E Tatau Lava ona Ou Atoatoa?

Sa savali lemu atu Henry i totonu o le potu o le Peraimeri. Sa lagona le mamafa o ona vae a o taunuu atu i lona nofoa.

Sa ataata atu lona faiaoga, o Uso Rass, ia te ia. “Ua e saunia e talanoa e uiga i malumalu?” na ia fesili ai.

“Ioe,” o le tali lea a Henry.

Aisea na ou fai atu ai lena mea? Sa mafaufau ai Henry a o nofo i lalo. Sa ia lagonaina le lē saunia. I mea uma lava.

Sa aoaoina e le Peraimeri a Henry le pese “Ou te Fia Vaai i le Malumalu.” Sa talosagaina lana vasega e talanoa e uiga i le alu i le malumalu.

Ae sa lagona e Henry le faanoanoa. Sa manao o ia e alu i le malumalu pe a matua, ae sa ia lagonaina e pei ua tele naua mea sese na ia faia.

Sa tutu taitoatasi uo a Henry. Sa latou fiafia ma faagaeetia a o latou talanoa e uiga i le o i le malumalu i se aso. Sa atili ai ona sili atu le leaga o faalogona na oo ia Henry.

Ona oo lea i le taimi e pepese ai. Sa pese Henry faatasi ma le Peraimeri atoa: “O le a ou saunia nei; o lo’u tiute lea.”

E mafai faapefea ona ou saunia e alu i le malumalu ae ua tele naua mea sese ou te faia? Sa manatunatu ai Henry Sa ia faapa’ū maualalo i lona nofoa.

Ina ua uma le pese, sa faalagolago atu Uso Rass. “O seki oe?” sa ia fesili atu ai ia Henry.

Sa sioa Henry i lalo i ona lima. Ona ia fai mai lemu lea, “Ou te fia alu i le malumalu, ae ou te fefe nei ou le agavaa.” Sa ia manava umi. “E le o taimi uma matou te lelei ai pea ma lo’u aiga. E galo ia te a’u ona fai a’u fe’au ma galuega. Ua tele naua mea sese ou te faia. Pe tatau moni ea ona ou atoatoa?”

Sa ataata lemu Uso Rass. “O le agavaa e alu i le malumalu e le faapea ai e tatau ona e atoatoa. E mafai ona tatou agavaa e ala i le faatuatuaina o Iesu Keriso ma taumafai ma le faamaoni e tausi poloaiga. Tatou te faia uma lava mea sese, ae e mafai ona tatou salamo ma toe mama.”

Na saofai sa’o teisi ae Henry.

“Ou te mautinoa e mitamita le Tama Faalelagi ia te oe mo le taumafai ia lelei,” o le tala lea a Uso Rass.

Sa mafaufau Henry i nisi o mea lelei sa ia faia i lena vaiaso. Sa ia kukaina le taumafataga o le afiafi ma Tinā, fesoasoani i lona tuafafine i ana meaaoga, ma faatalofa atu i se tamaitiiti fou i le aoga.

Na amata ona siitia le mamafa o popolega o Henry. Sa ia iloa sa fesoasoani le Agaga Paia ia te ia e lagonaina le filemu.

Ina ua oo i le taimi o Henry e faasoa atu ai, sa ataata o ia ma tu i luga. “Ou te manao ia faaauau pea ona salamo ma avea atili e faapei o Iesu Keriso ina ia mafai ai ona ou ulufale atu i le malumalu i se aso,” na ia saunoa ai.

Sa lagona e Henry le fiafia a o nofo i lalo. O se aso, o le a mafai ai ona ia osia feagaiga paia ma le Atua i totonu o le malumalu. Sa manao o ia e taumafai i le mea sili na te mafaia e saunia ai!

Ata na tusia e Gail Armstrong