’Ua fa’aora mai Mary ’e ’o Caroline i te mau pāpa’ira’a mo’a

E 12 matahiti tō Mary Rollins, ’a fa’aro’o ai ’oia i te parau nō te Buka a Moromona i te taime mātāmua. ’Ua tīpe’e mai ’oia i te hō’ē buka ’e ’ua vai ara noa ’oia fātata i te pō tā’āto’a nō te tai’o.

E hina’aro rahi ato’a tō Mary ’ia ’ite atu i te hō’ē buka ’āpī tei pi’ihia te Buka o te mau fa’auera’a. Tē vai ra i roto e rave rahi ha’api’ira’a ’o tā Iesu Mesia i hōro’a ia Iosepha Semita.

Tē au ’ore nei rā vetahi mau ta’ata i te ’Ēkālesia. I te hō’ē mahana, ’ua tomo atu te mau ta’ata i roto i te fare nenei, i reira tē nene’ihia ra te Buka o te mau fa’auera’a. ’Ua tāora rātou i te mātini nene’ira’a nā te ha’amāramarama ’e ’ua hue haere i te mau ’api parau nā ni’a i te purūmu.

’Ua tāpuni Mary ’e tōna teina ’o Caroline ia rāua ’e ’ua moemoe noa. ’Ua hina’aro Mary e fa’aora i te mau ’api hou te reira ’a ’ino roa atu ai. ’Ua ri’ari’a Caroline, ’ua ’ite rā rāua ē tei ni’a i te mau ’api te parau a te Atua.

’Ua horo atu nā tuahine nā ni’a i te purūmu ’e ’ua haru mai i te mau ’api e roa’a ia rāua. ’Ua ’ite mai te tahi mau ta’ata ia rāua ’e ’ua tuō atu ia rāua ’ia fa’aea. ’Ua tāpe’a ’eta’eta maita’i Mary ’e ’o Caroline i te mau ’api ’e ’ua horo nā roto i te fa’a’apu tō papa’ā fātata mai.

E piti ta’ata tei tāpapa ia rāua. ’Ua pi’o Mary ’e ’o Caroline i raro i te repo ’e ’ua huna i te mau ’api i raro a’e i tō rāua tino. ’Ua fa’aea mū noa rāua ’a ’imi haere noa ai te mau ta’ata ia rāua.

’Aita i maoro roa, ’ua fa’aea te mau ta’ata i te ’imi ia rāua. ’Ua ora mai Mary ’e ’o Caroline ! ’Ua fa’aora rāua i te mau ’api. I teie mahana, e ’itehie teie mau ha’api’ira’a i roto i Te Ha’api’ira’a Tumu ’e te mau Fafaura’a.