Alang sa mga Amahan sa Gagmayng mga Bata
5 ka Butang nga Kinahanglang Mahibaloan sa Matag Bag-ong Papa
Dili sayon nga mahimong usa ka papa. Apan ang Langitnong Amahan mihatag nato og daghang himan sa pagtabang alang sa kausaban.
Daghan kaayo ko og gibati sa dihang nag-andam nga mahimong usa ka amahan.
Ako dili segurado, nahadlok, ug mas medyo kuryuso kon unsa kaha ang mahitabo. Sa dihang natawo na gayod ang among anak nga lalaki, natingala ko ug nahingangha kon unsa ka dako sa gugma ang akong gibati alang niining bag-ong gamay nga bata.
Ang pagkaamahan dili sayon. Ang pagkaginikanan lisod. Apan nasayod kita nga pinaagi ni Jesukristo, ang tanan natong palas-anon mapagaan. Naghunahuna niana, bag-o man ka man nga papa o dugay na, ania ang lima ka baroganan sa ebanghelyo nga makatabang nimo diha sa dalan sa pagkaamahan.
1. Ang Dios mao ang imong Langitnong Amahan, ug Siya mao usab ang Amahan sa imong anak.
Gusto nimong buhaton tanan kutob sa imong mahimo sa pagpanalipod ug paghigugma sa imong anak. Nindot kini (ug medyo makakutas) nga pagbati! Apan makapaneguro ka nga ang Langitnong Amahan gusto usab unsay labing maayo alang sa imong anak ug motabang nimo kon ikaw modangop ngadto Kaniya.
Pagkanindot sa pagbati nga mapahiuyon gayod ngadto sa atong Langitnong Amahan!
2. Sa imong pagsakripisyo, makakaplag ka og kalinaw.
Ang pagkaamahan mao ang dalan ngadto sa pipila sa hilabihan nga kalipay nga atong masinati niini nga kinabuhi. Nagkinahanglan usab kini og sakripisyo.
“Alang sa mga lalaki, ang pagkaamahan nagpakita kanato sa atong kaugalingong mga kahuyang ug sa atong panginahanglan nga molambo,” mitudlo si Presidente D. Todd Christofferson, Ikaduhang Magtatambag sa Unang Kapangulohan. “Ang pagka-amahan nagkinahanglan og sakripisyo, apan tinubdan kini sa walay sama nga katagbawan, gani hingpit nga kalipay. … Si Jesus miingon, ‘“Walay bisan kinsa nga may gugma nga labaw pa niini, nga ang usa ka tawo magahalad sa iyang kinabuhi sa pagpakamatay alang sa iyang mga higala’ [Juan 15:13]. Ang mga amahan nagpakita niana nga gugma sa ilang pagpakabuhi matag adlaw, naghago sa pagserbisyo ug pagsuporta sa ilang mga pamilya.”
3. Ang buluhaton sa mga amahan diha sa patas nga panag-uban sa ilang mga asawa.
Si Elder Ulisses Soares sa Korum sa Napulog Duha ka Apostoles mitudlo: “Ang pag-amuma ug pagdumala magkalambigit ug magkadugtong nga mga responsibilidad, nga nagpasabot nga ang mga inahan ug mga amahan ‘adunay katungdanan sa pagtabang sa usag usa ingon nga magkauban’ ug adunay balanse nga pagdumala sa ilang panimalay.”
Kinahanglan nga magkahiusa kita sa atong mga asawa sa tanan natong buhaton, ilabi na sa pag-atiman ug pag-amuma sa atong mga pamilya. Walay sakop sa panag-uban nga mas menos o mas labaw kaysa usa; kita kinahanglan nga patas. Sa laing pagkasulti, wala ka mag-inusara!
4. Ang pagkapari makapanalangin sa imong pamilya.
Si Presidente Harold B. Lee (1899–1973) mitudlo: “Wala pa sukad ang gahom sa [pagkapari], nga inyong gihuptan, labaw pa ka maanindot kay sa panahon sa usa ka krisis diha sa inyong panimalay, sa usa ka grabe nga sakit, o sa pipila ka dagkong desisyon nga kinahanglan nga pagahimoon. … Lakip sa gahom sa [pagkapari], nga mao ang gahom sa Langitnong Dios, mao ang gahom sa paghimo og mga milagro kon ang Ginoo magbuot niini, apan aron kita makagamit niana nga [pagkapari], kita kinahanglan nga takos sa paggamit niini. Ang pagkapakyas sa pagsabot niini nga baroganan mao ang pagkapakyas sa pagdawat sa mga panalangin sa paghupot nianang gamhanan nga [pagkapari].”
Ang pagkapari sa Dios gihatag ngari nato alang sa kaayohan niadtong anaa sa atong palibot, ilabi na sa atong kaugalingong mga pamilya. Buhata ang imong labing maayo aron mahimong takos niana nga awtoridad sa pagkapari. Gamita kini sa pagpanalangin sa kinabuhi sa imong asawa ug mga anak.
5. Ang Langitnomg Amahan mopalambo sa imong mga paningkamot.
Ingon og sayon ra kaayo nga mobati nga murag dili igo ang imong gihimo alang sa imong pamilya. Si Presidente Christofferson namulong ngadto sa mga amahan, nga nag-ingon: “Nasayod ko nga nanghinaot mo nga mas hingpit pa unta kamo nga amahan. Nasayod ko nga nanghinaot pod ko sa akong kaugalingon. Bisan pa niana, bisan pa sa atong mga limitasyon, mopadayon kita. Isalikway nato ang nanobra nga mga ideya sa pagtagbaw sa kaugalingon ug sa pagbuhat sa unsay atong gusto nga maoy kultura karon ug unahon paghunahuna ang kalipay ug kaayohan sa uban. Sigurado, bisan pa sa atong mga kakulangan, ang atong Langitnong Amahan mopalambo kanato ug mohatag og maayong resulta sa atong yanong mga paningkamot.”
Mosalig nga ang Dios adunay daghang mahimo kanimo kaysa imong mahimo sa imong kaugalingon.
Sa mga papa parehas nako, ang Dios nahigugma ninyo. Siya nahigugma sa inyong pamilya. Siya moatiman ninyo samtang magtinguha kamo sa Iyang tabang, mohimo ni Jesukristo nga pundasyon sa inyong panimalay, ug mohimo sa inyong labing maayo sa pagdumala sa inyong pamilya diha sa gugma ug pagkamatarong.