Ngaahi ʻEkitivitī ʻo e Haʻu, ʻo Muimui ʻIate Aú

ʻOku akoʻi ʻe he folofolá ʻa hono mahuʻinga ke muimui ki he ngaahi fekau ʻa e ʻOtuá (vakai, Tokāteline mo e Ngaahi Fuakava 42). ʻAi ha taha ke hoko ko e taki pea tuʻu ʻi muʻa ʻi he kulupú. ʻI he taimi ʻoku nau pehē ai “maama lanu matá,” ʻe lava ke laka ki muʻa ʻa e tokotaha kotoa pē. ʻI heʻenau pehē “maama kulokulá,” kuo pau ke tuʻu maʻu e taha kotoa!

ʻE ifi ʻe ha ʻāngelo ha talupite ʻi he taimi ʻe toe hāʻele mai ai ʻa Sīsū Kalaisí (vakai, Tokāteline mo e Ngaahi Fuakava 45:45). Faʻu haʻo talupite pepa pē ʻaʻau! Takaiʻi ha laʻipepa ki ha fuo ʻo ha kouni pea fakapipiki ia ke mapuni. Te ke lava foki ʻo tānaki atu ha kau ki hoʻo talupité pe ʻū siakale ke hoko ko ha ngaahi meʻalomi. Fakaangaanga leva ke ke lea ki hoʻo talupité mo lea ʻaki ʻa e ʻuhinga ʻokú ke ʻofa ai ʻia Sīsū Kalaisí.

ʻOku foaki ʻe he ʻOtuá ki he tokotaha kotoa pē ha ngaahi meʻafoaki fakalaumālie. ʻOku ʻuhinga ia ʻokú Ne tāpuakiʻi kitautolu ʻaki ha ngaahi talēniti ʻo fakafou ʻi he Laumālie Māʻoniʻoní (vakai, Tokāteline mo e Ngaahi Fuakava 46:11–33). Kumi ha ngeʻesi hina pe ipu. Tohi ʻi ha ngaahi laʻipepa ha ngaahi talēniti pe meʻafoaki kehekehe ʻe ala maʻu ʻe ha taha. Taufetongi ʻi hono fili mei he hiná mo fakahingoa ha taha ʻokú ke ʻiloʻi ʻokú ne maʻu ʻa e meʻafoaki ko iá!

ʻOku faʻa ui ʻa e ongoongolelei ʻo Sīsū Kalaisí ko e fuakava taʻengatá (vakai, Tokāteline mo e Ngaahi Fuakava 49:9, 12–14). Kuo ui foki ia ʻe Palesiteni Nalesoni ko e hala ʻo e fuakavá. Hiki ʻi ha ngaahi laʻipepa ha ngaahi founga te tau lava ai ʻo muimui ʻia Sīsū Kalaisi. Faʻu ha hala ʻaki ʻa e ngaahi laʻipepá pea taufetongi ʻi hono lue ʻi aí.