O Se Konafesi Faapitoa

“Aminah, o a’u e ona!” Na ‘e’e atu ai Indira. Sa ia toso ese mai le pepe meataalo mai lona uso laitiiti.

“Tamaitai, o lea o le a ou alu,” o le valaau mai lea a Tina. “Faamolemole ia lua amio lelei ia Tama.”

Sa ea a’e Indira i luga. “O fea e te alu i ai?”

“I le maketi” “Oute alu e faatau meaai e fai ai se kuka faapitoa taeao.” Sa talotalo faatofa atu Tina.

O se aiga faapitoa? Ae aisea? Sa alu Indira e sue Tamā. “Aisea e faapitoa ai taeao?” sa ia fesili ai.

Sa ataata Tamā. “Taeao tatou te matamata ai i le konafesi aoao! E faapitoa auā tatou te faalogo atu ai i le perofeta ma isi taitai o le Ekalesia o saunoa mai. O le a latou tauina mai ia i tatou mea e finagalo le Tama Faalelagi tatou te lagonaina.”

Ina ua taunuu mai Tinā i le fale, sa ia tuu ese meaai. Sa salu e Tama le fola o le fale.

“Indira, e mafai ona e fesoasoani ia Aminah e faatulaga ona lavalava mo taeao?” O le fesili lea a Tinā.

Sa fa’asiasia mata o Indira. “Aisea e tatau ai ona ou fesoasoani ia te ia?”

“Faamolemole fai le mea lea ou te talosaga atu e fai,” o le tala lea a Tinā.

Sa oi Indira. Na tatoso ona vae ma alu atu e fesoasoani ia Aminah.

O le taeao na sosoo ai, na ala ae ai Indira i se manogi manaia tele. Sa ia oso i lalo mai le moega ma tamoe atu i le umukuka. Sa faia e Tina se kale povi (beef rendang) ma le satay e ai mo le taumafataga o le aoauli i se taimi mulimuli ane! O le a tofo lelei lava.

E lei umi, ae amataina le konafesi aoao. Sa nonofo Indira ma lona aiga e matamata i le TV. Sa faalogologo o ia i le aufaipese o pepese. Sa ia faalogo i tagata o talanoa e uiga i malumalu ma tusitusiga paia ma Iesu Keriso.

O le failauga mulimuli o le perofeta, o Peresitene Russell M. Nelson. Sa ia talanoa e uiga i le auala e fesoasoani ai le Ekalesia i tagata i le lalolagi atoa.

“O lotatou olioli sili e oo mai pe a tatou fesoasoani atu i o tatou uso ma tuafafine,” na ia saunoa mai ai.

Sa mafaufau Indira i lena mea. Pe na fiafia o ia i le fesoasoani? Sa faaauau pea ona faalogologo o ia. Na saunoa Peresitene Nelson o le ola ai i le poloaiga sili lona lua e mafai ona fesoasoani ia i tatou ia avea faapei o Iesu Keriso.

Ina ua uma, sa latou aai i le taumafataga o le aoauli na faia e Tinā. Sa mafaufau pea Indira i le lauga a le perofeta.

“O le a le poloaiga sili lona lua?” sa ia fesili ai.

“Alofa i lou tuaoi e pei o oe lava ia te oe,” o le tala lea a Tamā.

Sa mafaufau Indira e uiga i tagata na fesoasoani i ai le Ekalesia i le lalolagi atoa. “E mafai faapefea ona ou fesoasoani atu pe afai e nonofo mamao o’u tuaoi?”

“O ou tuaoi o tagata uma ia o loo siomia oe,” o le tala lea a Tinā. “E pei o tagata o lou aiga.”

Sa tilotilo i lalo Indira. Sa le’i agalelei tele o ia i lona aiga i nisi taimi.

Ae atonu o le fesoasoani ia i latou e mafai ona ia fiafia ai, e pei ona saunoa ai Peresitene Nelson. O se tasi lea o auala e mafai ona ia mulimuli ai ia Iesu. Sa manao o ia e taumafai!

I le vaiaso atoa, sa taumafai ai Indira e agalelei atili i lona aiga. Sa taalo o ia ma Amirah. Sa ia faasoa ana mea taalo. Sa ia faia le mea na talosagaina ai e Tinā ma Tamā e aunoa ma le faitio. Ina ua fesoasoani Indira i lona aiga, sa latou fiafia. Ma o lena mea na maua ai foi e ia le fiafia.

Sa matuai sa’o lava le perofeta. O le fesoasoani atu i isi na aumaia ai lona olioli!

Ata na tusia e Judi Abbot