« ’Eiaha e pe’e i terā ’ūrī ! » Hoa, Mē 2025, 8–9.
’Eiaha e pe’e i terā ’ūrī !
Nō roto mai ānei teie nīno’a mana’o i te Vārua Maita’i ?
E ’ā’amu mau nō te fenua Marite mai.
« E haere ana’e ! », ’ua tuō atu Lauren ’a nā mua ai ’oia i te ’ē’a marumaru.
’Ua ’ō’omo Marcie i tōna taupo’o pāruru. « Tē haere atu nei ! »
’Ua ta’ahi Marcie i tōna pere’o’o tāta’ahi haere ti’a atu i tōna mau hoa ra. Mea au roa nāna e ha’uti i te mau ha’uti rau ato’a nā muri ia Lauren ’e ia Cassidy. Hau roa atu rā, mea au roa nāna e ta’ahi i te pere’o’o tāta’ahi ’e rāua.
’A ta’ahi noa ai te mau tamāhine i te pere’o’o tāta’ahi nā te pareara [trottoir], ’ua ha’amata te ’ūrī o te fare nā pīha’i iho mai, i te pe’e ia rātou.
« ’Aita ïa », ’ua parau Cassidy. « E ti’a ia tātou e fa’aho’i iāna i te fare ! »
’Aita rā te ’ūrī e hina’aro e ho’i i te fare. ’Ua pi’i rātou iāna ’ia fa’aea, ’ua tāmau noa rā Rocket i te horohoro haere. Noa atu te mea tā rātou i rave, ’ua horo haere noa Rocket nā te mau vāhi ato’a ’e ma te tā’iri’iri i tōna ’aero. ’Ua ’oa’oa roa ïa ’oia !
’A pe’e ai te mau tamāhine ia Rocket, ’ua ’ite a’era Marcie ē, e au ra tē mātau-’ore-ri’i ra ’oia i te mau fare. Tē ātea noa atu ra ’oia i tōna purūmu mau. ’Aita ’o Marcie i mātau hō’ē a’e ta’ata e ora ra i roto i teie mau fare !
Tē haere nei mātou i hea ? ’Ua feruri Marcie. E manuia ānei au nō te ’ite mai i tō’u ’ē’a ho’ira’a ?
’Ua tāmata Marcie ’eiaha e ha’ape’ape’a ’e ’ua tāmau noa i te ta’ahi i te pere’o’o tāta’ahi ’e tōna mau hoa. ’Ua ho’i fa’ahou mai rā te nīno’a mana’o. Tē parau rā te hō’ē mea iāna ē, e ti’a iāna e ho’i i te fare.
’Ua tāpe’a Marcie i tōna pere’o’o tāta’ahi i ni’a i te pareara. ’Ua parau ’oia ma te reo pūai, « e ti’a paha ia tātou e ho’i i muri i teienei ! »
« E ti’a ia tātou e fa’aho’i ia Rocket i te fare ! » ’ua parau Cassidy. ’Ua tāmau noa Cassidy ’e ’o Lauren i te ta’ahi i te pere’o’o tāta’ahi nā muri i te ’ūrī.
Tē ’ite noa ra Marcie te huru ’ē i roto iāna. Nō te aha ’oia e ha’ape’ape’a rahi ai ? Tē putapū ra ato’a ānei tōna mau hoa i te reira ?
Penei a’e nō’u ana’e teie nīno’a mana’o, ’ua feruri Marcie. Nō ō mai ānei te reira i te Vārua Maita’i ? ’Ua bāpetizohia ’oia ’e ’ua ha’amauhia tau ’āva’e noa i ma’iri, ’e ’ua ha’api’i māmā ’e ’o pāpā iāna ’ia fa’aro’o i te Vārua Maita’i. ’Ua parau rāua iāna ē, e paraparau mai te Vārua Maita’i iāna ma te nīno’a mana’o i tōna ’ā’au ’aore rā nā roto mai i tōna ferurira’a. ’Ua ’ite Marcie e arata’i te Vārua Maita’i iāna, mai te mea e fa’aro’o ’oia i te Vārua.
’Ua putapū fa’ahou ’oia i teie nīno’a mana’o. I teienei e mea pūai roa atu ā te reira. ’Eiaha e pe’e i terā ’ūrī.
« E ho’i fa’ahou mai au », ’ua pi’i atu Marcie i tōna nā hoa.
« Nā reira ïa ! » ’Ua parau mai Lauren.
’Ua fa’ahuri Marcie iāna ’e ’ua rave fa’ahou i te ’ē’a nā reira mai ’oia i te haerera’a mai. I tōna taera’a i te fare, ’ua fa’aru’e ’oia i tōna pere’o’o tāta’ahi i ni’a i te ’aihere ’e ’ua tomo atu i roto i te fare. E ’ohipa tā māmā e rave ra i roto i te piha tunura’a mā’a.
« ’Ia ora na, māmā », ’ua parau Marcie. « ’Ua ho’i mai au i te fare. E ha’ape’ape’ara’a tei vai i roto iā’u ».
Fa’aea a’era māmā. « E aha te ’ohipa i tupu ? »
« ’Ua putapū vau i te hō’ē nīno’a mana’o o te fa’aarara’a, ’a ta’ahi ai au i te pere’o’o tāta’ahi ’e tō’u mau hoa. Nō reira ’ua ho’i mai au i te fare », ’ua parau Marcie. « I tō’u mana’o ’o te Vārua Maita’i te reira ».
Tauahi a’era māmā iāna. « Tē ’oa’oa nei au, ’ua fa’aro’o ’oe i taua nīno’a mana’o ra ».
’Ua ’ite Marcie i te au maita’i i roto iāna. « ’O vau ato’a ».
Fa’ahōho’ara’a nā Simini Blocker