Hīmene ’ē atu i te mau ata

« Hora ta’otora’a teie », ’ua parau Māmā ma te mata ’ata’ata.

Haere a’era Logan i roto i tōna piha. ’Ua fa’aoti i tāna pure ’e ’ua ne’e i roto i tōna ro’i. ’Ei reira Māmā e tai’o ai iāna i te hō’ē ’ā’amu. Piri marū noa a’era tōna mata. Ē ’aita i maoro roa, ’ua ta’oto.

Ri’a a’era tōna ta’otora’a. Teie atu ra ’o ’oia ana’e i roto i te pōiri. E tūpāpa’u tāna i ’ite ma te niho rahi roa ’ino. ’Ua fe’u i ni’a iāna. ’E ’ua ha’amata ihora i te a’ua’u mai iāna !

’Ua tāmata Logan i te horo. ’Ua he’e rā ’oia ’e topa atu ra ! Piri roa mai te tūpāpa’u iāna, e ti’apa’i roa mai—

Ara mai nei ’o Logan, ’e pārahi mai nei i ni’a i tōna ro’i. ’Ua tāmarō ’oia i tōna roimata ’e ’ite atu ra tē pōiri noa ra i rāpae.

’Ua hina’aro ’oia e paraparau i tōna nā metua nō teie moemoeā. ’Aita rā i hina’aro e fa’aru’e i tōna ro’i. Nō te pōiri, i mana’o ’oia ē e tūpāpa’u e tāpuni ra nā reira. E mea huru ri’ari’a te mau ata. ’E te ’ūrī e aoa ra nā rāpae, mai te huru ïa te hō’ē tūpāpa’u e fe’u ra.

Huti mai nei i te ’ahu ta’oto i ni’a i tōna mata. Nō tōna ri’ari’a ’aita ’oia i ha’uti a’e.

’O tōna noa hina’aro te ta’oto-fa’ahou-ra’a. Terā rā, i te mau taime ato’a e tāpiri ’oia i te mata, e tūpāpa’u mata riri ’e te niho ’oe’oe tā e ’ite. E vai noa tōna mata i ni’a i terā nā ata ri’ari’a.

’ite a’era ’oia i te hō’ē hōho’a i ni’a i te ’aira’amā’a i tōna ro’i. E hōho’a nōna, ’e tōna nā taea’e, ’e ’o Pāpā ’e ’o Māmā i rāpae i te hiero nō Monterrey (Mēhiko). E mata ’oa’oa tō rātou.

I taua iho taime ra, ’ua puta mai nei i roto i tōna upo’o te mau parau o tāna hīmene Paraimere au roa a’e. « Oh, j’aime voir le temple [’Ia hi’o vau i te hiero] », ’ua ha’amata atu ra Logan i te hīmenemene. « I reira e tae au. Ma te vārua mo’a. »*

’A hīmene noa ai, ’ua feruri Logan i terā mahana i te hiero ’e tōna ’utuāfare. E mana’o hau rahi ho’i tōna. Maoti te hiero, e ti’a iāna ’ia pārahi ’e tōna ’utuāfare ē a muri noa atu.

’Aita ’o Logan i fa’aro’o fa’ahou i te ’aoa o te ’ūrī nā ni’a atu i tōna reo. ’Ua tāpiri i tōna mata ma te hīmenemene noa. « I tō’u tamari’ira’a, ’ua ha’apii au i teie parau mau : E mea mure ’ore te ’utuāfare. » E mana’o hau tei tae mai i tōna ’ā’au tei fa’a’ata’ata iāna. ’Ite a’era ’oia ’aita e tūpāpa’u.

’Ua pōiri ’e ’ua ri’ari’a na te piha. I teienei rā, e vāhi hau ’e te ataata ’ore. Tārava atu ra Logan i ni’a i tōna tūru’a ’e ta’oto atu ra ma te hau.

I te arara’a ’oia, e mahana nehenehe i rāpae. Ti’a mai nei ’e hi’o atu ra i te ’ānapanapa o te mahana i ni’a i tāna hōho’a nō te hiero. ’Ua ha’amāmā ’oia i tāna hīmene au roa a’e ’a fa’aineine ai ’oia nō te purera’a.

I ni’a i te purūmu nō te purera’a, ’ua fa’ati’a ’oia i tōna ’utuāfare nō ni’a i tōna rereioa ’e te hīmene tāna i hīmene. ’Ua fa’aro’o ’oia i te mau a’ora’a ’e ’ua hīmene ’oia i te mau hīmene i te purera’a. E taime atu ra nō te haere i te Paraimere.

E mea au nā Logan ’ia fa’aro’o i te piāna. E i teienei, ’ua ’ite ’oia ē, e mau hīmene tei nava’i te pūai nō te tīahi i te mau tūpāpa’u ri’ari’a.

« Mānava i te taime hīmenera’a », ’ua parau te fa’atere o te Paraimere. « E aha te hīmene tā tātou e hīmene nā mua ? »

« ’Ua ’ite au ! », ’ua parau Logan, ma te ’āfa’i i tōna rima i ni’a roa. « Hīmene ana’e ‘Oh, j’aime voir le temple’. »

Fa’ahōho’ara’a nā Carolina Farías