Ang Labing Nindot nga Gasa sa Tanan

Si Jessica gikulbaan nga wala mahimutang diha sa sakyanan paingon ngadto sa ward sa iyang iyaan ug uyoan. Pipila na lang ka adlaw Pasko na, apan wala niya gibati nga magsaulog.

Sa sayong bahin nianang semanaha adunay sunog sa iyang balay. Luwas ang tanan, apan nadaot ang ilang panimalay. Daghan sa ilang mga butang naguba. Si Jessica ug ang iyang mama, igsoon nga lalaki, ug duha ka igsoon nga mga babaye mibalhin ngadto sa iyang uyoan ug iyaan hangtod maayo ang ilang balay.

Mipahiyom ang iyaan ni Jessica kaniya. “Nasayod ko nga maaduna kay nindot nga panahon sa among Primary,” miingon siya.

Dili kaayo segurado si Jessica. Gikulbaan siya nga moadto sa lahi nga Primary. Wala man koy nailhan, naghunahuna siya. Mabination kaha sila kanako?

Gisulayan ni Jessica nga dili maghunahuna mahitungod sa sunog samtang milakaw siya paingon sa Primary. Gigunitan niya ang kamot sa iyang gamay nga ig-agaw nga si Sam ug gitabangan siya nga makakita sa iyang lingkoranan. Ang Primary nanganta og mga awit sa Pasko mahitungod kang Jesus. Naghunahuna si Jessica mahitungod kon sa unsang paagi si Jose ug Maria nahilayo sa ilang panimalay sa dihang natawo si Jesus. Naghunahuna siya kon gibati nila nga nahisalaag ug nag-inusara, sama sa iyang gibati karon.

Sa dihang panahon na alang sa klase, mas gikulbaan pa si Jessica. Laing batang babaye ang mipahiyom kaniya. “Kumusta, ako si Anna. Ganahan kang molingkod tupad nako sa klase?”

Mibalos og pahiyom si Jessica. “Sige.”

Sa klase ilang gibasa ang mga kasulatan mahitungod sa panahon nga natawo si Jesukristo. Ang magtutudlo, si Sister Rios, miingon nga ang Manluluwas mao ang labing nindot nga gasa sa Langitnong Amahan ngadto sa kalibotan. “Kay gihigugma pag-ayo sa Dios ang kalibotan ug tungod niini gihatag niya ang iyang bugtong Anak,”^* iyang gibasa ngadto sa klase.

Wala gayod maghunahuna sukad si Jessica mahitungod ni Jesus isip usa ka gasa kaniadto. Naghunahuna siya mahitungod sa ilang mga regalo sa Pasko nga nadaot sa sunog. Ganahan kaayo siya nga makakuha og mga regalo ug naguol nga nawala na ang iyang mga regalo. Apan mas gihigugma pa gayod niya si Jesus ug nasayod nga dili gayod Siya mawala.

Sa kataposan sa klase, gipagawas ni Sister Rios ang pipila ka gagmay nga mga kahon gikan sa iyang bag. Ang matag usa adunay usa ka gamay nga kinulit nga batang Jesus.

“Ako adunay usa ka gasa alang sa matag usa kaninyo.” Gisugdan ni Sister Rios ang pagpasa sa mga kahon. “Kini makatabang kaninyo nga makahinumdom nga gihigugma kamo pag-ayo sa Dios nga Iyang gipadala ang Iyang Anak alang kaninyo.” Dayon mitan-aw siya ni Jessica. “Jessica, pasayloa kaayo ko. “Ako walay gasa para kanimo. Wala ko nakahibalo nga moanhi ka dinhi.”

Miduko si Jessica nga gitan-aw ang iyang mga kamot ug naningkamot nga dili mohilak. Wala usab siya nakahibalo nga moanhi siya dinhi. Naghandom siya nga naa ra siya sa iyang kaugalingon nga panimalay, sa iyang kaugalingong klase sa Primary alang sa Pasko.

Diha dayon, dunay usa ka tawo nga mibutang og kahon diha sa iyang paa. Mihangad siya ug nakakita ni Anna nga nagpahiyom kaniya. “Malipayong Pasko! Imoha na kining akoa.”

Malumo nga gihikap ni Jessica ang gamay nga dulaan nga batang Jesus. “Salamat! Malipayong Pasko usab kanimo!”

Human sa simba, gigakos siya ni Mama. “Kumusta man ang Primay?” nangutana siya.

Maayo! Nakadawat ko niini isip usa ka regalo.” Mipahiyom si Jessica. “Ug nakat-onan nako nga si Jesus ang labing nindot nga gasa sa tanan.”

Mga paghulagway pinaagi ni Shawna J. C. Tenney