Tatalo mo Alejandro

Sa faasee atu Gerardo agai i le faasitepu i luma o lona fale. Sa i ai le taavale a Mamá i le auala taavale. O lona uiga ua toe fo’i mai o ia ma lona uso matua o Alejandro, mai le foma’i. Sa toso ese e Gerardo ana seevae faasee ma tamoe i totonu.

“Gerardo?” O le valaau lea a Mamá. “O lea ma te i totonu i i!”

Sa savali atu Gerardo i totonu o le potu o le aiga. Sa taoto Alejandro i luga o le nofoa. Sa nofo Mamá i ona autafa. Sa foliga popole o ia.

Sa popole foi Gerardo. I le vaiaso ua te’a, na latou iloa ai ua maua Alejandro i le kanesa. Sa ma’i tigaina o ia.

Ae sa nofo i luga Alejandro ma ataata ina ua sau Gerardo i totonu. “Talofa! Na e maua se aso lelei?”

“Ioe, ae na a mai le fomai?” Na fesili ai Gerardo.

“Fai mai o ia e tatau ona faia so’u taotoga,” o le tala lea a Alejandro.

Sa luelue atu le ulu o Mamá. “Ae o fomai sili ona lelei e fesoasoani ia te ia o loo i le falemai a tamaiti. Talu ai ua 14 tausaga o Alejandro, ua matua tele o ia e le mafai ona maua se tausiga iina. E tatau ona tatou sailia se isi nofoaga.”

Sa amata ona fufusi mai le manava o Gerardo. Afai e le mafai ona latou maua se fesoasoani mo Alejandro, o le a le mea o le a tupu? Pe o le a faateteleina ea le kanesa o Alejandro?

Sa alu atu Gerardo i lona potu. Sa manaomia ona ia mafaufau.

I le Peraimeri, na aoaoina ai e Gerardo o le a faafofoga mai pea le Tama Faalelagi ia te ia. Sa iloa e Gerardo e mafai lava ona ia ole atu ia te Ia mo se fesoasoani.

O lea na tootuli ai o ia i tafatafa o lona moega ma piilima. “Tama Faalelagi pele e, faamolemole fesoasoani ia Alejandro,” sa ia tatalo ai. “Faamolemole fesoasoani mai ia i matou ia maua ni fomai e mafai ona faia le taotoga.”

E lei umi ae valaau atu Mamá ia te ia mo le taumafataga o le afiafi. Sa ia faia ni pupusas, o le meaai e sili ona fiafia i ai Gerardo. Sa ia u lapo’a i le totia faapa’u ua i faatumuina i le sisi ma pi. Ae sa popole pea o ia i si ona uso.

Sa na o ni nai tama’i u lava a Alejandro i lana pupusa. Sa mata faasaisia o ia ma sa matua’i lemu lava lana minoi.

Atonu na matauina foi e Mamá. “Aisea tatou te le matamata ai i se vitio a le Ekalesia?” sa ia fesili ai. Sa fiafia i latou e matamata i vitio e uiga ia Iesu Keriso pe a latou lagona le faanoanoa.

“Ua lelei.” Sa faamama e Gerardo ia ipu a o saunia e Mamá le vitio. Ona latou nonofo uma lea i lalo e matamata.

I le vitio, sa tatalo ai Iesu Keriso i se togalaau i tafatafa o se laau. Na iloa e Gerardo lenei tala. O le taimi lea na mafatia ai Iesu a o lei maliu o Ia i luga o le satauro.

Ina ua uma le vitio, sa lagona e Gerardo le lē gaoia ma le toafilemu. Ae sa i ai sana fesili. “Aisea na matua tiga ai Iesu?” na ia fesili ai.

Sa opo faalatalata mai i laua ma Alenjandro e Mamá. “Sa filifili Iesu e lagona le tiga aua e alofa o Ia ia i tatou. Sa ia lagonaina tiga uma sa tatou oo i ai.”

Sa tilotilo atu Gerardo ia Alejandro. “Na silafia e Iesu le lagona o le maua i le kanesa?”

“Ioe, e silafiaina e Ia,” o le tala lea a Mamá. “Na te silafia le faigata tele. Ma ona ua Ia silafia na lagona, ua Ia silafia le auala e fesoasoani ai ia i tatou.”

Sa lagona e Gerardo le mafanafana i totonu, e pei ua faaafuina o ia i se palanikeke tele. E silafia ma alolofa le Tama Faalelagi ma Iesu Keriso i lona aiga. Sa Laua iloa le auala e fesoasoani ai ia Alejandro.

Ina ua taunuu Gerardo i le fale mai le aoga i le aso na sosoo ai, sa ia maua ai Mamá o loo teuina se ato.

“O se tala fiafia!” o lana tala lea. “Sa ou talanoa i le foma’i i le falemai a tamaiti. O le a latou fesoasoani ia Alejandro. O le a faia lona taotoga taeao.”

Na tuu atu e Mamá se opo lapoa ia Gerardo. “O loo fesoasoani mai le Tama Faalelagi ia i tatou! E mafai ona tatou tatalo ma faafetai atu ia te Ia?”

“Manaia tele le manatu,” o le tala lea a Mamá. “Sei valaau atu Alejandro.”

A o latou tatalo faatasi, sa lagona e Gerardo le toafilemu. Sa faafofoga le Tama Faalelagi i lana tatalo! O lea la o le maua e Alejandro le taotoga na ia manaomia. Na iloa e Gerardo na malamalama Iesu Keriso i mea o loo latou feagai. Ma o le a Ia fesoasoani pea ia i latou i o latou tofotofoga.

Ata na tusia e Ricardo Guerrero