Ang Prinsipe sa Kalinaw

Ni Presidente Dallin H. Oaks

Unang Magtatambag sa Unang Kapangulohan

Gikuha gikan sa Facebook, Dis. 8, 2019, ug Dis. 13, 2023, facebook.com/dallin.h.oaks.

Niining panahon sa Pasko, ang tibuok Kristiyanong kalibotan nagsaulog sa pagkatawo ni Jesukristo, ang “Prinsipe sa Kalinaw.” (Isaias 9:6). Kita maghunahuna mahitungod sa Iyang pagkatawo, sa Iyang kinabuhi, ug sa Iyang misyon. Sa Iyang kataposang instruksiyon, si Ginoong Jesukristo misulti sa Iyang mga Apostol, “Ang kalinaw ibilin ko kaninyo. Ang akong kalinaw nga dili sama sa ikahatag sa kalibotan ihatag ko kaninyo. Ayaw kamog kabalaka ug ayaw kahadlok” (Juan 14:27).

Kalinaw ang saad sa atong Manluluwas, ug kalinaw ang atong tumong. Samtang magtuman kita sa mga sugo sa Dios, makabati kita niana nga kalinaw.

Samtang atong saulogon kining Pasko, ako molaom nga kamo mapanalanginan sa kalinaw diha sa inyong kasingkasing ug gugma alang niadtong naglibot kaninyo.

Pagpakigbahin sa Kalinaw sa Manluluwas

Kamo makapakigbahin sa gugma ug kalinaw ni Jesukristo! Sa 12 ka adlaw padulong sa Pasko, pagpili og kalihokan nga buhaton uban sa inyong pamilya. Dayon kolori ang usa ka dayandayan.

Paghimo og sekreto nga buhat sa pagserbisyo.
Tawagi ang usa ka higala o sakop sa pamilya nga nagpuyo sa layo.
Pakigbahin og paborito nga meryenda o mga pagkaon.
Ipakigbahin ang Higala ngadto sa usa ka higala.
Pagdrowing og usa ka hulagway aron ihatag sa usa ka tawo.
Magdungan og panganta sa usa ka kanta sa Pasko.
Magbasa og usa ka kasulatan mahitungod ni Jesus.
Mobisita og usa ka tawo nga nag-inusara.
Mopadala og kard sa Pasko ngadto sa usa ka misyonaryo.
Magdungan sa pagbasa og usa ka istorya sa Pasko.
(Pagsulat og imong kaugalingon)
(Pagsulat og imong kaugalingon)