“Ayaw Sunda Kana nga Iro!” Higala, Mayo 2025, 8–9.
Ayaw Sunda Kana nga Iro!
Gikan ba kaha sa Espiritu Santo kini nga pagbati?
Usa ka tinuod nga istorya gikan sa USA.
“Dali!” misinggit si Lauren samtang miagi siya sa driveway.
Gitaod ni Marcie ang iyang helmet. “Padulong na ko!”
Misikad si Marcie sa iyang bisikleta padulhog sa daplin ngadto sa iyang mga higala. Ganahan siyang magdula sa tanang matang sa dula kauban ni Lauren ug ni Cassidy. Apan labaw sa tanan, ganahan siyang magbisikleta kauban nila.
Samtang nagbisikleta ang mga batang babaye padulhog sa daplin, ang iro sa silingan, si Rocket, nagsugod sa pagsunod kanila.
“Ayay,” miingon si Cassidy. “Kinahanglan nga papaulion nato siya!”
Apan ang iro dili gustong mopauli. Ila siyang gitawag aron mohunong, apan si Rocket nagpadayon gihapon. Bisan unsay ilang gihimo, nagdagan-dagan hinoon siya ug mipakitoy sa iyang ikog. Nalingaw kaayo siya!
Samtang ang mga batang babaye misunod ni Rocket, nakabantay si Marcie nga ang mga balay nagkaanam og dili na kaayo pamilyar. Nagkaanam na diay siya sa pagkalayo gikan sa iyang dalan. Si Marcie walay bisan usa nga nailhan nga nagpuyo niining mga balaya!
Asa mi padulong? Naghunahuna si Marcie. Makabalik kaha ko sa akong agianan?
Gipaningkamotan ni Marcie nga dili mabalaka ug padayon sa pagbisikleta. Apan mibalik ang pagbati. Dunay nag-ingon kaniya nga kinahanglan siyang mopauli.
Gihunong ni Marcie sa daplin ang iyang bisikleta. Miingon siya sa kusog nga tingog, “Tingali kinahanglan na kitang mamalik karon!”
“Kinahanglan natong papaulion si Rocket!” miingon si Cassidy. Siya ug si Lauren padayong nagbisikleta nga naggukod sa iro.
Mibati gihapon si Marcie og lahi. Nganong nabalaka man kaha siya? Mibati ba usab niini ang iyang mga higala?
Tingali kini nga pagbati para lang kanako, naghunahuna si Marcie. Naggikan ba kini sa Espiritu Santo? Nabunyagan siya ug nakompirmahan pipila lang ka bulan ang milabay, ug si Mama ug si Papa mitudlo niya mahitungod sa pagpamati sa Espiritu Santo. Miingon sila nga Siya mamulong kaniya pinaagi sa mga pagbati sulod sa iyang kasingkasing o sa mga panghunahuna sulod sa iyang hunahuna. Nasayod siya nga Siya mogiya kaniya kon siya maminaw.
Gibati na usab niya ang maong pagbati. Niining higayona mas kusog pa kini. Ayaw sunda kana nga iro.
“Mobalik ko,” gitawag ni Marcie ang iyang mga higala.
“OK!” Miingon si Lauren.
Mituyok si Marcie ug mipadagan balik sa dalan nga iyang giagian. Dihang nauli na siya, gibiyaan niya ang iyang bisikleta sa hawanan ug misulod. Daghan og gibuhat si mama sa kusina.
“Hi, Ma,” miingon si Marcie. “Miuli ko. Gibati ko og kabalaka.”
Mihunong si Mama. “Unsay nahitabo?”
“Mibati ko og pagbati sa pasidaan samtang nagbisikleta ko kauban sa akong mga higala. Maong miuli ko, “miingon si Marcie. “Tingali ang Espiritu Santo kadto.”
Gigakos siya ni Mama. “Nalipay ko nga gipaminaw nimo kadto nga pagbati.”
Mibati og nindot sa sulod sa iyang kasingkasing si Marcie. “Ako sab.”
Mga paghulagway pinaagi ni Simini Blocker