Paggamit sa Daang Tugon nganha sa Imong Kinabuhi
2 ka Istorya gikan sa Exodo nga Nagpakita Kon sa Unsang Paagi nga ang Dios Makatabang Nimo nga Mabuntog ang Imposible Kaayo nga mga Kalisdanan
Ayaw gayod kalimot—ikaw anaa sa mga kamot sa usa ka Dios sa mga milagro.
Sa dihang una kong giaghat sa pagserbisyo og misyon, dili ko makatuo nga makahimo ko niini. Kanunay ko nga maulawon, ug wala ko kahibalo unsaon nako paggahin ang 18 ka bulan sa pagpaki-istorya sa mga estranghero.
Ang kabalaka mas migrabe sa dihang gitawag ko sa pagserbisyo sa lahi og pinulongan.
Apan miserbisyo ko, ug sa pagtan-aw og balik, akong nakita nga wala gyod ko mag-inusara. Gitawag ko sa Langitnong Amahan, ug Siya nag-uban nako sa matag lakang sa dalan.
Si Presidente Thomas S. Monson (1927–2018) balikbalik nga mitudlo: “Kon kita anaa sa buluhaton sa Ginoo, may katungod kita sa panabang sa Ginoo. Hinumdomi nga kon si kinsa ang tawagon sa Ginoo, ang Ginoo mohimo kaniyang sarang.” Ang Dios mipamatuod og balikbalik sa kamatuoran niana nga baroganan.
Kon nag-atubang ka og mga hagit ug bisan og maayo apan makahahadlok nga oportunidad, Siya mahimong mopasarang usab kanimo—apan kon magduhaduha gihapon ka sa imong kaugalingon o sa imong mga abilidad (nga maoy gihimo natong tanan usahay), ang duha ka istorya gikan sa basahon sa Exodo nagpakita kon sa unsang paagi nga Siya makatabang nimo sa pagbuntog sa imposible kaayo nga mga kalisdanan.
Ang Dios Nagpakabana sa Iyang Katawhan
Diha sa Exodo 1 mabasa nato ang bahin sa duha ka Hebreohanon nga mga mananabang, si Sipra ug si Pua, kinsa nakakaplag sa ilang kaugalingon diha sa lisod kaayo nga sitwasyon. Ang ilang katungdanan mao ang paghimo sa Hebreohanon nga mga babaye ug sa ilang mga anak nga luwas ug himsog. Ang mando sa Paraon nga patyon ang matag batang lalaki nga Hebreohanon sa direktang paagi nahisupak sa ilang mithi ug pagtuo, apan ang pagsupak sa mando mahimong kinabuhi nila ang ibayad.
Pero, si Sipra ug si Pua “nahadlok sa Dios” (Exodo 1:17) kaysa Paraon ug midesisyon nga dili mosunod sa mando. Ug tag-ana unsa? “Ang Dios nagbuhat og maayo sa mga mananabang” (Exodo 1:20) ug giluwas silang duha ug ang ilang mga panimalay (tan-awa usab sa bersikulo 21).
Usa lamang kini ka ehemplo sa pagtuman sa Dios sa Iyang saad nga gihimo diha sa Isaias: “Ayaw kahadlok kay mag-uban ako kanimo; ayaw kabalaka kay ako mao ang imong Dios; lig-onon ug tabangan ko ikaw, panalipdan ug luwason” (Isaias 41:10).
Kon ikaw mopili sa pagbuhat sa unsay matarong, ang Dios nagsaad sa pagpanalangin kanimo, ug Siya dili gayod mopakyas og saad. Kadto nga mga panalangin tingali dili moabot dihadiha dayon kon kanus-a kita nagkinahanglan niini, apan kini moabot gayod.
Ang Dios usa ka Dios sa mga Milagro
Sa dihang si Moises gitawag aron makalingkawas ang mga Israelita gikan sa pagkaulipon didto sa Ehipto, ang sitwasyon nakapahimo niining lisod kaayo nga mahitabo. Gani, ang Ehipto usa sa labing gamhanan nga mga nasod sa kalibotan nianang panahona, ug ang kataposang higayon nga si Moises anaa didto, miikyas siya isip usa ka pugante!
“Kinsa man ako,” siya nangutana, “nga imong paadtoon sa hari sa Ehipto aron pagkuha sa mga Israelita?” (Exodo 3:11).
Ug kon si Moises lang ang naghimo niini nga misyon, niana oo, siya tingali mapakyas. Apan wala siya mag-inusara. Ang iyang tawag nagagikan sa “usa ka Dios sa mga milagro” (Mormon 9:11) nga adunay gahom nga ang sungkod mahimong bitin, nga ang mga suba mausab ngadto sa dugo, ug mibahin sa Pulang Dagat.
Ang istorya ni Moises usa lamang ka ehemplo kon sa unsang paagi nga “ang Ginoo dili mohatag og mga sugo ngadto sa mga anak sa katawhan, gawas kon mag-andam siya og paagi nga ilang matuman ang mga butang nga iyang gisugo kanila.” (1 Nephi 3:7).
Ang Kadaogan Naangkon Na
Kon ikaw mibati nga nag-atubang og imong kaugalingong imposible kaayo nga kalisadanan ug naghunahuna kon ikaw makabuntog ba niini, si Elder Patrick Kearon sa Korum sa Napulog Duha ka Apostoles namulong kanimo: “Ang tubag oo. Makasugakod kamo. Kamo sa pagkatinuod naluwas na; kamo naluwas na—pinaagi sa Usa kinsa miantos sa mismong kasakit nga inyong giantos ug milahutay sa mismong paghingutas nga inyong gilahutay. Si Jesus mibuntog sa mga pag-abuso niini nga kalibotan aron sa paghatag kaninyo og gahom dili lamang sa pagsugakod apan sa umaabot, pinaagi Kaniya, sa pagbuntog ug gani sa pagdaog.”
Tungod ni Jesukristo, gidaog na sa maayo ang daotan. Walay makausab sa kamatuoran nga Siya nag-antos ug namatay alang nimo, ug walay butang nga imong nasinati nga Siya dili makasabot ug mahibalo kon unsaon pag-ayo (tan-awa sa Alma 7:11–13).
Ang pagtan-aw og balik sa mga panahon nga ang Langitnong Amahan mitabang sa Iyang mga anak—lakip na sa akong kaugalingon—nakapalig-on sa akong pagtuo nga Siya motabang nako pag-usab. Wala kana magpasabot nga ang tanang hagit mawala, apan ang pagkasayod nga ako anaa sa mga kamot sa usa ka Dios sa mga milagro nakahatag nako og pagsalig nga kinahanglan ko nga magpadayon sa pagsunod Kaniya.
Ikaw makahimo sa pagbuntog. Ikaw makahimo sa paglampos. Ikaw makahimo sa pagtuman sa unsay gihangyo sa Langitnong Amahan kanimo. Tungod kay pinaagi sa pagpili nga mosunod Kaniya, makabaton ka sa Iyang gahom—ug gugma—diha sa imong kiliran.