Gusto ni Bjorn nga Mahimong usa ka Anghel

Nagtan-aw sa palibot si Bjorn sa tanang dagko nga karton nga mga kahon diha sa iyang bag-o nga panimalay. Ang iyang pamilya bag-o lang mibalhin gikan sa Argentina ngadto sa Estados Unidos.

Makahadlok ang mobalhin og layo kaayo. Ang tanan dili pamilyar. Apan nasayod siya nga kon kauban siya sa iyang pamilya, ang tanan mahimong OK ra.

Samtang gitabangan ni Bjorn ang iyang pamilya sa paghabwa, gipunit ni Mami ang usa ka dako nga kahon ug mipahiyom. “Anaa niini ang atong mga dekorasyon sa Pasko!” miingon siya.

Mipahiyom si Bjorn. Ganahan kaayo siya sa Pasko ug mahinamon nga saulogon kini uban sa iyang pamilya. Gikulbaan gihapon siya mahitungod sa pagpuyo diha sa usa ka bag-o nga dapit, apan sa pagkahibalo nga hapit na ang Pasko nakapalipay kaniya.

Pipila ka adlaw ang milabay, ang pamilya ni Bjorn magkaubang nanglingkod alang sa usa ka leksiyon sa home evening mahitungod sa Pasko. Gipasabot ni Papi nga kini mao ang panahon alang sa paghatag og mga gasa.

“Yehey! Mga regalo!” Miingon si Bjorn.

“Oo, makalingaw ang makakuha og mga regalo,” miingon si Mami. “Apan gani mas importante ang paghatag og mga gasa ngadto sa Manluluwas.”

“Unsaon nato sa paghatag og mga regalo ngadto kang Jesus?” nangutana si Bjorn.

“Kon moserbisyo kita sa uban sama sa gibuhat ni Jesus, makapalipay kini Kaniya,” miingon si Mami.

Pagkasunod buntag nakadungog si Bjorn og tuktok sa pultahan sa atubangan. Dali siyang mibangon gikan sa higadaanan ug midagan aron makakita kon kinsa kadto. Apan sa dihang giablihan ni Papi ug Mami ang pultahan, walay tawo didto. Hinuon, gipunit ni Mami ang usa ka gamay, sinaw nga gasa gikan sa tugkaran sa balay.

“Diin kini gikan?” Nangutana si Bjorn.

“Dili ko segurado,” miingon si Mami. “Tingali usa ka anghel!”

Misiga ang mga mata ni Bjorn. “Sama sa usa ka anghel gikan sa langit?”

Mipahiyom si Papi. “Dili. Usahay tawagon nato ang mga tawo nga mga anghel kon mobuhat sila og mabination nga mga butang alang kanato. Sama og sila mga tigtabang sa Langitnong Amahan dinhi sa yuta.”

Milukso og taas si Bjorn. “Gusto usab ko nga mahimong usa ka anghel! Gusto ko nga mobuhat og mabination nga mga butang alang sa uban. Kana ang mamahimo nakong gasa sa Pasko ngadto ni Jesus.”

“Nindot nga ideya!” Miingon si Papi. “Maganahan gayod si Jesus sa imong gasa.”

Sa nahibilin nga mga adlaw sa semana, si Bjorn nakamata matag buntag nga nakakapalag og usa ka bag-o nga gasa diha sa may pultahan sa balay. Gibati niya nga gihigugma og maayo sa dihang ang mga anghel mibilin og mga gasa alang sa iyang pamilya. Gusto niya ipakita sa iyang pamilya nga gihigugma usab niya sila.

Mao nga naningkamot si Bjorn. Sekreto siyang nag-andam og mga gasa alang sa iyang mga ginikanan ug mga igsoon. Gipasinawan niya ang mga sapatos ni Papi samtang anaa siya sa trabaho ug nagdrowing og usa ka kasingkasing alang kang Mami. Dayon giputos niya ang usa sa iyang paborito nga dulaan nga mga awto alang sa iyang igsoon nga lalaki. Nag-andam siya og bubble gum alang sa iyang igsoon nga babaye.

Sa mainampingon nga paagi, gisulat ni Bjorn ang mga ngalan diha sa matag regalo ug gibutang kini ilawom sa Christmas tree. Dili siya makahulat nga makakita sa ilang malipayon nga mga nawong! Gibati niya ang kainit sa sulod sa paghunahuna lamang niini.

Sa adlaw sa Pasko, gihatagan ni Bjorn ang matag sakop sa pamilya sa ilang gasa. Mahinamon kaayo siya nga halos dili siya makalingkod nga dili maglihok.

Sa dihang nakita ni Papi ang iyang sinaw nga mga sapatos, miingon siya, “Wow, salamat, Bjorn! Nindot kaayo kini tan-awon.”

Giablihan sa igoon nga lalaki ug igsoon nga babaye ni Bjorn ang ilang mga regalo, dayon miambak aron gakson si Bjorn. “Salamat!” miingon sila.

Mipahiyom si Mami sa dihang giablihan niya ang hulagway nga gidrowing ni Bjorn alang kaniya. “Mitabang ka sa paghimo niini nga Pasko nga espesyal kaayo, Bjorn. Salamat sa pagkahimong among gamay nga anghel,” miingon siya.

Mibati nga malipayon si Bjorn sa sulod. Nasayod siya nga ang pagpakita og gugma ngadto sa iyang pamilya mao ang hingpit nga regalo nga ihatag kang Jesus!

Mga paghulagway pinaagi ni Daniel Duncan