Gikan sa YA Matag Semana
Kon Ikaw Mobati nga Dili Ka Maayo sa Bisan Unsang Butang, Hinumdomi ang Imong Kapasidad sa Pagserbisyo
Ang pagkasayod nga ako makaserbisyo sa uban nakahatag nako og matang sa pagsalig nga maoy kulang nako sa akong kinabuhi.
Naanad na ko nga mobati nga dili ko maayo sa bisan unsang butang.
Sa wala pa ko magserbisyo og misyon, kana nga hunahuna mao kanunay ang akong gihunahuna. Mubo ra ko ug dili gayod maayo sa mga sport o akademiko. Mibati ko nga ang uban daghan kaayo og mga abilidad kaysa nako. Bisan kon ang mga tawo mabination ug moingon, “Ikaw adunay mga talento usab,” ibaliwala nako ang ilang mga gisulti isip mga pagdayeg.
Mibati ko nga ubos ra ug dili nako mapugos ang akong kaugalingon nga tinuoray nga makagusto kon si kinsa ko. Apan kadto nga mga pagbati sa kadugayan nausab.
Pagkasayod nga Ako Makahimo
Nagserbisyo ko og misyon sa Sydney, Australia, ug sa pag-adto didto gikan sa Japan nga dili ko makaistorya og Ininglis lisod kaayo. Wala ko makasabot sa gisulti sa uban ug maglisod sa pagpahayag sa unsay gusto nakong ipakigbahin. Kadugayan, nangutana ko sa Dios, “Nganong gitawag man ko sa pagserbisyo sa nasod nga lahi sa akong nasod?”
Apan salamat sa makapadasig nga mga pulong gikan sa akong presidente sa misyon ug mga kompanyon, ug sa hinayhinay nakakat-on ko og Ininglis. Sa hinayhinay, makaistorya na ko niadtong akong gitudloan. Usa kadto ka milagro! Apan misugod usab ako sa pagbati og pagsalig—usa ka hilom apan gamhanan nga pagbati sa kalamposan nga ako makahimo ug nagbuhat og butang nga mahinungdanon alang sa laing tawo.
Dili kadto sayon. Apan hilabihan ang akong kalipay sa pagkasayod nga ang Ginoo misalig sa akong mga abilidad ug mitrabaho pinaagi nako. Mas nindot kaayo kana pamation kaysa bisan unsang butang nga akong gibati sukad.
Pagsalig diha sa Pagserbisyo
Human nga nauli na, nag-andam ko og usa ka leksiyon nga itudlo sa korum sa mga elder, ug aduna koy nakit-an nga makadasig nga pakigpulong nga wala mahubad sa Japanese. Kusog kaayo ang akong gibati nga gusto nakong ipakigbahin kana nga mensahe ngadto sa klase. Mao nga gihubad nako kini gikan sa Ininglis ug gipakigbahin kini atol sa leksiyon. Kadaghanan sa mga brother natandog sa mensahe ug nagpasalamat nga gihubad nako kini alang nila.
Kana nga kasinatian nagtudlo nako pag-usab nga ang pagserbisyo dili kinahanglan nga komplikado. Sa kadugayan, human sa paghubad og daghang mga pakigpulong, misugod ko sa pagboluntaryo sa paghubad og mga pakigpulong sa debosyonal nga gihatag ngadto sa mga young adult. Kini ang hinungdan nga nakatrabaho ko isip opisyal nga tighubad. Nagtuon ko sa akong kaugalingon, apan pinaagi sa pagserbisyo, ang akong kahanas mas milambo, ug ako nakapanalangin sa uban pinaagi sa akong nakat-onan.
Si Elder Dieter F. Uchtdorf sa Korum sa Napulog Duha ka Apostoles makausa miingon:
“Usahay ang atong kinabuhi susama sa neo-impressionistic nga art. Ang mga tuldok sa kolor nga naglangkob sa mga higayon ug hitabo sa atong mga adlaw daw dili konektado ug samok usahay. Dili nato makita nga adunay han-ay niini. Dili nato mahunahuna nga adunay tuyo niini.
“Hinoon, kon moatras kita ug magbaton og mahangturong panglantaw, kon motan-aw kita sa atong kinabuhi gamit ang bayanan sa ebanghelyo ni Jesukristo, atong masugdan pagsabot ang mga panghitabo sa atong kinabuhi. Tingali dili pa dayon nato makita ang kinatibuk-ang larawan, apan uban sa pailob igo natong makita aron mosalig nga adunay matahom, maanindot nga desinyo.”
Sa dihang gitawag ko sa pagserbisyo didto sa Australia, gibati nako nga murag ang akong kinabuhi puno sa mga tuldok nga wala makonektar nga wala nako masabti. Apan kon tan-awon nako og balik karon, makita nako nga tanan niadtong mga oportunidad sa pagserbisyo ug pagkat-on og Ininglis kabahin sa plano sa Langitnong Amahan sa pagpanalangin nako ug sa pagpakita nako nga ako makahimo gayod, ako adunay mga talento, ug ako makabaton og pagsalig kon si kinsa ako isip disipulo ni Kristo ug isip anak sa Dios.
Siya misalig nako sa pagserbisyo sa uban, ug kana nga pagserbisyo mipuno nako og gugmang putli—ang tiunay nga gugma ni Kristo—alang niadtong anaa sa akong palibot.
Andam nga Mopakigbahin sa Iyang Gugma
Kon kita mobati nga ubos ra ngadto sa uban, hinumdoman lamang nato ang atong abilidad sa pagpakigbahin sa kaayo ngadto sa kalibotan, sa dinagko nga paagi ug sa ginagmay. Ang pagserbisyo dili kanunay sayon. Ang mga butang dili kanunay mahitabo sa paagi nga atong gilaoman nga mahitabo kini, apan kitang tanan makahimo sa pagpakigbahin sa kahayag, ug ang atong pagserbisyo makatabang nato ug sa uban sa pagpangandam sa pagsugat sa Manluluwas.
Sama sa gitudlo ni Elder Dale G. Renlund sa Korum sa Napulog Duha ka Apostoles:
“[Ang Dios] naglaom kanato nga mogamit sa atong mga gasa, mga talento, ug mga abilidad aron sa pagpanalangin sa mga kinabuhi sa mga anak sa Langitnong Amahan. …
“Tinguhaa ang giya sa Dios aron sa pagpalambo sa inyong talagsaon nga mga abilidad, ug sa pagtabang sa uban, bisan kon kini dili sayon. … Sa pagbuhat sa ingon, kamo nagtabang sa kalibotan nga maandam alang sa Ikaduhang Pag-anhi ni Jesukristo, ug kamo mapanalanginan uban sa igong paglaom nga mosulod sa kapahulayan ug kalipay sa Ginoo, karon ug sa umaabot.”
Ako nagtuo nga ang pagserbisyo sa uban ug ang pagpakita og Kristohanon nga gugma mao ang direkta nga pagtuman sa labing katuyoan nga kita mianhi sa yuta, ug pinaagi niini, makatabang kita sa usag usa nga makabalik ngadto Kaniya.
Kon magduhaduha ko sa akong kaugalingon, ang pagserbisyo mao ang akong matanyag. Kini ang yawe nga miabli sa daghan kaayong panalangin sa akong kinabuhi, lakip na ang pagbaton og pagsalig sa akong balaanong pagkatawo ug sa atubangan sa Ginoo.