Paghinumdom kang Jesus

Mitan-aw si Victoria sa samin samtang si mama nagsudlay sa iyang buhok. Hapit na ang oras aron molakaw padulong sa Simbahan.

“Nganong moadto man kita sa simbahan?” Nangutana si Victoria.

Gibutang ni Mama ang sudlay. “Moadto kita sa simbahan aron moambit sa sakramento ug magkat-on mahitungod ni Jesukristo.”

“Apan ngano man?” Nangutana si Victoria.

“Ang pan ug ang tubig motabang kanato sa paghinumdom kon sa unsang paagi nag-antos ug namatay si Jesus alang kanato,” miingon si Mama. “Kon kita mokaon sa sakramento, kita mahinumdom sa tanang maayong butang nga Iyang gibuhat. Ug kita mosaad sa pagpaningkamot sa pagbuhat usab og maayo nga mga butang.”

Mipahiyom si Victoria. “Mao nga mahimo kitang sama kita ni Jesus!”

“Sakto kana!” Mitabang si mama ni Victoria sa pagsul-ob sa iyang sapatos. “Ang pagpaningkamot nga mahisama ni Jesus makapahimo kanato nga malipayon.”

Sa simbahan si Victoria hilom nga naglingkod uban ni Mama ug Papa. Sa wala madugay oras na alang sa sakramento. Giduko niya iyang ulo ug naminaw sa pag-ampo.

Dayon si mama mikuha og usa ka libro sa iyang bag. “Kini usa ka espisyal nga libro,” mihunghong siya. “Makatabang kini kanimo nga mahinumdom sa Manluluwas atol sa sakramento.”

Giablihan ni Victoria ang libro. Kini adunay daghang mga hulagway ni Jesukristo. Usa ka hulagway nagpakita Kaniya isip usa ka batang gamay sa usa ka pasongan. Lain nagpakita Kaniya nga gibunyagan. Nakahinumdom si Victoria niana nga istorya gikan sa Primary. Siya mabunyagan usab usa ka adlaw!

Gitunol ni mama ang tray sa pan. Sa matinahoron nga paagi mikuha si Victoria og usa ka piraso. Dayon mitan-aw siya og balik sa iyang libro. Sa sunod nga pahina dihay usa ka hulagway ni Jesus nag-ampo sa tanaman. Nakahibalo si Victoria nga Siya nag-antos alang sa mga sala sa tanan ug mibati sa ilang kasakit ug kasub-anan. Siya naghigugma gayod kanato og maayo, naghunahuna siya.

Gipadayon ni Victoria sa pagpakli ang mga pahina. Daghang mga hulagway nga nagpakita nga si Jesus mitabang sa uban. Sa usa ka hulagway, Siya nagtudlo sa katawhan. Sa lain pang usa, Siya nag-ayo sa buta nga lalaki. Aduna pa gani usa nga bahin Kaniya uban sa mga bata.

Sunod oras na para sa tubig. Giduko ni Victoria ang iyang ulo atol sa pag-ampo. Dayon gipasa ni mama ang iyang tray.

Gikuha ni Victoria ang gamay nga tasa sa tubig ug giinoim. Naghunahuna siya mahitungod ni Jesus nga naghigugma sa uban. Usa ka mainiton nga pagbati mipuno sa iyang kasingkasing. Gusto usab siya nga magmabination ug mahigugmaon.

“Ma, gusto ko nga mahisama ni Jesus,” mihunghong si Victoria.

Mipahiyom si Mama. “Kana nakapalipay nako. Ug ako nasayod nga kini makalipay usab Kaniya.”

Mipahiyom usab si Victoria. Gihigugma niya si Jesukristo. Gusto siya nga kanunayng mohinumdom Kaniya.

Mga paghulagway pinaagi ni Tammie Lyon