Gikan sa Natad sa Misyon
4 ka Paagi sa Pagpahiangay ngadto sa Bag-ong mga Lider sa Misyon
Kon tugotan ninyo sila, ang inyong mga lider sa misyon mahimong inyong mahigugmaon ug kasaligan nga mga magtutudlo sa inyong tibuok nga kinabuhi.
Sa dihang anaa ko sa missionary training center, akong nahibaloan nga ang akong mga lider sa misyon sayo nga ma-release mga duha ka semana sa dili pa ko moabot sa akong misyon. Wala madugay human sa akong pag-abot, akong naamgohan nga hilabihan sila nga gidayeg ug gitahod sa tanan nilang mga misyonaryo, lakip nako!
Sa dihang miabot ang among bag-ong mga lider sa misyon, adunay daghang lainlaing mga pagbati. Ang ubang mga misyonaryo mihangop nila, samtang ang uban nasagmuyo sa kausaban.
Pipila ka bulan ang milabay, gihatagan ko og usa ka kompanyon nga dili maayo ang pagtagad ngadto sa among mga lider sa misyon ug sa ilang pagdumala. Kay bag-o pa ko sa misyon, naminaw ko sa iyang mga reklamo ug mibati nga makataronganon kini. Naimpluwensyahan gyod ko sa iyang kinaiya ug misugod sa pagtutok sa negatibo, ug nahimo kong tigsaway sa mga binuhatan ug mga desisyon sa among bag-ong mga lider.
Sa dihang nabalhin ko, akong naamgohan nga ako sa wala tuyoa mipalayo sa akong kaugalingon gikan sa pagdawat sa tabang ug kalamboan nga akong gikinahanglan gikan niini nga mga lider. Sa nahabiling panahon sa akong misyon, mitugot ko nila nga mahimong mahigugmaon ug kasaligan nga mga magtutudlo sa akong espirituwal nga pagkakabig. Nakadawat ko og gamhanang mga pagsaksi sa ebanghelyo pinaagi sa ilang mga pagtulun-an ug tambag. Sa higayon nga makasugat ko og espirituwal nga kagubot karon, gigamit gihapon nako ang unsay ilang gitudlo nako.
Kon ang pagpangulo sa misyon mausab, mahimo kining usa ka hagit, apan ang paagi sa inyong pagtubag makaapekto sa tibuok ninyong misyon—ug sa inyong kinabuhi. Ania ang pipila ka butang nga akong nakat-onan mahitungod sa pagpahiangay ngadto sa bag-ong mga lider sa misyon:
1. Paabota ug Hangopa ang Kausaban
Si Presidente Russell M. Nelson (1924–2025) mipasabot kon sa unsang paagi nga ang mga ordinansa sa templo napalambo paglabay sa panahon samtang ang mga propeta nagdawat og pagpadayag gikan sa Dios. Ang mga kausaban padayon nga nahitabo sa atong panahon. Siya mipasabot nga, “Ang pamaagi nausab, apan ang mga pakigsaad nagpabilin nga pareha.”
Sa samang paagi, ang inyong bag-ong presidente sa misyon mahimong makadawat og pagpadayag alang sa inyong misyon nga magkinahanglan og kausaban sa mga pamaagi. Hinumdomi—bisan kon ang mga pamaagi mausab, ang inyong katuyoan isip misyonaryo ug ang ebanghelyo ni Jesukristo nga inyong gitudlo magpabilin nga pareha. Ang inyong presidente sa misyon sa kasamtangan ug sa miagi parehong nakadawat og direksyon gikan sa Langitnong Amahan. Bisan kon ang direksyon managlahi, wala kini magpasabot nga ang usa sayop. Ang misyonaryo nga buhat kay kabahin sa nagpadayon nga Pagpahiuli, ug “ang nagpadayon nga Pagpahiuli nagkinahanglan og nagpadayon nga pagpadayag.”
2. Motahod sa Ilang Calling gikan sa Ginoo
Hinumdomi nga “ang imong presidente sa misyon ug ang iyang asawa, kinsa nagserbisyo isip imong mga lider sa misyon, gitawag sa Ginoo ug gi-set apart aron mangulo sa misyon.” Ang tawag sa pagserbisyo isip mga lider sa misyon nagagikan sa Langitnong Amahan pinaagi sa pagpadayag ngadto sa Iyang mga propeta ug mga apostoles. Mosalig ug motahod sa Iyang kabubut-on ug saktong panahon ug hibaloi nga Siya adunay espesyal nga katuyoan alang sa inyong bag-ong mga lider.
Siya mogiya nila, sama sa Iyang paggiya ug pagdasig kaninyo sa inyong misyonaryo nga pagserbisyo.
3. Mag-ampo alang sa usa ka Pagsaksi sa Ilang Tambag ug Pagpangulo
Isip misyonaryo, kanunay kamo nga nagpakigbahin sa istorya bahin sa Unang Panan-awon ni Joseph Smith. Ang iyang kasinatian nagsugod pinaagi sa kasulatan “Apan kon diha kaninyo may nakulangan ug kaalam, papangayoa siya sa Dios” (Santiago 1:5). Samtang nagdapit kamo sa uban nga mangutana sa Langitnong Amahan mahitungod sa kamatuoran sa ebanghelyo, hinumdomi nga ipangutana usab Kaniya ang inyong mga pangutana. Kon mibati kamo og kabalaka sa kausaban, makakaplag kamo og kaseguroan pinaagi sa personal nga pagpadayag.
Si Presidente Nelson misaad, “Samtang kamo magpadayon nga magmasulundon, mopahayag og pasalamat alang sa matag panalangin nga gihatag sa Ginoo kaninyo, ug samtang kamo mapailobon nga motahod sa panahon sa Ginoo, pagatagaan kamo sa kahibalo ug pagsabot nga inyong gipangita.”
4. Motugot Nila nga Personal nga Motambag Ninyo
Sa dihang nagduhaduha ko sa akong buhat isip misyonaryo, ang akong presidente sa misyon nakabantay sa akong mga gibati pinaagi sa Espiritu ug mitabang nako nga makasabot nga ako nahimong usa ka malamposong misyonaryo.
Namulong ngadto sa bag-ong gitawag nga mga lider sa misyon, si Presidente Jeffrey R. Holland, Presidente sa Korum sa Napulog Duha ka Apostoles, miingon:
“Taliwala sa tanang bililhon nga mga kinabig nga kamo aduna atol sa sunod tulo ka tuig mao ang mga misyonaryo mismo. …
“Ug alang nako ug sa minilyon nga sama nako, kami mobalik ngadto sa mga pagtulun-an ug pagpamatuod sa among mga lider sa misyon alang sa among mga handomanan sa among unang tinuod nga pagtuo ug gituohan. Daghan ang nakalahutay sa kaulahian sa kinabuhi diha sa kalig-on sa ebanghelyo nga nakat-onan samtang ang mga batan-ong misyonaryo nagkat-on sa ilang gitahod nga presidente sa misyon ug sa iyang asawa.”
Bisan kinsa man ang inyong mga lider sa misyon, hinumdomi nga sila nagserbisyo ni Jesukristo, mao nga gusto nila unsay labing maayo alang ninyo ug sa inyong kalamboan. Samtang kamo moapil sa labing mahinungdanong buhat sa yuta, ang ilang pagpamatuod ug mga pagtulun-an bahin sa Manluluwas makausab sa inyong kinabuhi—kon tugotan ninyo sila.