Ang Usa ba ka Hingpit nga Manluluwas Makasabot Kon Unsay Bation nga Makigbisog?

Nagtuo ko nga naa na ko sa labing mahinungdanong panahon sa akong misyon—nagbansay ko og bag-ong misyonaryo, nag-andam alang sa usa ka bunyag, ug naanad na kaayo sa mga buluhaton sa usa ka misyonaryo. Mibati ko nga malipayon kaayo.

Apan wala nako mabantayi ang kakapoy ug kabalaka nga nagsugod og tipun-og sa sulod kanako.

Naghigda ko aron matulog usa ka gabii sa dihang nagsugod og kagrabe ang ikaduha nakong atake sa pagkataranta nga wa nako sukad mabati sa akong tibuok kinabuhi—ang una nahitabo siyam ka tuig na ang milabay. Siyam ka tuig!

Ngano, human lamang sa gamayng panahon sa kabalaka sa pagkabata, nga kini kalit lang nga mibalik og usab karon?

Ako matinumanon nga misulay sa pagpadayon sa akong misyon isip normal, naghunahuna nga masulbad nako ang akong kaugalingong problema.

Samtang nakigbisog ko bahin sa kahimsog sa akong pangisip, usa ka tawo ang mipakigbahin kanako sa iyang panghunahuna samtang nagbasa siya mahitungod sa kasinatian sa Manluluwas didto sa Getsemane.

Si Jesus miingon, “Hilabihan ang akong kasubo nga halos ikamatay ko.” Ug dayon ang Manluluwas nag-ampo, “Amahan ko, kon mahimo, kuhaa kanako kining kupa sa pag-antos; apan dili ang akong pagbuot maoy matuman kon dili ang imo” (Mateo 26:38–39).

Gibati na ba nimo ang kabug-at sa imong kaugalingong kasubo? Nakapangutana ka na ba sa Dios, “Aduna bay laing paagi?”

Sa hingpit nga kabubut-on, hingpit nga pagsunod, ug hingpit nga gugma, ang atong Manunubos midawat sa kabubut-on sa Amahan. Siya hingpit tungod kay Siya walay sala, apan gibati gihapon Niya ang kasakit, kasubo, ug pag-inusara.

Gani, Siya mikanaog sa ubos sa tanang butang—aron Siya makaagak kanato.

Si Presidente Jeffrey R. Holland, Akting nga Presidente sa Korum sa Napulog Duha ka Apostoles, mitudlo, “Si Jesus ‘usa ka tawo sa kagul-anan’ [Isaias 53:3], nag-ingon ang mga kasulatan. Siya misinati og kagul-anan, kakapoy, kadismaya, ug hilabihang kamasulub-on. Niini ug sa tanang higayon, ang gugma ni Jesus wala mopakyas, ug bisan sa Iyang Amahan.”

Ang pagkahibalo nga si Kristo miatubang og lisod nga mga butang nagpahinumdom nako nga Siya nakasabot og kasubo sa kasingkasing, depresyon, kaluya, kasagmuyo, kabalaka, ug pag-inusara labaw kay ni bisan kinsa.

Siya mao kadtong naghilak sa kamatayon ni Lazaro (tan-awa sa Juan 11:33–36). Ug Siya kadtong nangutana samtang Siya kamatyonon diha sa krus, “Dios ko, Dios ko, nganong gibiyaan mo ako?” (Marcos 15:34).

Apan si Jesukristo nakahibalo usab sa dakong kalipay, gugma, kapuangod, kaluoy, ug kalinaw nga labaw pa ni bisan kinsa. Tungod kay Siya hingpit. Mao nga, Siya nahibalo sa hingpit kon unsay atong gibati.

Si Presidente Holland mipamatuod: “Usa sa dakong kahupayan niining kasaulogan sa Pagkabanhaw mao nga tungod kay si Jesus mibaktas sa ingon ka taas, masulub-ong agianan nga nag-inusara, dili na kita kinahanglang mohimo pa sa ingon. Ang Iyang biyahe nga nag-inusara naghatag og lapad nga pakig-uban alang sa atong gamay kaayo nga luna niana nga agianan—sa puno sa kaluoy nga pag-amuma sa atong Amahan sa Langit, sa walay pagkapakyas nga pakig-uban niini nga Pinalanggang Anak, sa bug-os nga gasa sa Espiritu Santo.”

Nakaamgo nga si Jesukristo hingpit nga nakasabot kon unsa ang akong gibati samtang ako nakigbisog sa kabalaka, ako sa kataposan mitugot Kaniya nga motabang kanako sa pagpas-an sa akong mga palas-anon.

Ang akong kabalaka wala dayon mawagtang. Aduna gihapon akoy lisod nga mga adlaw. Apan ang pagkahimong suod ni Kristo naghatag gani nako og malungtaron nga kalipay tungod kay ako nasayod nga Siya anaa ra uban kanako mag-ingon, “Nasayod Ako. “Nasayod gyod Ako sa hingpit unsay imong gibati.”

Atol niini nga kasinatian, si Kristo nahimong akong labing suod nga sumbonganan.

Tingali usahay kita adunay kalagmitan nga maghunahuna nga ang pagkahingpit ni Kristo nagpasabot nga Siya layo ug dili makab-ot, nga ang Iyang dagkong mga binuhatan ug milagrosong kinabuhi nakapahimo Niya nga murag layo kaayo gikan kanato nga mga ordinaryo, dili hingpit, mapahitas-on nga mga nilalang. Apan Siya mas duol kanato sa higayon nga kita nag-atubang sa atong labing lisod nga mga gubat, atong labing grabe nga mga kasubo, ug sa atong labing makahasol nga mga pakigbisog.

Niining panahon sa Pasko sa Pagkabanhaw, kita mahimong mohinumdom nga si Jesukristo nasayod sa eksakto gayod kon unsa ang bation nga makigbisog tungod kay Siya hingpit—ang bugtong tawo nga makabati sa atong kasakit ug mopas-an sa atong mga palas-anon.

Mao nga, kon ikaw nakigbisog, dangop ngadto Kaniya. Siya nakasabot sa hingpit.