Matua Tele mo le Peraimeri?

“Susū mai i le Peraimeri!” Sa tu Sister Agbor, le taitai o le Peraimeri a Gift, i le pito i luma o le potu. “O le asō o le a tatou aoao ai le pese ‘Ia Fealofani.’”

Na amata le musika, ma sa sauni tamaiti laiti e pepese. Ae ua uma ona iloa e Gift lenei pese. Sa ia usuina faaselau! Na te le’i fia usuina i le asō.

Sa le lavā Gift i le Peraimeri. Sa matua, umi, ma lapoa atu o ia nai lo isi tamaiti uma. O ana uo i le lotu ua i ai uma i Tamaitai Talavou i le taimi nei. Sa totoe pea le toeitiiti tausaga atoa lava mo ia, ona faatoa mafai loa lea ona auai faatasi atu o ia ma i latou i vasega ma gaioioiga a Tamaitai Talavou.

A o pepese isi tagata uma, sa filemu Gift. Sa ia memumemu i nisi o upu o pese, ae sa pisi o ia e mafaufau.

Ona oso a’e lea o sona manatu. Atonu afai e talanoa o ia i le epikopo, o le a ia faatagaina o ia e vave alu i Tamaitai Talavou ina ia mafai ona faatasi o ia ma ana uo.

Na maua e Gift Epikopo Achombi ina ua maea le lotu. “Talofa, Epikopo” sa ia fai atu ai. “Ou te le o toe lagonaina le lagona o le auai i le Peraimeri. Ou te lapoa ma matua atu nai lo isi tamaiti uma. E mafai ona ou amata alu i Tamaitai Talavou?”

Sa ataata Epikopo Achombi. “Ou te iloa o le siitia atu i Tamaitai Talavou e ese le faaoso fiafia,” o lana tala lea. “Ae e faatoa mafai lava ona e auai atu i ai i le tausaga e atoa ai lou 12. Ou te faamalie atu.”

Sa autilo ifo Gift i lalo i ona seevae. “Ua lelei.”

“Ua laki le Peraimeri i lou i ai,” o le tala lea a le epikopo. “Ou te manatu e faamemelo tele tamaiti laiti ia te oe. E mafai ona e faia se eseesega tele ia i latou.”

O le taimi na totoe o le aso, sa lagona le faanoanoa o Gift. O le tausaga o se taimi umi lea e lagona ai le tuuatoatasi i le Peraimeri.

Ae na mafaufau atili Gift i le mea na saunoa atu ai Epikopo Achombi. Pe na matuā faamemelo moni lava isi tamaiti ia te ia? Na te lei matauina muamua lena mea.

O le vaiaso na sosoo ai, na talotalo faatofa atu ai Gift i ana uo a o latou savavali atu i le potu o Tamaitai Talavou. Sa ia mapuea ma savali atu i le potu o le Peraimeri.

“Gift,” o le tala lea a Sister Agbor, “e te manao e fesoasoani mai ia te au e aoao atu le pese o lenei vaiaso?”

“A, ia ua lelei,” o le tala lea a Gift. “O le a le pese o le a tatou aoaoina?”

“‘O Au o se Atalii o le Atua,,’” o le tala lea a Sister Agbor. “Faafetai atu mo lau fesoasoani! Ou te manatu o le a fiafia tamaiti e aoao mai ia te oe.”

Ina ua amata le taimi o pesepesega, sa tu Gift i le pito i luma o le potu. “O le asō o le a ou aoaoina ai outou i se tasi o pese e sili ona ou fiafia i ai,” o lana tala lea. Sa fesoasoani o ia i tamaiti e aoao upu. Ona ia usuina lea o le pese faatasi ma i latou. A o latou pepese, sa lagona e Gift le mafanafana ma le fiafia i totonu. Na ia iloa sa ia lagonaina le Agaga Paia.

E lei umi, ae toeitiiti uma le vasega Peraimeri! Ina ua maea le tatalo faaiu, sa amata ona savali atu Gift i le potu tele. Sa manao o ia e sue ana uo pe a uma le latou vasega a Tamaitai Talavou ma faatalofa i ai.

Ae na taofia o ia e se tasi o teine laititi. “Faafetai mo lou pese faatasi ma i matou!” Sa ia fusia Gift. “Ou te fia pei o oe pe a ou matua.”

Sa ataata Gift. Sa le mafai lava ona ia faatali e alu i Tamaitai Talavou, ma sa faamoemoe o ia o le a vave ona mavae atu le tausaga na sosoo ai. Ae sa ia iloaina e mafai lava ona ia aoao ma faia mea lelei i le Peraimeri.

Ma atonu sa sa’o lava Epikopo Achombi. E mafai ona ia faia se eseesega.

O ata na tusia e Simini Blocker