“Ang Talagsaong Kasinatian atol sa Field Trip,” Higala, Mayo 2025, 40–41.
Ang Talagsaong Kasinatian atol sa Field Trip
“Mosibat ta og kadiyot gikan sa grupo,” miingon si Ralph.
Usa ka tinuod nga istorya gikan sa Ghana.
Midagan si Nyamedo ngadto sa bus kauban sa iyang manghod nga lalaki, si Kwame. Misaka sila sa mga ang-ang ug nanglingkod dapit sa bentana. Mitan-aw si Nyamedo sa gawas aron makita ang adlaw nga misilaw sa berdeng kakahoyan. Ang ilang eskwelahan mohimo og usa ka field trip ngadto sa inatiman nga kinaiyahan. Karon ang usa ka talagsaong kasinatian!
“Hoy, Nyamedo!”
Ang mga higala ni Nyamedo nga si Ralph ug Sierra naglingkod sa lingkoranan sa iyang atbang.
Gibira ni Ralph ang manggas ni Nyamedo ug mihunghong. “Inig abot nato sa parke, mosuroy dayon ta!”
“Oo!” Miingon si Sierra. “Maghimo ta og kaugalingon natong paglakwatsa.”
Mahinamong mitando si Ralph. “Mosibat ta sa dili pa ang unang kalihokan.”
Gihanduraw ni Nyamedo ang tanang butang nga posible nilang makita didto sa kamingawan. Mga kahoyng tag-as, matahom nga mga mananap, ug tingali mga busay!
“Daw makalingaw na! Buhaton nato na,” miingon siya dala ang pahiyom.
Dihang mihunong na ang bus ngadto sa inatiman nga kinaiyahan, si Nyamedo ug Kwame dungan nga nanaog sa bus. Gisultihan sila sa ilang mga titser nga ang tanan magpabilin kauban sa grupo ug dili maglaag-laag.
Miduol si Ralph kang Nyamedo. “Nahimumdom ka sa plano?” Mihunghong si Ralph.
Miyango si Nyamedo. Apan mihunong dayon siya aron maghunahuna. Ang pagsuhid sa kamingawan ingon og makahinam, apan nasayod usab si Nyamedo nga posibleng peligro kini. Unsa kaha kon mangasaag sila o masakitan?
Sa kalit, gibati niya ang tingog nga nagsulti kaniya. Pabilin uban ni Kwame.
Ang tingog hinay ug hagawhaw. Nasayod si Nyamedo nga ang Espiritu Santo kadto.
Nabalaka siya basin masuko ang iyang mga higala kaniya sa dili pagsuhid uban nila. Apan tingali ang Espiritu Santo nanalipod kaniya.
Miatubang si Nyamedo kang Ralph. “Pasaylo, sa tinuod kinahanglan kong magpabilin kauban sa akong igsoon,” miingon siya. “Bantayan nako siya.”
Ningmug-ot si Ralph.
“Apan niingon ka nga moadto ka!”
“Ang titser miingon nga kinahanglan tang dinhi ra,” miingon si Nyamedo. Nanghupaw si Ralph ug mipalayo.
Si Nyamedo ug Kwame mikuyog sa ubang mga estudyante ug misunod sa ilang mga titser. Una nangadto sila sa zipline. Mihuros ang hangin tumong sa ilang mga nawong samtang gisuhid nila ang sanag nga berdeng kakahoyan. Sama kini og naglupad!
Sa sunod ang mga tiggiya sa maong parke mitudlo nila mahitungod sa mga hayop nga nagpuyo didto. Dili makahulat si Nyamedo ug Kwame nga makakita niini. Nahibaloan nila ang mahitungod sa mga zebra, mga unggoy, mga bitin, antelope, ug daghan nga langgam! Human makatan-aw sa tanang maanindot nga mga mananap, nangadto sila sa pagkatkat sa mga bato ug pagsakay og kabayo. Sa wala madugay nagdula sila og mga dula.
Nalipay si Nyamedo nga nagpabilin siya uban ni Kwame. Kay kon wala, wala unta siya makakita sa daghan kaayong makalingaw nga mga butang!
Dihang panahon na nga mobalik sa bus, nakita ni Nyamendo si Ralph ug Sierra. Nanagan sila padulong kaniya.
“Hapit mi maapsi sa naglagot nga mga unggoy,” mihunghong si Ralph. Makita siya nga may kalisang. “Hapit gyod mi mapasakiti.”
Miyango si Sierra. “Maayo na lang kay wala ka mokuyog.”
“Hala,” miingon si Nyamedo. “Nalipay ko nga OK ra mo!”
Ang Espiritu Santo tinuod nga nanalipod nako, naghunahuna siya. Gikuptan niya ang kamot ni Kwame samtang nanakay sila sa bus.
Mapasalamaton siya nga ang Espiritu Santo naghimo niyang luwas ug mitabang nila nga malingaw sa talagsaong kasinatian.
Mga paghulagway pinaagi ni Cam Kendall