Balaanon nga Pagkatawo: Ang Kamatuoran sa Ebanghelyo nga Nakapausab sa Akong Kinabuhi

Usa ka makapausab sa kinabuhi nga kamatuoran sa ebanghelyo ni Jesukristo mao nga kita mga anak sa langitnong mga ginikanan.

Si Elder Patrick Kearon sa Korum sa Napulog Duha ka Apostoles mitudlo mahitungod sa “naglangkob sa tanan nga gasa sa mahangtorong kamatuoran nga moabag sa atong abilidad sa pagdawat sa tanang gitinguha sa atong Amahan nga ihatag kanato uban sa—usa ka importante nga gasa sa kahibalo nga, kon hingpit nga angkonon ug dawaton sa kahiladman sa kalag, mopahimutang sa mga kalipay ug mga kalisod sa kinabuhi ug sa atong wala pa matubag nga mga pangutana: Kini mao nga kita mga anak gayod sa Dios.”

Sukad niana nga kasinatian sa akong tawag sa misyon, akong gibati ang kamatuoran niadto nga mga pulong. Wala gayod nako mahikalimti kon unsa ang pasalig ug kalig-on nga akong gibati sa dihang akong naamgohan nga ang Dios nakaila kanako ug nahigugma kanako.

Bisan pa niini nga kamatuoran, ang kalibotan sa akong palibot wala kaayoy mahimo sa pagpahinumdom kanako sa akong balaanong kagikan. Nakaamgo ko nga kinahanglan nakong tuyoon ang paghinumdom sa akong balaanong pagkatawo ug sa gahom nga moabot niini.

Para nako, naglakip kini sa mga butang sama sa pagpamalandong sa milagro sa akong lawas ug sa unsay gitugot niini nga akong mabuhat ug masinati kada adlaw.

Gibati usab nako nga konektado ako sa akong Tiglalang kon naa ko sa kahilom sa kinaiyahan. Ang pagtan-aw sa katahom sa kabukiran o sa pagsalop sa adlaw nagpahinumdom kanako nga ang Diyos dili kinahanglang magpatahom sa yuta. Apan Siya ug si Jesukristo mibuhat niana alang kanato tungod kay gusto Nila nga kita makatagamtam sa mga katingalahan niini nga kalibotan ug mapahinumdoman sa Ilang gugma (tan-awa sa Moises 6:63).

Ug ang pag-ampo ngadto sa Langitnong Amahan matag adlaw—pagpahibalo Kaniya sa akong gibati ug ang pagkaamgo nga gusto Niyang maminaw ug mamulong kanako—nagtabang kanako nga molawom sa akong balaanong koneksyon ngadto Kaniya. Ang pag-ampo nagpahinumdom kanako nga wala ako mag-inusara ug nga Siya naggiya kanako, bisan kon ang unsay akong gusto wala mahitabo karon. Misalig ko nga Siya, usa ka mahigugmaong Amahan, nasayod kanus-a ang saktong panahon alang sa piho nga mga panalangin nga moabot sa akong kinabuhi.

Ang akong misyon dili sama sa akong gilaoman, apan aduna koy mga kasinatian nga nakatabang nako nga masabtan kon nganong gusto sa Langitnong Amahan nga maanaa ko sa dapit sa akong panimalay. Ang pagpakigbahin sa kamatuoran sa balaanong pagkatawo niadtong wala pa makahibalo niini kaniadto mipuno kanako sa kalipay.

Dili nako mahanduraw ang kinabuhi nga wala makaila kon kinsa gayod ako—tingale mobati ko og kahaw-ang ug pagkahisalaag.

Kon akong hunahunaon ang katuyoan sa akong kinabuhi, naghatag kini kanako og dakong paglaom nga makahibalo nga ang mortalidad usa lamang ka gamay nga bahin sa plano sa Langitnong Amahan alang kanako. Makahimo ko, makakat-on, ug mahimong mas labaw pa kay sa kon kinsa ako karon tungod sa balaanong gasa sa kinabuhi nga Iyang gihatag kanako isip Iyang anak. Mapasalamaton kaayo ko nga Iyang gihalad ang Iyang pinalanggang Anak isip akong Manluluwas ug nga Iya kong gitugotan nga mopili sa pagsulod sa mortalidad aron mahimong sama Kaniya ug mopauli.

Bisan unsa pa nga mga pagsulay ang inyong masinati sa kalibotan, hinaot nga kanunay ninyong mahinumdoman kon si kinsa kamo. Kana nga kamatuoran maghatag kaninyo og gahom sa pag-atubang sa bisan unsa nga moabot kaninyo.

Sama nga ang Dios midungog kanako sa panahon sa akong pagkadesperado, ako nasayod nga Siya kanunay nga naminaw ug nahigugma usab kaninyo.