Pagpakigbahin sa Kasanag sa Adlaw

Si Ángel mikatkat sa karetilya tupad ni Papá. Ang mga botelya sa gatas dapit sa luyo motagingting og hinay samtang nagdagan ang ilang kabayo. Hayag ang adlaw, ug nagpahinumdom kini kaniya sa iyang paborito nga kanta.

“Si Jesus buot nga ako mahimong bidlisiw,” mikanta si Ángel.

Pipila ka bulan ang milabay, gibunyagan si Ángel. Si Mamá ug ang manghod niyang lalaki, si Oscar, gibunyagan usab. Si Papá wala magpasakop sa Simbahan, apan nalipay siya alang nila. Nahinumdom gihapon si Ángel unsay pagbati dihang mikawas siya gikan sa tubig. Sama kini sa init-init nga bidlisiw nga mabati sa iyang bukobuko, apan anaa sa sulod.

Padayon si Ángel nga nagkanta sa iyang kaugalingon samtang si Papá mipahunong sa karetilya sa gawas sa balay ni Señora Perez. Nanaog si Ángel ug mikuha og usa ka botelya sa gatas gikan sa likod. Si Señora Perez usa sa mga kustomer sa iyang pamilya.

“Delivery!” miingon siya.

Si Señora Perez nagtrabaho sa iyang garden. “Salamat,” miingon siya, nga mikuha sa botelya. Mitunol siya kaniya og pipila ka sensilyo. “Unsa nga awit ang imong gikanta?”

Gibati ni Ángel ang kainit sa iyang mga aping. Wala siya makamatikod nga ang babaye nakadungog kaniya!

“Usa kadto ka kanta gikan sa akong simbahan,” miingon si Ángel. “Ang Simbahan ni Jesukristo sa mga Santos sa Ulahing mga Adlaw.”

Mipahiyom si Señora Perez. “Mahimo ba ko nimong sultihan og butang mahitungod sa inyong simbahan?”

Sa makadiyot, dili segurado si Ángel unsay isulti. Dayon miingon siya, “Nagatuo kami nga ang parehas nga simbahan nga gitukod ni Jesukristo samtang dinhi Siya sa yuta ania na usab.”

“Makapainteresado kana nga pagtulun-an,” miingon si Señora Perez. “Wala pa gayod ko kadungog og simbahan nga nagtuo og ingon niana.”

“Tingali makaadto ra ka sa sunod,” miingon si Ángel. “Ayo-ayo!” Dayon midagan siya balik kang Papá aron motabang nga mahatod ang nahibiling mga gatas.

Sayo sa buntag sa Dominggo, mimata si Ángel. Madungog niya si Mamá nga nag-andam og pamahaw sa kusina.

“Oscar,” miingon si Ángel, “oras na aron maandam para sa simbahan!”

Nag-ilis si Ángel ug Oscar sa ilang pangsimba nga mga sinina ug nangandam sa paglakaw. Ang bilding sa simbahan hapit mga tulo ka kilometro ang gilay-on. Layo kadto nga lakawon, mao nga kinahanglan sila nga mogikan og sayo.

“Ayo-ayo mo,” miingon si Papá dihang nanglakaw sila.

Samtang naglakaw sila, nag-hum na usab si Ángel sa iyang paborito nga kanta. Nag-hum siya dihang milabay sila sa mga balay nga gipanghatdan niya og gatas. Nag-hum siya dihang milabay sila sa namaligya og mga prutas sa merkado. Ug nag-hum siya dihang miliko sila sa dalan diin anaa ang bilding sa simbahan.

Dihang mitikang sila pasulod, natingala si Ángel. Naa didto si Señora Perez! Gikuyog niya ang iyang tibuok pamilya.

“Mianhi ka sa simbahan!” Miingon si Ángel.

Miyango si Señora Perez. “Nadasig ko sa imong kanta,” miingon siya. “Gitawagan nako ang imong mama para sa address. Gusto nakong makat-onan sa akong kaugalingon ang mahitungod niini nga simbahan.”

Mipahiyom si Ángel. Nakapaambit siya sa ebanghelyo pinaagi lang sa pagkanta og usa ka awit. Nanghinaot siya nga mabati usab ni Señora Perez ang kasanag sulod sa iyang kasingkasing karon.

Mga paghulagway pinaagi ni Jomike Tejido