E hōro’a tō ’oe tino !

’Ua rau te huru te tino ta’ata nei, te rahi, te hōho’a, te ’aravihi ’e te ’ū. E hōro’a fa’ahiahia mau nō ’ō mai i te Atua te tino tāta’itahi, ’e e tuha’a faufa’a rahi nō tāna fa’anahora’a !

’Ei fa’atura i te mau tino ato’a. ’A parau i te parau maita’i nō ni’a i tō ’oe iho tino ’e tō vetahi ’ē. E parau paha vetahi i te parau au ’ore nō ni’a ia ’oe, ’aita rā e fa’ahepora’a ’ia ti’aturi ia rātou ’aore rā ’ia rōtahi i ni’a i tā rātou mau parau.

Tō ’oe tino, e fare ïa nō tō ’oe vārua. E mea faufa’a te mea tā ’oe e tu’u i roto i tō ’oe tino ’e tō ’oe roro ! E nehenehe tātou e aupuru i tō tātou tino nā roto i te ’amura’a i te mā’a maita’i, te fa’ahā’uti’utira’a i te tino ’e te ta’oto-tano-ra’a.

E nehenehe tātou e aupuru i tō tātou vārua nā roto i te fa’aro’ora’a i te Vārua Maita’i, te purera’a ’e te mā’itira’a i te maita’i.

Nō te rahira’a o te ta’ata ’ua hau i te 200 ivi. Tē turu nei ’e tē pāruru nei tō ’oe mau ivi i tō ’oe tino. E tauturu te mau uaua ’ia hā’uti’uti, ’ia hāhaere ’e ’ia horo.

E ha’amama te mau tāpo’i pe’epe’e o te māfatu hau i te 100 000 taime i te mahana hō’ē. Nā te reira e pāmu i te toto i roto i tō tātou tino tā’āto’a.

Tē ’ohipa rahi nei tō ’oe roro nō te māramarama i te mau mea ato’a tā ’oe e hi’o, e fa’aro’o ’e e putapū. E mea pūai a’e ’e te vitiviti a’e i te hō’ē noa atu mātini rorouira.

’Ia pa’ari ’oe, e tupu tō ’oe tino i te rahi. ’Ua fa’anaho te Metua i te ao ra i tō ’oe tino ’ia taui noa i te roara’a o te orara’a !

Te mea tā ’oe e rave i tō ’oe tino, e mea faufa’a a’e ïa i te hōho’a o te reira. Tē fa’a’ohipa ra ānei ’oe i te reira nō te hāmani maita’i ia vetahi ’ē ’e ia ’oe iho, ’e nō te pe’e ia Iesu Mesia ?

’Eiaha e fa’aau i tō ’oe tino i tō te tahi atu ta’ata. ’A ha’amana’o ē, e hōro’a tō ’oe tino nō ’ō mai i te Metua i te ao ra !

పీడీఎఫ్ ను తెరవండి

Fa’ahōho’ara’a nā Jeff Harvey