Fa’ata’ara’a o te ’āmuira’a

Tauturu nō te ra’i mai

’Ua parau te peresideni Oaks nō ni’a i te mau mea tā te Metua i te ao ra i hōro’a mai ia tātou, nō te tauturu ia tātou ’ia mā’iti i te maita’i. Tō tātou tauturu pūai roa a’e ’o tō tātou ïa Fa’aora ’o Iesu Mesia. Maoti ’oia, e nehenehe tā tātou mau hara e fa’a’orehia ’e e ora fa’ahou mai tātou i muri a’e i te pohe. E hōro’a ato’a mai te Metua i te ao ra ia tātou i te mau fa’auera’a, te mau ’ōro’a ’e te mau fafaura’a, ’e te Vārua Maita’i nō te tauturu ’e nō te arata’i ia tātou.

’A pāpa’i hōho’a i te hō’ē rāve’a ’a tauturu ai te Metua i te ao ra ia ’oe !

Fātata atu ā i te Fa’aora

’Ua parau te peresideni Eyring ē i tōna ’āpīra’a, e tupu te purera’a ’ōro’a i te pō. I te hō’ē pō pōiri ’e te to’eto’e, ’ua putapū ’oia i te hō’ē māramarama ’e te māhanahana i roto i te fare purera’a ’a rave ai ’oia i te ’ōro’a mo’a. I tō rātou hīmenera’a i te mau parau o te hīmene « E te Fa’aora, ’a pārahi mai i pīha’i iho iā’u i teie pō », ’ua putapū ’oia i te here ’e te fātatara’a atu i te Fa’aora nā roto i te Vārua Maita’i.

’A pāpa’i hōho’a i te hō’ē rāve’a nō te ha’afātata atu ā ia Iesu Mesia.

Ti’aturi, riro ’ei melo, riro mai

’Ua fa’a’ite mai te tuahine Wright nāhea tātou e nehenehe ai e riro mai ’ei mau pipi nā Iesu Mesia i te roara’a o te orara’a. E nehenehe tātou e ti’aturi iāna ma te ha’api’ira’a mai nō ni’a iāna ’e te putapūra’a i te Vārua Maita’i. E nehenehe tātou e riro ’ei melo nō Iesu Mesia ’e nō tāna ’Ēkālesia ma te ravera’a ’e te ha’apa’ora’a i te mau fafaura’a. ’E e nehenehe tātou e riro mai mai iāna te huru ma te pe’era’a i tōna hi’ora’a.

Hō’ē hōro’a ta’a ’ē

’Ua parau Elder Kearon nō ni’a i te peu tumu a te ao ato’a nei nō te hōro’ara’a i te mau ō. E pūpū tātou i te mau ō, e hōro’a tātou ’e e fa’ari’i. ’Oia ato’a te mau tōrora [pingouin] e pūpū ia rātou iho i te mau ’ōfa’i ’ana’ana ’ei ō ! Hō’ē hōro’a faufa’a rahi mau a te Metua i te ao ra ’o te ’itera’a ïa ē, e mau tamāhine here-mau-hia ’e e mau tamaiti faufa’a rahi mau tātou nāna. ’Ia fa’ari’i mau ana’e tātou i teie hōro’a, e nehenehe tātou e ’ite ē ’o vai tātou ’e i te huru mau tātou i te herehia.

Hō’ē ra’i tei ’ī i te feti’a

’Ua pūhapa Elder Tai ’e tōna ’utuāfare i te hō’ē pō tei ’ī te ra’i i te mau feti’a. ’Ua ui tāna mau tamari’i nō te aha ’aita rātou e nehenehe e hi’o i te mau feti’a i tō rātou fare. ’Ua fa’ata’a atu ’oia ē, ’ua ha’afifi te vi’ivi’ira’a i te hi’ora’a i te mau feti’a. E nehenehe te mau fa’anevanevara’a ’e te mau fa’ahemara’a e ha’amohimohi i tō tātou hi’ora’a pae vārua. Ma te fa’aro’o rā, e nehenehe tātou e ’ite ē tei reira noa te Metua i te ao ra ’e ’o Iesu Mesia.