Te mana’o ’oto

’Ua huti Savannah i te mau ’ahu ta’oto i ni’a i tōna upo’o. E mahana au ’ore mau teie.

I te fare ha’api’ira’a i teie mahana, ’aita i roa’a ia Savannah ’ia rōtahi i ni’a i te hō’ē a’e mea. E mana’o rohirohi ’e te ’ino’ino ’e te ’oto. Mai te huru e teiaha i tōna ’ā’au e’ita e ’ore. I te hope’a o te mahana, hō’ē mea noa tāna e hina’aro, te mehora’a i raro a’e i te hō’ē mea.

I te mau mahana i ma’iri, e mana’o ’oto tō Savannah fātata pauroa te taime. ’Ua tāmata tōna mau hoa i te fa’aitoito iāna, e taime rā ’aita ’o Savannah i hina’aro e haere nā muri ia rātou. E au ra e mea ’oa’oa noa rātou. I te tahi taime, ’ua mana’o ’oia ē, e mea ’oa’oa a’e nō rātou ’aita ana’e ’oia.

E aha tō’u ? ’Ua uiui te mana’o o Savannah. Nō te aha e’ita e nehenehe iā’u ’ia ’oa’oa mai te tahi atu mau ta’ata ?

E mana’o to’eto’e ’e te mo’emo’e tōna mai te mau ata rumaruma i rāpae. I teienei rā, te mea noa tāna i hina’aro, e ta’oto ïa.

Fa’aro’o ihora Savannah i te ’ūputa o tōna piha ta’otora’a.

« Savannah », ’ua parau māmā, ma te pārahi i te hiti ro’i, « e aha te fifi ? »

« ’Aita », ’ua parau Savannah. « ’Ua rohirohi au. »

« ’Ua pāpū ia ’oe ? » ’Ua ui atu māmā. « Tē ha’ape’ape’a nei au nō ’oe. »

« ’Eiaha e ha’ape’ape’a », ’ua parau Savannah.

« Nā reira. » Tiʼa a’era te māmā. « Ha’amana’o, e nehenehe tā ’oe e parau mai, noa atu te mea. ’Ua here au ia ’oe. »

’Ua fa’aea noa ’o Savannah i roto i te ro’i ē tae noa ai te taime tāmā’ara’a ahiahi. ’Aita i topa te ta’oto i terā pō. E feruri fa’aea ’ore tōna roro i te mau mea ato’a.

’Ia po’ipo’i a’e, terā noa iho ā mana’o fiu. E mahana haumani fa’ahou ā. ’Ua ho’i Savannah i te fare i muri i te ha’api’ira’a ’e ’ua pārahi i ni’a i te ’aira’amā’a o te piha tūtu. E mana’o autā i te fā’aora’a nā roto i te ha’amāramarama. Tē topa fa’ahou ra te hiona.

« Savannah ? »

Fāriu a’era ’o Savannah ’e ’ua māere ’oia i te ’itera’a ia Māmā’ū i te tomora’a i roto i te piha.

« Hey, Māmā’ū », ’ua parau Savannah. « ’Ua haere mai ’oe ? »

Pārahi ihora Māmā’ū. « Nā tō ’oe māmā i ani mai iā’u ’ia haere mai », tāna i parau. « Tē ha’ape’ape’a nei ’oia nō ’oe. »

« ’Aita, ’ua rohirohi noa vau. Mea maita’i rā vau », ’ua parau atu Savannah.

’Ua ’ata’ata ri’i Māmā’ū. « ’Ua fa’ati’a a’enei au ia ’oe nō ni’a i te tau ve’ave’a ’ua fa’anu’u mai māua Pāpā’ū ? »

« ’Aita vau e mana’o ra », ’ua parau Savannah.

« ’Ua ’oto roa vau i te mau taime ato’a », ’ua parau Māmā’ū. « Tē vai ra tō’u hia’ai ’ia ’oa’oa, ’aita rā vau i au i te mau mea. E mana’o mo’emo’e rahi tō’u. »

« Tei reira ho’i ’o Pāpā’ū ’e tō’u māmā. » Pi’o a’era te mata o Savannah i ni’a i tōna tīa’a. « E aha pa’i terā mana’o mo’emo’e ? »

« ’Aita i noa’a iā’u ’ia ’ite e aha tē tupu ra », ’ua parau Māmā’ū. « ’Aita a’enei te reira mana’o i te mātāmua ra. I te hope’a, ’ua haere au i te taote. »

« E aha tei tupu ? »

’Ua tauahi atu ra Māmā’ū iāna. « ’Ua ha’api’i mai au ē, e ’aravī tō’u. »

« Ah, e mana’o ’oto noa ïa tō ’oe ? » ’Ua ui Savannah.

« ’Aita, ’ua hau atu te ’aravī i te mana’o ’oto noa », ’ua fa’ata’a Māmā’ū. « Mai te huru ra ē ’aita tō’u mana’o ’oto e ’ore. E mea fifi nō’u ’ia rave i te mau mea ato’a tā’u i mātau i te rave. ’E e mea fifi roa nō’u ’ia nati ’e te tahi atu mau ta’ata, ’oia ato’a tō’u iho ’utuāfare. Tītau-mau-hia te tahi tauturu. »

Hi’o a’era te mata o Savannah i ni’a. « E aha terā tauturu ? »

« ’Ua fa’ata’a mai te taote e aha te fifi, ’e ’ua fa’anaho ’āmui māua i te hō’ē rāve’a nō te tauturu iā’u ’ia maita’i a’e », ’ua parau Māmā’ū. « I te tahi rā mau taime, ’ua vai noa terā mana’o ’oto. E rave rahi taime tō’u purera’a. I tō’u vai-mo’emo’e-ra’a, ’ua feruri au tē pārahi ra te Fa’aora i pīha’i iho iā’u. ’Ua maita’i mai tō’u mana’o i te ferurira’a iāna. »

Hi’o Savannah i te hiona i rāpae ’e rurutaina ihora. « E mana’o ’oto ato’a tō’u. Tē tamata nei au i te fa’atupu i te mana’o ’oa’oa, i te tahi rā taime, e’ita e nehenehe, ’e e riri ïa vau iā’u iho nei nō terā mana’o. »

« ’Ua ’ite au ta’u poe iti. » Tauahi Māmā’ū ia Savannah. « Terā ato’a tō’u mana’o i te tahi taime. E ’ere rā ’o ’oe ana’e i tō ’oe vaira’a. ’Ua here au ia ’oe, ’ua here tō ’oe nā metua ia ’oe, ’e ’ua here te Metua i te ao ra ’e ’o Iesu Mesia ia ’oe. ’Ua māramarama rātou i tō ’oe māuiui, ’e e’ita roa atu rātou e fa’aru’e ia ’oe. »

Pēnei a’e ’ua tano ’o Māmā’ū, ’ua mana’o Savannah. E ’ere ’o vau ana’e tō’u vaira’a. Māmā ri’i mai nei te teiaha o te ’ā’au o Savannah.

« ’Ia mana’o vau, e paraparau vau ia Māmā », ’ua parau Savannah. « ’Ua hina’aro ato’a ’oia e tauturu iā’u. »

« E mana’o maita’i roa te reira. » Tāpe’a Māmā’ū i te rima o Savannah.

’Ua ’ata’ata Savannah ’e ’ua pi’o i ni’a i te tapono o Māmā’ū. ’Aita fa’ahou terā mana’o to’eto’e rahi ’e te mo’emo’e.

Fa’ahōho’ara’a nā Marina Pessarrodona