Tema Niini nga Bulan: Paghatag og Bili sa Inyong Balaanon nga Pagkatawo

Hello, mga higala!

Isip mga young adult, nag-atubang kita og daghang mensahe gikan sa kalibotan kon si kinsa kita ug sa unsang paagi nga kita kinahanglang molihok. Sa pagkatinuod nag-atubang ko og mga higayon diin ang akong mga desisyon sa pagpakabuhi isip usa ka disipulo ni Kristo gihagit sa mga pwersa nga nagbira nako bisan asa.

Salamat, kita adunay dinasig nga mga tinubdan nga nagpahinumdom nato sa pagtutok diha sa atong balaanong panulundon. Si Elder Patrick Kearon sa Korum sa Napulog Duha ka Apostoles mitudlo: “Kamo gayod ang gimahal nga anak nga babaye sa [Langitnong Amahan]. Kamo gayod ang Iyang bililhon nga anak nga lalaki. Ug ang dalan nga inyong giagian mao ang Iyang plano sa kalipay.”

Ang paghatag og prayoridad niini nga mensahe mahinungdanon kon unsay angay nga buhaton sa inyong kinabuhi sa mortalidad. Si Elder Kearon nagtudlo ng kini “mousab sa matag aspeto sa inyong kinabuhi.”

Aron matabangan kamo nga mas motutok sa inyong balaanong pagkatawo, ania ang ubang mga artikulo nga malaoman ninyo gikan sa mga young adult sa tibuok kalibotan niini nga bulan:

• Usa ka misyonaryo nga taga-Switzerland nakadawat og wala damha nga tawag diha sa iyang nasod nga gipuy-an—ug sa unsang paagi nga nakatabang kana kaniya nga makonektar ngadto sa Langitnong Amahan

• Unsa ang atong makat-onan gikan sa mga tawo sa Daang Tugon mahitungod sa balaanong pagkatawo

• Sa unsang paagi nga si Jesukristo nakasabot sa atong mga panlimbasog, gani isip usa ka hingpit nga Manluluwas

• Usa ka sikat nga tigdula og volleyball nga taga-Hawaii kinsa, sa dihang nag-atubang siya og grabe nga mga hagit sa kahimsog, nakakat-on sa paghatag og prayoridad sa iyang balaanong pagkatawo ibabaw sa tanang uban pa nga mga dungog

May mga istorya usab kami nga kabahin sa atong nagpadayon nga mga serye:

• Gikan sa Natad sa Misyon: Sa unsang paagi nga ang pagbaton og maayong pamatasan mahitungod sa bag-ong mga lider sa misyon makapanalangin sa inyong misyonaryo nga kasinatian

• Alang sa mga Amahan sa Gagmayng mga Bata: Lima ka sugyot gikan sa usa ka bag-ong amahan aron makatabang ni bisan kinsa nga tawo nga nag-andam alang sa balaanong tahas nga iyang tumanon diha sa iyang pamilya

• Nagatuo Ako: Usa ka young adult gikan sa Brazil kansang mga pakigsaad mitabang niya nga makonektar ngadto sa iyang balaanong pagkatawo

• Paggamit sa Daang Tugon nganha sa Inyong Kinabuhi: Duha ka istorya gikan sa Exodo nga makatabang ninyo nga makasabot kon unsaon sa pagbuntog ang imposible kaayo nga mga kalisdanan

Nanghinaot kami nga kini nga mga istorya mopahinumdom ninyo sa hingpit nga gugma sa Langitnong Amahan alang kaninyo ug sa uban. Kamo direkta nga makaakses Kaniya tungod kay kamo Iyaha, ug gipadala Niya ang iyang Pinalangga nga Anak aron dad-on kamo pauli Kaniya.

Nagmahal,

Kimmy Badal, Liahona Editorial Intern