Mubo nga mga Sulat sa Komperensiya

Tabang gikan sa Langit

Si Presidente Oaks namulong mahitungod sa mga butang nga gihatag sa Langitnong Amahan kanato aron sa pagtabang kanato sa pagpili sa matarong. Ang atong labing lig-on nga tabang mao ang atong Manluluwas, si Jesukristo. Tungod Kaniya, kitang tanan mapasaylo ug mabuhi pag-usab human kita mamatay. Ang Langitnong Amahn naghatag usab kanato og mga sugo, mga ordinansa ug mga pakigsaad, ug ang Espiritu Santo sa pagtabang ug paggiya kanato.

Pagdrowing og usa ka paagi nga ang Langitnong Amahan nagtabang kaninyo!

Paduol ngadto sa Manluluwas

Si President Eyring nag-ingon nga sa bata pa siya, ang miting sa sakramento gipahigayon sa gabii. Usa ka ngitngit ug tugnaw nga gabii, mibati siya og kagaan ug kamainiton diha sa chapel samtang siya miambit sa sakramento. Sa dihang sila miawit sa mga pulong “Ginoo, ubani ako,” siya mibati sa gugma sa Manluluwas ug kasuod pinaagi sa Espiritu Santo.

Pagdrowing og usa ka paagi nga kamo makapaduol ngadto ni Jesukristo.

Motuo, Magpasakop, Mahimong Sama

Si Sister Wright mipakigbahin kon unsaon nato nga mahimong mga sumusunod ni Jesukristo sa tibuok kinabuhi. Kita mahimong motuo diha Kaniya pinaagi sa pagkat-on mahitungod Kaniya ug mobati sa Espiritu Santo. Kita mahimong mahisakop ngadto ni Jesukristo ug sa Iyang Simbahan pinaagi sa paghimo ug pagtuman sa mga pakigsaad. Ug kita mahimong sama Kaniya pinaagi sa pagsunod sa Iyang ehemplo.

Usa ka Espesyal nga Gasa

Si Elder Kearon namulong mahitungod sa tibuok kalibotan nga tradisyon sa pagpanghatag og mga gasa. Kita mohatag og mga gasa nga atong ihatag ug modawat. Bisan ang mga penguin mohatag og sinaw nga mga bato sa usag usa isip mga gasa! Usa ka importante nga gasa gikan sa Langitnong Amahan mao ang pagkahibalo nga kita mao gayod ang Iyang pinangga nga mga anak nga mga babaye ug Iyang bililhong mga anak nga mga lalaki. Kon kita tinuod nga makadawat niini nga gasa, kita makahibalo kon kinsa kita ug sa unsang paagi kita hingpit nga gimahal.

Usa ka Mabituon nga Langit

Si Elder Tai ug ang iyang pamilya usa kahigayon nagkampo nga adunay daghang bituon. Ang iyang mga anak nangutana kon nganong dili sila makakita sa mga bituon didto sa panimalay. Gipasabot niya nga ang polusyon nakapahimo nga lisod makita ang mga bituon. Ang mga pagbalda ug mga tintasyon makasalipod sa atong espirituhanong panan-awon. Apan uban sa hugot nga pagtuo, kita mahimong makahibalo nga ang Langitnong Amahan ug si Jesukristo kanunayng anaa.