Gikan sa YA Matag Semana
3 ka Pangutana nga Aduna Ako Kaniadto mahitungod sa Simbahan isip usa ka Kinabig (ug Sa Unsang Paagi nga ang Akong Balaanong Pagkatawao Nakatabang nga Matubag Kini)
Ang tagsulat nagpuyo sa Toronto, Ontario, Canada.
Ang pagbaton og mga pangutana dili lang usa ka butang nga nasinati sa bag-ong mga kinabig—kabahin kini sa pagpalig-on sa akong pagpamatuod sa tibuok nakong kinabuhi.
Ang pag-angkon sa akong pagpamatuod daw sama sa pagtakdo sa usa ka puzzle.
Sa dihang una nakong namatikdan ang usa ka higala sa hayskul nga dili moinom og makahubog nga ilimnon o mosigarilyo ug akong nakat-onan ang mahitungod sa Pulong sa Kaalam, akong nakaplagan ang usa ka piraso sa puzzle. Sa dihang gibasa nako ang Basahon ni Mormon, nakakat-on mahitungod ni Joseph Smith, ug midawat nga nagkinahanglan ko sa Manluluwas, nakakolekta ko og dugang nga mga piraso.
Apan sa samang higayon, kon mas daghang piraso ang akong nakit-an, mas naamgohan nako nga daghan pa ko og kulang. Mangita ko og tubag sa akong mga pangutana, apan kadto nga mga pangutana kasagaran nagdala og dugang pa nga mga pangutana. Pipila niini nga mga pangutana sayon ra ug matubag sa mga misyonaryo, apan ang uban nagkinahanglan og daghang panahon ug pagtuon.
Aduna gihapon koy mga pangutana—tingali kanunay gyod kong may pangutana. Apan nakadiskobre ko og usa ka pundasyon nga nagsuporta nako samtang nagpalig-on ko sa akong pagpamatuod ug nagpadayon sa pagkat-on nga nagsugod sa pagtuo isip pundasyon:
Ang akong balaanong pagkatawo.
Ania ang tulo nako ka pangutana kaniadto mahitungod sa ebanghelyo nga ang akong balaanong pagkatawo nakatabang nga matubag:
1. Unsaon Nako Pagsalikway ang Nangagi nga mga Sala?
Sa dihang nagkat-on ko mahitungod sa Ang Simbahan ni Jesukristo sa mga Santos sa Ulahing mga Adlaw, naghunahuna ko kon unsaon nako pagsalikway ang nangagi nga mga sala. Samtang nagkat-on ko og dugang mahitungod sa mga sumbanan sa ebanghelyo, misugod ko sa pagkasabot nga ang paagi sa akong pagpakabuhi kaniadto wala mahisubay sa mga pagtulun-an ni Jesukristo.
Apan samtang nagkat-on ko mahitungod sa gugma sa Dios alang nako, nga Iyang anak, gibati nako nga makahunong ko sa kabalaka sa akong nangagi nga mga sala. Atong nakat-onan diha sa Isaias 1:18 nga “bisag unsa ka pula ang inyong sala, maputi kini kaayo.”
Ganahan ko nga nahibalo nga tungod sa akong Manluluwas, dili na ko kinahanglang maghambin sa akong mga sala. Ako mahimong maghinulsol, modangop ngadto Kaniya, ug ibutang kana nga palas-anon. Ug mao kana ang labing makahupay, kulbahinam nga kamatuoran nga akong nadungog sukad.
2. Unsa ang Akong Tahas sa Pagpundok sa Israel?
Sa wala pa sila mobalhin ngadto sa Canada, ang akong pamilya orihinal nga taga-Macedonia. Mibalik ko sa Macedonia aron mopuyo uban sa akong papa sulod sa usa ka tuig ug tunga human ko nabunyagan. Sa wala pa ko mobalhin, wala ko makasabot sa hingpit kon unsa ang pagpundok sa Israel o kon unsay ipasabot sa dihang ang akong patriyarkal nga panalangin mipasabot sa akong kaliwatan [lineage] diha sa balay ni Israel.
Apan samtang misugod ko sa pagtambong sa simbahan didto sa Macedonia ug nakaila ang mga tawo didto, balik-balik nakong nadawat ang pagbati nga ang Dios nakaila ug nahigugma niadto nga mga tawo. Kining gamay nga nasod, diin ang mga miyembro sa Simbahan diyotay ra, hilabihan ka importante ngadto Kaniya.
Misugod ko sa pag-angkon og pagpamatuod sa mga pulong ni Presidente Russell M. Nelson (1924–2025): “Ang pukot sa ebanghelyo sa pagpundok sa nagkatibulaag nga Israel lapad kaayo. Adunay luna alang sa matag tawo nga hingpit nga mohangop sa ebanghelyo ni Jesukristo.”
Ug human mabunyagan ang usa nako ka higala sa Macedonia, akong nasabtan ang hilabihan gayod ka tam-is nga kalipay nga nagagikan sa pagpakigbahin sa ebanghelyo ug sa pagpundok sa Israel. Murag ang tanang butang sa hinayhinay akong nasabtan samtang nagsugod ko sa pagtan-aw sa akong kaliwatan [lineage] diha sa balay ni Israel isip usa ka matahom ug talagsaon nga pagkatawo nga makatabang nako nga magpadayon sa pagpakigbahin sa ebanghelyo.
3. Unsa man ang Mahitabo Kon Magpadayon Ko nga Adunay mga Pangutana?
Nakaplagan nako ang mga tubag sa daghan sa akong mga pangutana—apan dili tanan niini.
Bag-ohay lang, samtang didto ko sa templo ug naghunahuna mahitungod sa akong kinabuhi, dili nako mapugngan ang sakit nga hunahuna nga misantop: “Nangandoy gyod ko nga ang akong mama ania dinhi uban nako.”
Daghan ko og mga pangutana mahitungod sa pagkahimong nag-inusara nga miyembro sa Simbahan sa akong pamilya. Ang maselyo ngadto sa akong pamilya mao ang usa sa labing gipangandoy sa akong kasingkasing, ug wala ko mahibalo kon mahitabo ba kana niini nga kinabuhi—o makaplagan nako ang tanang tubag sa akong mga pangutana.
Apan ako nahibalo nga ako anak sa Langitnong Amahan kinsa adunay balaanong koneksiyon ngadto Kaniya. Si Presidente Nelson mitudlo nga “ang tanan niadtong kinsa mihimo og usa ka pakigsaad sa Dios adunay agianan ngadto sa usa ka espesyal nga matang sa gugma ug kaluoy.”
Samtang nagpadayon ko sa pagkaplag sa bag-ong mga piraso sa puzzle sa akong pagpamatuod, ako nahupay sa kahibalo nga ang pagkahimong anak sa Dios ug ang pagbaton og mga pangutana dili eksklusibo. Ang mga pangutana mahinungdanon alang sa akong paglambo isip usa ka disipulo ni Kristo. Ug ako nasayod nga ang pagbaton og mga pangutana dili lang usa ka butang nga nasinati sa bag-ong mga kinabig—kabahin kini sa pagpalig-on sa akong pagpamatuod sa tibuok nakong kinabuhi.
Samtang atong paningkamotan ang atong lisod nga mga pangutana, makasalig kita sa Manluluwas kinsa nasayod sa malumong mga pangutana sa atong mga kasingkasing. Tungod sa atong balaanong panulundon, kita may agianan ngadto Kaniya ug sa Langitnong Amahan ug sa Ilang kalig-on.