“Ua i ai au mea uma?” Sa fesili ai Tinā.
“Ou te masalo.” Sa tapuni e Tahira lana atopau.
“O le a e maua se taimi fiafia. Ia mautinoa e fusi tele ia Uncle Reza ma Aunt Misu mo au,” o le tala lea a Tina.
Ina ua oso ese Tahira mai le vaalele i Kanata, sa ia avatu se fusi tele ia Uncle Reza ma Aunt Misu. “O le fusi lena mai lo’u tina,” o lana tala lea.
Sa latou faaaluina nai aso na sosoo ai e matamata ai i le nuu ma nofoaga lata ane. Sa asiasi atu o ia i lana uluai paka faafiafia ma vaai i le Afu i Niagara. Sa matua manaia tele!
I le aoauli o le Aso Toonai, sa fesoasoani ai Tahira e kuka le moa makhani mo le taumafataga o le afiafi. Ina ua uma ona latou aai, sa fesili atu Uncle Reza ia te ia.
“E te fia sau ma i ma’ua i le lotu taeao?” sa ia fesili atu ai. “Ma te o i se lotu Kerisiano. Matou te aoao ai iina e uiga ia Iesu Keriso ma Lana talalelei.”
“Ua lelei,” sa fai atu ai Tahira. Sa talitonu Tina ma Tama i se lotu ese, ae sa alu Tahira i se aoga nofotumau faa-Kerisiano i Initia. O le alu i se lotu fou o le a le ese ai.
O le aso na sosoo ai, na ofu ai e Tahira se ofu na tuuina atu e le fafine o lona aiga e ofu ai. Ina ua latou taunuu i le falesa ma savavali atu i totonu, sa pepese tagata uma. Sa tu Tahira ma sioa atu i tagata uma. Sa i ai ni tina ma tamā sa nonofo faatasi ma a latou fanau. Sa foliga fiafia tagata uma. Sa matuai manaia pesega.
E tai pei lenei mea o le lagi, o le mafaufau lea o Tahira.
Sa saofai Tahira i se tasi o nofoa umi faatasi ma Aunt Misu ma Uncle Reza. Sa ia vaavaai atu a o faasolo fata o falaoa ma vai. Sa faalogologo o ia i failauga o talanoa e uiga ia Iesu Keriso. Ma sa ia faalogoina nisi pesepesega. O le pese mulimuli sa faatatau i le faatasitasi o aiga e faavavau. Sa fiafia o ia i ona lagona i upu.
Ina ua uma le tatalo faaiu, sa liliu atu Tahira ia Uncle Reza. “O le a le uiga o le faatasi e faavavau?”
Sa ataata Uncle Reza. “Matou te talitonu afai tatou te mulimuli ia Iesu Keriso ma faia ma tausia folafolaga ma le Atua, e mafai ona tatou nonofo faatasi ma o tatou aiga i le lagi i se aso—faatasi uma lava.”
Sa lagona e Tahira le mafanafana i totonu mai lona ulu e oo i ona tamatamaivae. Sa fiafia o ia i le manatu o le faatasi ma lona aiga e faavavau.
Ina ua tuua le lotu, sa mafaufau pea Tahira e uiga i le musika matagofie. Sa manao o ia e aoao atili e uiga ia Iesu Keriso ma aiga e faavavau. Na tonu ia te ia e feiloai ma faifeautalai. A o mavae atu vaiaso, sa faateleina le iloa e Tahira e moni le talalelei.
Sa valaau atu Tahira i ona matua e ta’u atu ia i laua mea sa ia aoaoina. Ona ia fesili atu lea ia i laua i se fesili taua. “E mafai ona ou papatiso?” Sa la fai mai, “Ioe.”
I le aso o lona papatisoga, sa usuina ai e Tahira, Uncle Reza, ma Aunt Misu le pese “O Au o se Atalii o le Atua.” Sa faaliliuina e Uncle Reza ina ia mafai ona latou usuina i le faa-Initu. O le faa-Initu o le gagana lea sa ia tautala ai i Initia.
A o pese Tahira, sa ia lagonaina se lagona mafanafana i lona loto. Sa tai pei lava o le lagi. Ma sa iloa e Tahira ona o Iesu Keriso, afai na te tausia ana folafolaga i le Tama Faalelagi, e mafai ona toe nonofo faatasi o ia ma i Laua uma i se aso.
Ata na tusia e Ekata Mandal