E Le Atoatoa Lelei

Na faauma e Adeline le tusia o le pusa e faailoga faasa’o mulimuli i luga o lana pepa. I autafa, sa ia tusia ai, Fai tatalo i le taeao ma le po.

“O le a lenei mea?” O le fesili lea a Maman.

“O loo o’u faia se lisi o mea e fai mo taeao,” o le tala lea a Adeline. “O le a ou maua se aso lelei atoatoa!”

Sa faaō i luga e Maman ona fulufulumata. “E mo’i?”

Sa luelue le ulu o Adeline. “I le Peraimeri sa matou aoao ai e uiga i le faaatoatoaina ia Keriso. O le a ou amiolelei atili ina ia mafai ona ou maua ni aso atoatoa.”

“Ua ou fiafia i lou manao e fai ni filifiliga lelei,” na fai atu ai Maman. “Ae e te iloa, sa na o le toatasi le tagata i le lalolagi sa atoatoa—o Iesu Keriso.”

Sa mapuea Adeline. “O lea ou te iloa. “Ae ou te fia taumafai lava!” Ou te manatu e mafai ona ou faia.”

Ina ua oo i le taeao, sa saunia Adeline. Sa ia teuina lona moega ma fai lana tatalo i le taeao.

I le taimi o le ti o le taeao, sa fesoasoani o ia e fafaga lona uso laitiiti o Sylvia. Ina ua masa’a ia Sylvia lana fuga ai i lona nofoa atoa, sa manavanava loloa Adeline. Sa ia faitau e oo i le fa ona fesoasoani lea e faamama.

I le aoga, sa vaavaai ai Adeline mo ni tagata sa manaomia se fesoasoani. Sa mapeva le tapuvae o Luka, o lea sa ia aveina ai lana fata meaai o le aoauli mo ia.

A o tuua le aoga, sa ataata atu Adeline i lana ataata aupito lapoa i le tamaitai sa tatalaina le pa a le aoga. Sa masani lava ona foliga ita le tamaitai. Ae o ananei sa toe ataata mai o ia!

Ina ua uma le aoga, sa tuu atu e Adeline ia Sylvia lana manu utuivavae e sili ona fiafia i ai e taalo ai. A o le’i moe, sa ia faia se tatalo. Sa ia faailoga faasa’o mea o loo i lana lisi ma faapupuu i lona palanikeke. Sa ia lagonaina le mitamita tele ma le vaivai tele. Sa saunia o ia mo se isi aso lelei atoatoa taeao!

Ina ua ala ae Adeline i le aso na sosoo ai, sa paepae solo ana pepe meataalo uma i le fola. Sa uu e Sylvia le tasi ma o loo susu ai. Atonu na ia tosoina uma mai i fafo!

“Sylvia!” Sa ee atu ai Adeline. “Sa ou fai atu e aua e te tago i a’u pepe meataalo!” Sa ia fao mai le pepe meataalo sa uu e Sylvia. Sa tagi Sylvia ma tamo’e ese.

Sa tilotilo atu Adeline i lana lisi o mea e fai i le faitotoa. Sa faanoanoa lona loto.

Na sau Maman i totonu ae fetaui lava ma le lagona e Adeline o se loimata i lona alafau.

“O le a le mea ua tupu?” O le fesili lea a Maman.

“Ua galo na fai la’u tatalo! E lei teua lo’u moega.” Sa lē mautonu le leo o Adeline. “Ma sa ou agaleaga ia Sylvia. Ua uma nei lava lo’u aso atoatoa!”

Sa fusi e Maman ia Adeline. “E faigata tele ona atoatoa i taimi uma. O le mea moni, e le mafai.”

Sa faaūū Adeline. “Ae e mafai faapefea la ona ou atoatoa ia Keriso?”

“O lena tonu lava! E le mafai ona tatou atoatoa e aunoa ma Iesu Keriso,” o le tala lea a Maman. “Na Ia tuuina mai Lona soifua mo i tatou aua na silafia e le Tama Faalelagi o le a tatou faia mea sese ma o le a manaomia ai se fesoasoani. E ave e Iesu a tatou taumafaiga lē atoatoa ma faaleleia atili ai.”

Sa mafaufau i ai Adeline. “E le mafai la ona ou maua ni aso atoatoa i aso uma?” sa ia fesili ai.

Na lūlū le ulu o Maman. “Leai. O le a i ai ou aso faigata. Ae o le a e maua foi ni aso lelei.” Sa afe e Maman le lauulu o Adeline i tua o lona taliga. “O lou taumafai i le mea sili e te mafaia o le mea lena e taua. E tusa lava pe amata se aso i se filifiliga sese, e mafai lava ona tatou faia se tatalo e salamo ai ma toe taumafai. Faatasi ai ma le fesoasoani a Iesu Keriso, e lava ai au taumafaiga.”

Sa lagona e Adeline le mafanafana o le loto.

“Ia, mo lau lisi.” Na faasino atu Maman i le lisi. “Ae a pe a ta’ua taulai atu i se mea se tasi?”

Sa tilotilo Adeline i lana lisi. Sa ia sasaeina se vaega o le pepa ae toe faapipii le mea sa totoe i le faitotoa. O le mea e tasi sa i ai pea iina na fai mai, Fai tatalo i le taeao ma le po.

Sa ataata Adeline. “Atonu sa le’i atoatoa le amataga o lo’u aso, ae e mafai lava ona ou faia se tatalo i le taimi nei. Ma faatasi ai ma le fesoasoani a Iesu Keriso, o le a lava lena!”

Tatala le PDF

Ata na tusia e Giovanni Abeille