« Fa’aro’o i te Vārua Maita’i », Hoa, Māti 2025, 40–41.
Fa’aro’o i te Vārua Maita’i
« ’A parau mai na, e aha tā’u i ha’api’i i te Paraimere », ’ua parau ’o Chim.
E ’ā’amu mau nā te fenua Firipino mai.
Tē ’ara’ara marū ra te mata o Chim. ’Ua oti, e hope’a hepetoma !
« ’Ua hora, ’a ti’a mai, e tāerehia ’outou », ’ua pi’i Māmā.
Nō Chim, ’āhani e nehenehe e ta’oto maoro a’e, ’aita rā, e mahana mātete teie mahana. Tītauhia ’ia tauturu ia Māmā ’ia ho’o mai i te mā’a nō te hepetoma. Tī’a a’e ra ’e tāmā’a vitiviti atu ra.
E mea rahi tā Māmā e rave nō Chim ’e tōna nā taea’e e piti. E mea rahi roa tāna ’ohipa, ’aita e taime nō te fa’aea mai i te fare. Nā Chim ’e tōna nā taea’e e rave ’āmui i te ’ohipa i te fare. E mea ’oa’oa nā Chim ’ia tauturu atu.
I te ho’ira’a mai ’o Chim ’e ’o Māmā mai te mātete, ’ua reva Māma i te ’ohipa. ’Ia reva ’oia, e fa’aineine ’o Chim mā nō te purera’a. E fa’ata’a ’o Chim i te tīa’a, te piripou ’āvae roa ’e te ’ahu ’uo’uo e ’ō’omo nō te purera’a ananahi. Nā tōna tua’ana, ’o Robin, e tauturu iāna nō te ’āuri i tōna ’ahu ’uo’uo. I muri iho, e fa’aineine rātou i te rātou mā’a nō te pō.
Tē tāmā ra ’o Chim i te piha tūtu i te ho’ira’a mai Māmā i te fare. E au ē, ’ua rohirohi roa ’oia.
« ’Ua tae mai ’oe e Māmā. » Toro atu ra Chim i te hō’ē ’āu’a mā’a māhanahana.
’Ua ʼataʼata ’o Māmā. « Māuruuru nō te tauturura’a mai i teie mahana. E mea ’āminamina teie mā’a ! »
’Ia po’ipo’i a’e, ’ua ara ’oi’oi mai ’o Chim ’e ’ua fa’aineine nō te purera’a. E mea ’ana’anatae roa nāna ’ia fārerei i tōna mau hoa nō te Paraimere, ’e ’ia ha’api’i nō ni’a ia Iesu Mesia.
« Māmā ? » ’ua pi’i marū noa ’oia ma te pātōtō i ni’a i tōna ’ōpani. « E haere mai ānei ’oe nā muri ia mātou i te purera’a ? »
« E’ita e nehenehe », ’Ua parau Māmā. « E ’ohipa tā’u i teie avatea. »
« Nā reira ïa. » ’Ua ’oto ri’i ’o Chim. Fātata ’a tahi matahiti i teienei ’aita ’o Māmā i haere mai i te purera’a nā muri iho ia rātou. « ’A hi’o maita’i i ni’a i te purūmu ’e ’ia maita’i tō ’oe mahana », ’ua parau ’oia ia Māma.
« ’Ua ineine ? », ’ua ui tōna teina ’o Mattew.
« ’Ē ! » ’Ō’omo Chim i tōna tÏia’a ’e horo atu ra i rāpae ’e tōna nā taea’e nō te haru mai i te pere’o’o mata’eina’a.
E mana’o ’oa’oa tō Chim ’ia tomo ’oia i roto i te fare purera’a. ’Ua tāmata ’oia i te feruri ia Iesu Mesia i te taime nō te ’ōro’a. ’E i te Paraimere, ’ua fa’aitoito roa ’ino ’oia ’ia fa’aro’o i te ha’api’ira’a a te tuahine Ortega.
« I teie mahana, e ha’api’i tātou nō ni’a i te Vārua Maita’i », te parau ïa a te tuahine Ortega. « E hōro’a mai te Vārua Maita’i i te mau poro’i nō ’ō mai i te Metua i te ao ra. Mai te huru te hō’ē rātio. »
Hi’o atu ra ’o Chim i te hōho’a nō te rātio i roto i nā rima o te tuahine Ortega.
« E tere te hō’ē rātio maoti te ’apora’a i te ’aru herēti ’a taui ai i te reira ’ei ’aru ta’i e nehenehe e fa’aro’o », ’ua fa’ata’a ’oia. « Tītauhia ’ia fa’atano i ni’a i te rēni ti’a nō te fa’aro’o i te reira. Nō te fa’aro’o i te Vārua Maita’i, tītauhia ’ia tu’u i tō tātou ’ā’au ’e tō tātou ferurira’a i ni’a i te rēni ti’a. Nāhea i te rave i te reira ? »
’Ua feruri pauroa rātou. Parau atu ra Chim ē : « Nā roto i te pe’era’a ia Iesu Mesia ’e te ha’apa’ora’a i te mau fa’auera’a. »
’Ua ’ata’ata te tuahine Ortega. « Oia mau. »
I muri a’e i te purera’a, ’ua tauturu fa’ahou ’o Chim ’ia fa’aineine i te mā’a nō te pō. E mana’o māhanahana i roto iāna i te tauturura’a. ’Ua ’ite ’oia ē, nā roto i te tāvinira’a i tōna ’utuāfare, tē ha’amau ra ’oia i tōna ’ā’au i ni’a i te rēni ti’a nō te putapū i te Varua Maita’i.
’Ia ho’i Māma i te fare, ’ua haru roa Chim iāna i roto i tōna rima. Pure a’era nō te mā’a ’e tāmā’a a’era.
« ’A parau mai na, e aha tā’u i ha’api’i i te purera’a i teie mahana », ’ua parau ’o Chim. E mea au nāna ’ia parau ia Māmā nō ni’a i te Paraimere.
« E aha ra ? » ’Ua ui atu māmā.
« ’Ua ha’api’i mātou nō ni’a i te Vārua Maita’i », ’ua parau Chim. « Mai te huru te hō’ē rātio. ’Ia ha’apa’o tātou i te mau fa’auera’a, e nehenehe tātou e tāviri i tō tātou ’ā’au i ni’a i te rēni ti’a nō te fa’aro’o iāna. »
’Ua tā’iri’iri te upo’o o māmā. « ’Aita atu ai. E aha ïa te hi’ora’a nō te ha’apa’ora’a i te mau fa’auera’a ? »
’Ua ’ata’ata ’o Chim. « Tauturu i tō ’oe māmā ! » ’Ata atu ra ’oia. « ’Ua here au ia ’oe, Māmā ! »
Fa’ahōho’ara’a nā Uran Duo