Te semeio nō te faraoa pa’apa’a

Tē puhi ra te mata’i to’eto’e, ’e farara te hiona nā ni’a i te pere’o’o pūtō. ’Ua huti ’o Jane i tōna ’ahu ta’oto iti i ni’a i tōna tapono. ’Ua oti roa tōna ’āvae, ’ua tāmau noa rā ’oia i te haere. Tē haere ra rātou i te ’oire nō Roto Miti, i Utah.

’Ua ha’api’i mai ’o Jane ’e tōna ’utuāfare i te parau nō ni’a Te ’Ēkālesia a Iesu Mesia i te Feiā Mo’a i te mau Mahana Hope’a nei i te fenua Peretāne. I tō te peropheta anira’a i te mau melo o te ’Ēkālesia ’ia haere mai i Utah, ’ua fa’aherehere tōna ’utuāfare i te moni ato’a tā rātou e nehenehe nō te tere. ’Ua fano rātou nā ni’a i te moana. I teienei rā, tē rātere nei rātou nā te mau fenua pāpū ’e tō rātou pere’o’o pūtō. E rave rahi ’āva’e tō rāua hāhaere-noa-ra’a, ’e tē haere pau ra te mā’a.

E roimata i tahe i ni’a i te pāpāri’a o Jane. « ’Ua po’ia roa vau », tāna i parau i tōna tua’ane ia Thomas. « ’Ia mana’o vau, ’ua oti roa tō’u ’āvae ! »

Tāpū ihora Thomas i te tahi ’iri mātaratara i ni’a i te huira o te pere’o’o. « Terā, ’a mama i teie », ’ua parau atu ’oia. « E maita’i ri’i mai ’oe. »

« Māuruuru », ’ua muhumuhu atu Jane ’a mama ai i teie ma’a ’iri pa’ari.

Ē, taime atu ra nō te pūhapara’a o te pō. Reva a’era te tahi mau tāne e a’ua’u i te pua’atoro ’āfi’i raharaha. ’Ua ti’aturi noa ’o Jane ē, e noa’a mai te tahi. Māuiui tōna ’ōpū nō te mā’a ’ore. ’A tīa’i noa ai, ’ua ha’aputuputu Jane ’e tōna ’utuāfare ’ati a’e i te hō’ē auahi iti, ma te rohirohi ’e te po’ia ’e te to’eto’e.

« Pure ana’e », ’ua parau ’o Jane.

Tūturi ’āmui a’era te ’utuāfare, e pure atu ra te metua vahine. « E te Metua i te ao ra, ’aita tā mātou mā’a nō teie pō. E tauturu mai na. »

Pārahi mū noa a’e ra ’o Jane ’e tōna nā taea’e ’e tuahine nō te hō’ē taime. Pe’e a’era te upo’o o Māmā i ni’a.

« E aha terā ? » ’Ua ui atu Thomas.

« Tē ha’amana’o ra vau i te hō’ē mea. » Horo a’era Māmā i te pere’o’o pūtō ’e fa’ahāmama a’era i te ’āfata a te ’utuāfare. E ’āfata iti ’āuri tāna i rave mai, e fa’ahāmama atu ra. E piti faraoa pa’apa’a pa’ari i roto. E toe’a mā’a nō tō rātou tere nā ni’a i te moana e rave rahi ’āva’e nā mua atu.

E ’ana’anatae rahi i roto ia Jane. E mā’a tā rātou ! « E nehenehe e vāhi i te reira ’ei tuha’a na’ina’i nō te ’ōpere », ’ua parau ’oia.

I te tāmatara’a rā, e mea pa’ari roa nā faraoa pa’apa’a nō te vāhi nā rōpū.

« E tāmata tātou i teie », ’ua parau ’o Māmā. Tu’u atu ra i nā faraoa pa’apa’a i roto i te hō’ē pāni ’e mani’i ihora ma’a pape nā ni’a. Tāpo’i atu ra ’e tu’u ihora i te reira i ni’a i te ’arahu.

Pure fa’ahou atu ra ’o Jane ’e tōna ’utuāfare. Mana’o ihora ’oia i te ’ā’amu o Iesu Mesia i roto i te mau pāpa’ira’a mo’a, i tōna fa’a’amura’a e pae tauatini ta’ata ma te tahi no’a faraoa iti ’e te i’a. I ’ite ’oia ē, e nehenehe ato’a te Metua i te ao ra e tauturu ia rātou.

I muri ri’i mai, ’ua heheu marū ’o Māmā i te pāni. ’Ua ’ī roa te reira i te mā’a fātata i te mani’i ! ’Ua nava’i roa nō te fa’a’amu i tōna ’utuāfare tā’āto’a.

Haru atu ra ’o Jane i tōna māmā i roto i tōna rima. « E semeio ! »

Fa’ahōho’ara’a nā Simini Blocker