« ’Ōpere i te ’oa’oa », Hoa, Mē 2025, 30–31.
Pionie i te mau fenua ato’a
’Ōpere i te ’oa’oa
« E hīmene nō tā’u ’ēkālesia », ’ua parau Ángel.
E ’ā’amu mau nō Rāparata mai.
Pa’uma Ángel i ni’a i te pere’o’o i pīha’i iho ia Pāpā. ’Atete marū noa te mau mōhina ū i muri i te pere’o’o ’a horo ’ōtu’itu’i ai tā rāua pua’ahorofenua i mua. ’Ua ’ana’ana te mahana, ’e ’ua fa’aha’amana’o te reira iāna i tāna hīmene au roa a’e.
« Hina’aro Iesu iā’u ’ei hihi mahana », ’ua hīmene Ángel.
Ma’a ’āva’e i ma’iri a’enei, ’ua bāpetizohia ’o Ángel. ’Ua bāpetizo-ato’a-hia ’o Māmā ’e tōna teina ’o Oscar. ’Aita ’o Pāpā i tomo mai i roto i te ’Ēkālesia, ’ua ’oa’oa rā ’oia nō rātou. Tē ha’amana’o noa nei ā ’o Ángel i tōna mana’o i te haerera’a mai i rāpae i te pape. Mai te huru ra te māhanahana o te mahana, ’o roto rā iāna.
Tē hīmenemene marū noa ra ’o Ángel i te tāpe’ara’a ’o Pāpā i te pere’o’o i mua i te fare o Señora Perez. ’Ōu’a Ángel i raro ’e rave atu ra i te hō’ē mōhina ū i muri. E hōani ’o Señora Perez nō tōna ’utuāfare.
« ’Ōperera’a ū ! », ’ua parau ’oia.
Tē ’ohipa ra ’o Señora Perez i roto i tōna ’āua. « Māuruuru », te reo ïa a Perez vahine, ma te rave i te mōhina. Toro atu ra ’oia i te moni. « E aha terā hīmene tā ’oe ? »
’Ute’ute a’era te hōho’a mata o Ángel. ’Aita ’oia i tāu’a ē, tē fa’aro’o mai ra ’oia !
« E hīmene nō tā’u ’ēkālesia », ’ua parau Ángel. « Te ’Ēkālesia a Iesu Mesia i te Feiā Mo’a i te mau Mahana Hope’a nei. »
’Ua ’ata’ata ’o Señora Perez. « ’Āhani, ’a parau mai na i te tahi mea nō ni’a i tō ’oe ’ēkālesia ? »
’Ua fa’aea ri’i ’o Ángel, ’aita i pāpū e aha tē parau atu. Parau atu ra : « Tē ti’aturi nei mātou ē, te ’ēkālesia tā Iesu Mesia i ha’amau ’a ora ai i ni’a i te fenua nei, tei ’ō nei fa’ahou ā. »
« Mea au terā parau », ’ua parau atu Señora Perez. « ’Aita vau i fa’aro’o a’enei i te hō’ē ’ēkālesia ’o tē ti’aturi i te reira. »
« Pēnei a’e e nehenehe tā ’oe e haere mai i te hō’ē mahana », ’ua parau Ángel. « ’Ia maita’i i teie mahana ! » Horo atu ra ia Pāpā ra nō te tauturu i te ’ōpere i te toe’a o te ū.
I te sābati, i te po’ipo’i roa, ’ua ara mai ’o Ángel. Tē fa’aro’o ra ’oia ia Māmā i roto i te piha tūtu, tē fa’aineine ra i te mā’a.
« Oscar », ’ua parau ’o Ángel, « ’ua hora nō te fa’aineine nō te purera’a ! »
’Ua ’ō’omo ’o Ángel ’e ’o Oscar i tō rāua ’ahu purera’a ’e ’ua fa’aineine nō te haere. Fātata e piti maire te ātea rātou i te fare purera’a. E mea ātea nā raro, nō reira e mea tano ’ia fa’aru’e ’oi’oi.
« ’Ia maita’i tō ’outou tere », ’ua parau atu Pāpā i tō rātou revara’a.
’A hāhaere ai rātou, ’ua hīmenemene fa’ahou Ángel i tāna hīmene au roa a’e. ’Ua hīmenemene ’oia ’a nā mua ai i te mau fare tāna i ’ōpere i te ū. ’Ua hīmenemene ’oia ā nā mua ai rātou i te mau pa’epa’e o te mātete. ’E ’ua hīmenemene ’a tīpu’u ai i ni’a i te purūmu o te fare purera’a.
I tō rātou tomora’a atu i roto, ’ua māere roa ’o Ángel. Tei reira ’o Señora Perez ! ’Ua ’āfa’i mai ’oia i tōna ’utuāfare tā’āto’a nā muri iāna.
« ’Ua haere mai ’outou i te purera’a ! » ’ua parau Ángel.
’Ua ueue te upo’o ’o Señora Perez. « ’Ua au roa vau i tā ’oe hīmene », tāna ïa i parau. « ’Ua tāniuniu vau i tō ’oe metua vahine nō te ’ite i te vāhi. I hina’aro vau e haere mai nō te ’ite ’o vau iho nei e aha terā ’ēkālesia. »
’Ua ’ata’ata ’o Ángel. ’Ua fa’a’ite ’oia i te ’evanelia nā roto noa i te hīmenera’a i te hō’ē hīmene. ’Ua mana’o ’oia, maita’i ē e putapū ’o Señora Perez e i te tahi māhanahanara’a i tōna ’ā’au i teie mahana.
Fa’ahōho’ara’a nā Jomike Teijido