Mau o le La Susulu aMaja

Sa nofo Maja i luga o faasitepu o lona fale ma tee lona auvae i ona lima. Sa susulu mai ave malamalama, mafanafana o le la mai i totonu o laau maualuluga. Sa manogi le ea e pei o lau maama’ai fou o le paina.

Sa sau Tina i fafo ma nofo i autafa o Maja. “O le a se mea o e mafaufau i ai?”

“E tatau ona ou faasoa atu la’u mau e sili ona ou fiafia i ai i le Peraimeri,” o le tala lea a Maja. “Ae e le o i ai se mau e sili ona ou fiafia i ai. Ma ou te le iloa po o le fea e filifili.”

Sa luelue atu le ulu o Tina. “E faigata le filifilia o se mau e sili ona fiafia i ai.” Sa tilotilo atu o ia i laau, ona tu lea i luga. “E i ai so’u manatu.”

Sa toe foi atu Tina i totonu. Ina ua toe sau o ia, sa ia uuina mai ana tusitusiga paia. “Ta amata i se tala. O le a le tala faatusipaia e sili ona e fiafia i ai?”

Sa mafaufau i ai Maja. “Ou te fiafia lava i le taimi na asiasi atu ai Iesu i sa Nifaē.”

Sa susu’e faasolosolo e Tina itulau o le Tusi a Mamona. “O lena tala e amata i le 3 Nifae.” Sa ia faasino atu i le itulau. “Ta feauauai i le faitauina ma filifili fuaiupu ta te fiafia i ai.”

Sa luelue le ulu o Maja ma faalogologo a o faitau Tina. Sa ia faitau e uiga i le valaauina e Iesu Keriso o Ona soo. Sa ia faitau e uiga i e faatupuina le filemu ma le tatalo.

Ona oo lea i le taimi o Maja e faitau ai. Ina ua uma ona ia faitauina se tasi o fuaiupu, sa ia malolo. Sa ia lagonaina e pei ua lava le susulu o le la e faatumulia ai lona loto.

Sa ia vaai ane i luga ia Tina. “Ou te fiafia i lena.”

“Faapena foi a’u. O le a le mea e ala ai ona e fiafia i ai? O le fesili lea a Tina

Sa faamimigi tauau o Maja a o o’o ane se ataata i ona foliga. “E faatatau ia Iesu. Ma ou te lagona ai le fiafia.”

Sa ataata atu foi Tina. “O se auala lelei tele lena e iloa ai ua e maua se mau e sili ona e fiafia i ai. E te manao e faasoa atu lena mau i le Peraimeri?”

Sa luelue le ulu o Maja ma le fiafia. “E mafai ona e fesoasoani ia te a’u i le aoaoina o le mau?”

“Ioe!” O le tala lea a Tina.

Sa a’oina e Tina ma Maja tai tasi upu i le taimi. A o la galulue, sa tagi mai manulele i laau, e pei o loo latou aoaoina foi.

I le vaiaso atoa, sa faaauau pea ona faataitai e Maja lana mau fou e sili ona fiafia i ai. I le taeao o le Aso Sa, sa fai si ona popole. Sa ia faataitai le faiga o lana mau i le malaga umi i le lotu.

Sa toa laiti tamaiti i le Peraimeri a Maja. Ae a o savali atu o ia i totonu o le potuaoga, sa lagona e Maja e pei o loo felelei solo lagona popole i lona manava.

Ina ua oo i lona taimi e faasoa atu ai, sa tu Maja ma manava loloto. “Faauta, o A’u o le tulafono, ma le malamalama,” na faiatu ai o ia “Ia outou vaavaai mai ia te a’u, ma tumau e oo i le iuga, ma o le a outou ola ai; aua o ia o le e tumau e oo i le iuga o le a ou tuuina atu i ai le ola faavavau.”

Ina ua uma le mau a Maja, sa nofo i lalo ma ataata. Sa ia faia! Ua leai ni lagona popole, ma ua toe foi mai le lagona mafanafana ma le susulu o le la. Sa ia iloaina o le a aumaia e lana mau e sili ona fiafia i ai lena lagona i soo se taimi lava na te manaomia ai.

Ata na tusia e Chloe Dominique