Mga Kandila sa Bisperas sa Pasko

Si Joska ug ang iyang pamilya hilom nga milakaw agi sa snow. Bisperas kadto sa Pasko, ug sila naghimo sa usa sa ilang paborito nga mga tradisyon. Matag tuig, ang mga tawo sa Finland mibisita sa sementeryo aron managkot og mga kandila sa mga lubnganan sa ilang mga minahal.

Daghang hayag sa mga kandila ang mikidlapkidlap diha sa ngitngit. Bisan og tugnaw kadto, kini nakahimo sa sementeryo nga medyo init nga pamation ug malinawon.

Ang mga ginikanan ni Joska migiya kanila ngadto sa usa ka lubnganan. “Kinsa kini?” ang ilang gamayng manghod, si Aasa, nangutana.

“Mao kini akong uyoan,” miingon si Mama.

Si Turo, ang maguwang ni Joska, mitudlo sa petsa sa lapida. “Natawo siya kapin na sa usa ka gatos ka tuig ang milabay!”

“Oo. Apan kabahin gihapon siya sa atong pamilya.” Mikuha si Mama ug usa ka kandila. “Ganahan ka modagkot niini, Joska?”

Mitando si Joska ug midagkot sa kandila. Dayon mainampingon siya nga mibutang og usa ka puthaw nga tabon nga adunay mga lungag sa ibabaw niini. Mosalipod kini sa hangin aron dili mapalong ang siga. Gibutang niya ang kandila diha sa yuta atubangan sa lubong. Ang humok, nag-amag nga kahayag nindot nga tan-awon.

Miadto sila sa sunod nga lubong sa pamilya. Gigunitan ni Joska ang kamot ni Aasa samtang sila naglakaw.

“Nganong magdagkot man kita og mga kandila sa mga lubong?” nangutana siya.

“Tungod kay importante nga mahinumdom sa atong mga sakop sa pamilya,” miingon siya.

“Bisan kon nabuhi sila gatosan na ka tuig ang milabay?” Nangutana si Aasa.

“Oo,” miingon si Papa. “Ang tanan sa atong mga iyaan, mga uyoan, ug mga kaig-agawan, ug mga apohan kabahin sa atong pamilya. Kitang tanan usa ka dakong pamilya tungod ni Jesukristo.”

Mikuha si Mama og lain pang kandila. Si Turo mitabang ni Aasa sa pagdagkot niini.

“Apan nganong magdagkot man kita sa kandila sa Pasko?” Nangutana si Aasa.

Si Joska naghunahuna og mga pila ka minuto. Makadagkot man sila og mga kandila sa sementeryo sa bisan unsang adlawa. Nganong Bisperas sa Pasko?

“Tingali tungod kay si Jesus ang Kahayag sa Kalibotan,” miingon si Joska.

Mipahiyom si Mama. “Nindot kana nga tubag. “Tingali husto ka.” Mitabang siya ni Aasa sa pagbutang sa iyang kandila sa snow tupad sa lubong. “Tungod kini ni Jesukristo nga kita mahimong makauban sa atong pamilya hangtod sa kahangtoran. Ug Tungod kay Siya nabuhi pag-usab, kitang tanan mabuhi pag-usab.”

Silang tanan miatras aron motan-aw sa mga hayag sa kandila. Ang tibuok sementeryo mikidlapkidlap sama sa napuno sa mga bitoon.

Ang kasingkasing ni Joska mibati og kainit samtang sila milakaw og balik ngadto sa sakyanan. Sa dihang nakauli na sila sa panimalay, ilang ablihan ang mga regalo ug magdula og mga dula. Apan karon, si Joska nalipay nga siya nakasinati og hilom nga higayon uban sa iyang pamilya. Siya kanunayng mapasalamaton sa kahayag ni Jesus.

Mga paghulagway pinaagi ni Flavio Remontti