« 5 rāve’a nō te fa’aruru i te ’āehuehu rahi », Hoa, Māti 2025, 38–39.
5 rāve’a nō te fa’aruru i te ’āehuehu rahi
E mea pa’ari te orara’a i te tahi taime ! Te ’āehuehu rahi, mai te ’oto ’e te pe’ape’a, e tuha’a ïa nō tō tātou orara’a i ni’a i te fenua nei.
I roto i te mau pāpa’ira’a mo’a, tē ha’api’i nei tātou ē, ’ua ’oto ato’a te Fa’aora i te tahi taime (hi’o Ioane 11:32–36). ’Ua mamae Iesu Mesia i te mau huru māuiui ato’a. Maoti te reira, ’ua ’ite pāpū ’oia i tō ’outou mana’o. ’Ua ’ite pāpū ato’a ’oia nāhea i te tauturu ia ’outou. (Hi’o Alama 7:11–12.)
Teie e pae mea ’o tē tauturu ia ’outou ’ia topa ana’e te mōrare.
1
Pure i te Metua i te ao ra nō te tauturu.
’Ia pure ’outou nō te tauturu, e nehenehe te Metua i te ao ra ’e ’o Iesu Mesia e arata’i ia ’outou (hi’o Alama 37:36–37). ’Ua here rāua ia ’outou, ’ua hina’aro rāua e tauturu mai !
2
Ha’amana’o ē ’ua herehia ’outou.
Tē ha’api’i nei te mau pāpa’ira’a mo’a ē « e faufa’a rahi tō te mau vārua ta’ata i mua i te aro o te Atua » (Te Ha’api’ira’a Tumu ’e te mau Fafaura’a 18:10). Te aura’a ra, ’ua herehia ’outou ’e e mea faufa’a ’outou nō te Metua i te ao ra !
3
Haere nā rāpae !
’Ua hāmani te Metua i te ao ra ’e ’o Iesu Mesia i teie nei ao nehenehe nō tātou. E tauturu te ha’utira’a nā rāpae i te ha’amaita’i ’e i te ha’apūai i te ea, ’e e nehenehe ato’a te reira e fa’atupu i te mana’o maita’i ’e tāmarū ā i te tino.
4
Pāpa’i e aha tō ’outou mana’o.
E nehenehe te tāpe’ara’a i te hō’ē buka ’ā’amu e tauturu ia ’outou ’ia ha’amana’o i te mau ha’api’ira’a tā ’outou e ’apo mai i roto i te orara’a. E nehenehe ato’a te reira e tauturu ia ’outou ’ia māramarama maita’i a’e i te mea tā ’outou e fa’ari’i ra.
5
Paraparau i te hō’ē ta’ata pa’ari ti’aturihia.
’Ia paraparau ’outou i te hō’ē ta’ata nō ni’a i tō ’outou mana’o, e nehenehe rātou e tauturu mai i te fa’aha’amana’o i tō ’outou huru ta’a ’ē. E nehenehe ato’a rātou e tauturu ia ’outou ’ia ’ite e nāhea i te tītau i te tauturu e hina’arohia.
I te tahi taime, noa atu ā te ravera’a i teie mau mea, e ’oto noa ā paha ’outou. Pēnei a’e e tītauhia ’ia paraparau i te hō’ē taote nō te tauturu ’ia maita’i ri’i mai ’outou. ’E e nehenehe noa ato’a e ani i te hō’ē ha’amaita’ira’a autahu’ara’a. Noa atu te mau mea, e ’ere ’o ’outou ana’e tō ’outou vaira’a ! ’Ua here te Metua i te ao ra ’e o Iesu Mesia ia ’outou. Tē hina’aro nei rāua e ha’amaita’i ia ’outou ’e e tauturu ia ’outou.
Fa’ahōho’ara’a nā Stephanie MacKay