Gikan sa YA Matag Semana

5 ka Yanong mga Ideya sa Pagpangandam sa Espirituwal nga Paagi alang sa Kinatibuk-ang Komperensiya

Ni Aspen Yip

Mga Magasin sa Simbahan

Pag-ugmad og palibot diin ang Espiritu makapuyo, ug tan-awa kon sa unsang paagi nga makausab kini sa imong kasinatian sa komperensiya!

usa ka babaye nga nag-headphone nga naglingkod sa sopa

Maghinam-himan kaayo ko matag higayon nga magsingabot ang kinatibuk-ang komperensiya. Ganahan ko kon giunsa nga ang mga mensahe nga gipakigbahin atol sa komperensiya nakatabang nako nga makakat-on og dugang mahitungod sa Manluluwas—ilabi na kon matunong kini sa Pasko sa Pagkabanhaw. Apan sa kanunay ingon og mahitabo kini nga wala nako damha.

Ang mga propeta ug mga apostoles kanunay nga nagdapit nato sa pagpangandam sa espirituwal nga paagi alang sa kinatibuk-ang komperensiya. Si Elder Dieter F. Uchtdorf sa Korum sa Napulog Duha ka Apostoles nangutana: “Unsa kahay mahitabo kon kitang mga tigpaminaw motugbang sa paghimog preparasyon sa atong kaugalingon? Sa unsang paagi kaha lahi ang atong paghangop sa kinatibuk-ang komperensya kon gitan-aw nato ang komperensiya nga usa ka oportunidad aron makadawat og mga mensahe gikan sa Ginoo mismo?”

Kanunay ko nga naningkamot sa pagpangandam sa espirituwal nga paagi sa pagpaminaw sa buhi nga mga propeta, apan hapit kanunay, matag higayon nga moabot ko kataposan semana sa komperensiya, moingon ko sa akong kaugalingon, “Mas daghan unta ang akong gihimo aron maandam ang akong kaugalingon alang sa daghan kaayong makapadasig nga mga pulong nga adunay gamhanang epekto nako.”

Ang akong problema mao nga gihimo nakong komplikado kaayo ang pagpangandam sa komperensiya nga mibati na ko nga nabug-atan, nawad-an og kadasig, ug milangan niini hangtod sa kataposang segundo. Apan akong naamgohan nga ang pagpangandam dili kinahanglan nga pasobrahan—nagkinahanglan lang kini og gamay nga intensyon.

Ang Espirituwal nga Buhat sa Pagpaminaw sa Espiritu

Nakatabang kini kanako sa paghinumdom nga ang Langitnong Amahan ug si Jesukristo gusto nga mamulong ngari nako, apan kon wala ko mahisubay sa Espiritu, niana mas lisod ang pagpaminaw Kanila. Mao nga, ang yanong pagdapit sa Espiritu Santo ngari sa akong kinabuhi mao ang usa sa labing maayo nga mga paagi sa pagpangandam sa pagdawat og dugang nga kahayag, kahibalo, ug kaalam gikan sa langit.

Si Presidente Russell M. Nelson (1924–2025) midapit nato nga “[pilion] ang paghimo sa espirituwal nga buhat nga maoy gikinahanglan aron sa pagtagamtam sa gasa sa Espiritu Santo ug mas kanunay ug mas klaro nga pagpaminaw sa tingog sa Espiritu.”

Kining espirituwal nga buhat magsugod sa pag-ugmad og palibot diin ang Espiritu makapuyo. Ug dili kini kinahanglan nga komplikado!

Ania ang lima ka yanong mga ideya sa pag-andam sa inyong kasingkasing ug hunahuna alang sa kataposan sa semana nga kinatibuk-ang komperensiya.

1. Mobalik og Tan-aw sa Miaging mga Komperensiya

Hisgotan ang mga pakigpulong sa miaging komperensiya uban sa mga higala ug pamilya o tan-awon og balik ang imong kaugalingong mga gisulat. Hunahunaa ang inspirasyon nga imong nadawat kaniadto ug sa unsang paagi nga ang pagbuhat niini nakapanalangin sa imong kinabuhi.

Pinaagi sa pagtan-aw og balik sa atong miagi nga mga kasinatian uban a Espiritu Santo, kita mahimong pamilyar kon sa unsang paagi Siya mamulong ngari nato, ug kita maandam sa pagpaminaw Kaniya kon Siya mamulong ngari nato pag-usab.

2. Maminaw sa Makapabayaw nga Musika.

Maminaw sa makapabayaw nga musika sa mga semana paingon ngadto sa komperensiya. Pwede ang musika gikan sa hymnbook, sa Tabernacle Choir sa Temple Square, Strive to Be (ang opisyal nga channel sa musika alang sa mga batan-ong sumusunod ni Kristo), o bisan unsa nga butang nga makatabang nimo nga mas mapaduol sa Dios.

3. Himoa nga ang Imong mga Pangutana daling Makita

Isulat ang imong mga pangutana ug ibutang kini sa dapit nga makita ra sulod sa mga adlaw o semana paingon sa komperensiya. Mahimo nimo kining ibutang sa ubos sa samin, sa fridge, sa background sa imong selpon, bisan asa nga makita nimo kini kanunay.

Mas makadugang kini sa pagpamalandong ug makatabang nimo nga mas madawaton sa mga mensahe nga ipakigbahin atol sa komperensiya.

4. Mag-ampo aron Masayod Unsay mga Ipangutana

Kon sa imong pamati ikaw walay mga pangutana, mag-ampo ug mohangyo sa Dios nga tabangan ka nga masayod kon unsay ipangutana. Pwede nga mahitungod kini sa bisan unsa gikan sa pagpaabot og dagkong mga kausaban sa kinabuhi ngadto sa paghimo og ginagmay nga mga kausaban sa imong inadlaw nga mga pamatasan. Siya mogiya nimo sa pagpangutana og piho nga mga pangutana o mohatag nimo og tinguha sa pagkat-on pa og dugang mahitungod sa usa ka hilisgotan sa ebanghelyo sa dili pa moabot ang komperensiya.

Ang Langitnong Amahan nagtinguha gayod sa paggiya nato sa pagpadayon diha sa dalan sa pakigsaad. Ang pag-ampo alang sa mga pangutana nga angayng ipangutana mao ang usa ka paagi nga Siya makatabang nato sa pagpadayon ug sa pagpaminaw sa unsay gusto Niyang isulti nato pinaagi sa Iyang mga propeta ug apostoles.

5. Motan-aw sa mga Ehemplo sa Uban

Magtuon kon sa unsang paagi nga ang mga propeta (ug ang uban) nagtinguha ug nakadawat og mga tubag pinaagi sa Espiritu Santo. Mahimo nimong tun-an ang mga asoy sa kasulatan, mga pakigpulong sa komperensiya, o mga debosyonal. Mohatag og pagtagad ngadto sa mga istorya diin kini nga mga tawo nakadawat og mga tubag ug tan-awa kon giunsa nila sa pag-andam ang ilang kaugalingon sa pagdawat niadto nga mga tubag. Maningkamot sa paggamit sa pipila niini ka pamaagi nganha sa imong kaugalingong mga pagpangandam.

Pananglitan:

Samtang naghimo siya sa barko sumala sa mga instruksiyon sa Ginoo, si Nephi miadto sa bukid ug nag-ampo kanunay (tan-awa sa 1 Nephi 18:3).
Si Joseph Smith namalandong kon asa nga simbahan siya moapil ug nagtuon sa mga kasulatan, nga miresulta sa Unang Panan-awon (tan-awa sa Joseph Smith—Kasaysayan 1:10–11).
Si Presidente Nelson gusto nga makakat-on pa og dugang mahitungod sa pagpundok sa Israel, busa siya “[nagtuon sa] pagpundok, nag-ampo mahitungod niini, mibasa sa matag kasulatan nga dunay kalabotan, ug mihangyo sa Ginoo nga dugangan ang akong pagsabot.”

Ang paghimo niini makatabang nato nga maanaa sa matarong nga panghunahuna sa pagdawat sa unsay giandam sa Dios alang nato.

Pinaagi sa paggahin og panahon ug pag-andam og luna alang sa Espiritu Santo, atong giablihan ang atong kaugalingon sa pagpaminaw sa tingog sa Dios sa mas klaro nga paagi. Si Elder Dale G. Renlund sa Korum sa Napulog Duha ka Apostoles misaad, “Ang Espiritu Santo mahimo ug mopadayag sa tanan nga atong gikinahanglan aron mouswag ug magpadayon sa pagpakabuhi diha sa dalan sa pakigsaad.”

Sa usa ka paagi, gani mas naghinam-hinam ko alang sa komperensiya niining higayona, ug dili lang kay panahon kini sa Pasko sa Pagkabanhaw. Dili na ko makapaabot nga sulayan ang pipila niini nga mga ideya ug tan-awon kon sa unsang paagi nga ang akong pagpangandam makausab sa akong kasinatian. Tan-awa usab kon sa unsang paagi nga kini makausab pud kaninyo!