O Gaoioiga o le Sau, Mulimuli Mai ia te A’u

Ua valaauina e le Atua ia epikopo ma peresitene o paranesi e fesoasoani e auauna atu i tagata i a latou uarota po o paranesi (tagai Mataupu Faavae ma Feagaiga 72:2). Oti ese fatu pepa ma tusi mea e te fiafia ai e uiga i lou epikopo po o le peresitene o le paranesi i luga o fatu taitasi. Faapipii fatu i le faitotoa o o latou ofisa po o le fale.

E i ai se aso e mafai ai ona tatou nonofo i le malo selesitila faatasi ma le Tama Faalelagi, Iesu Keriso, ma o tatou aiga (tagai Mataupu Faavae ma Feagaiga 76:62, 70, 92). Ua faatusa e tusitusiga paia le malo selesitila i le la. Faaaoga se ipu pepa po o se fasi pepa e fai ai se la. Oti ni pepa tafatolu mo ave o le la ona faakelū pe faapipii lea i le li’o. Talanoa e uiga i mea e mafai ona e faia i le taimi nei e saunia ai e nonofo faatasi ma le Tama Faalelagi ma Iesu Keriso i se aso.

I lalo o le taitaiga a le Atua, na foafoaina ai e Iesu Keriso meaola uma i le lalolagi (tagai Mataupu Faavae ma Feagaiga 77:2). Taalo i se taaloga e mate ia manu! E faafoliga se tagata e toatasi se manu patino. E taumafai isi tagata uma e mate po o le a lea manu. A sa’o lau mate, ta’u atu se mea e te fiafia ai e uiga i lena manu.

E faafofoga mai lava le Tama Faalelagi i taimi uma i a tatou tatalo (tagai Mataupu Faavae ma Feagaiga 81:3). Usu faatasi ma lou aiga le “Tatalo a se Tamaitiiti” (Tusipese a Tamaiti, 12). Amata le pese i le na o le toatasi le tagata. Ona auai lemu atu lea o isi tagata uma. A uma ona outou pese, talanoa e uiga i mea e mafai ona outou tatalo ai o se aiga.