Gikan sa YA Matag Semana
Nahadlok Mopakigbahin sa Imong Pagpamatuod? 3 ka Paagi nga ang Pasko sa Pagkabanhaw Makapasayon sa Pagpamatuod kang Kristo
Ang panahon sa Pasko sa Pagkabanhaw nakatabang nako sa pagkaigbahin sa akong pagpamatuod ngadto sa uban, ug makatabang usab kini kanimo.
“Mormon ka, di ba? Bahin sa unsa man kana?”
Ang unang higayon nga ang usa ka tawo nangutana nako mahitungod sa pagkahimong usa ka miyembro sa Ang Simbahan ni Jesukristo sa mga Santos sa Ulahing mga Adlaw mao kadtong atol sa usa ka party sa middle school. Maulaw ko nga makighigala, ug ang relihiyon sensitibo nga hisgotanan sa dapit diin ko nagpuyo.
Mao nga nasagol-sagol nako ang mahitungod sa propeta ug sa mahangtorong pamilya, ug paghuman sa party, nagdalidali ko nga mipauli sa balay.
Nasagmuyo ko sa akong kaugalingon—napakyas ko sa pagpasabot kon unsa ka importante sa ebanghelyo ngari kanako.
Samtang nagsige ko og hunahuna sa akong pagpamatuod, akong naamgohan nga ang Pagkabanhaw ni Jesukristo mao ang pundasyon sa tanang butang nga akong ganahan sa ebanghelyo. Ang pagpakigbahin sa kamatuoran dili na kaayo lisod sa umaabot kon gusto ko nga mopakigbahin sa akong pagtuo.
Ug kining pundasyon nga kamatuoran mao ang hinungdan sa Pasko sa Pagkabanhaw—si Jesukristo, Iyang Pagkabanhaw, ug kon unsay kahulogan sa Iyang matubsanong gahom alang nato. Alang niadtong mibati og pagpanagana sa pagpakigbahin sa ilang pagpamatuod, ang panahon sa Pasko sa Pagkabanhaw makapasayon sa pagpakigbahin sa kamatuoran! Ania ang pipila lamang ka butang nga mahimo nimong buhaton:
1. Maghisgot kang Kristo
Bisan kon dili tanan ang nagsaulog sa Pasko sa Pagkabanhaw, kadaghanan sa mga tawo nakasabot sa kamahinungdanon niini alang niadtong mituo ni Jesukristo. Ug ang labing maayo nga paagi nga atong mapakigbahin ang atong pagtuo diha Kaniya mao lamang ang paghisgot mahitungod Kaniya. “Naghisgot kami kang Kristo, nagmaya kami diha kang Kristo, nagsangyaw kami mahitungod kang Kristo, ug nanagna kami mahitungod kang Kristo.” (2 Nephi 25: 23, 26).
Ang paghisgot kang Kristo dili kinahanglan nga komplikado. Pananglitan, kon ang usa ka higala mangutana kon unsay imong buhaton sa Pasko sa Pagkabanhaw, mao kini ang tukmang higayon nga imong ipakigbahin kon unsa ka mahinungdanon kining espesyal nga adlaw nganha nimo. Ang yanong pag-ingon nga “Ang Pasko sa Pagkabanhaw sa kanunay naghatag nako og paglaom nga makita nako ang akong mga minahal pag-usab” makapasugod og natural nga panag-istoryahanay mahitungod sa plano sa kaluwasan o mahangtorong mga pamilya.
Kon ang usa ka tawo maghisgot og mga kagubot nga nahitabo sa kalibotan, ang yanong tubag sama sa “Mao nga ganahan ko sa Pasko sa Pagkabanhaw— naghatag kini nako og hilabihan nga kalinaw nga mahibalo nga si Jesukristo moanhi pag-usab” makaabli og panag-istoryahanay mahitungod sa imong pagtuo.
Kon ang usa ka tawo mobisita sa imong panimalay ug makamatikod og bisan unsa nga dekorasyon sa Pasko sa Pagkabanhaw nga anaa sa imong panimalay nga nagtudlo ngadto sa Manluluwas, sultihi sila mahitungod Kaniya. Ug ayaw ipakaubos ang gahom sa pagpakigbahin sa imong pagtuo kang Kristo diha sa social media. (Ang mga account sa Simbahan adunay nindot nga content nga angay nga i-repost ug i-share!)
2. Mokonektar Pinaagi sa mga Tradisyon
Ang lainlaing mga kultura nagsinati sa Pasko sa Pagkabanhaw, mao nga nindot kini nga panahon sa pagkonektar ngadto sa uban pinaagi sa usa ka gipakigbahin nga gugma sa Manluluwas. Ang Unang Kapangulohan bag-ohay lang nga miawhag nato sa pagbuhat niini pinaagi sa “[pag-establisar] og mga tradisyon sa Pasko sa Pagkabanhaw diha sa atong katilingban sa kinatibuk-an.”
Mahimo nimo kini pinaagi sa pagpangutana sa uban kon sa unsang paagi nga sila naghinumdom ni Kristo atol sa Pasko sa Pagkabanhaw o unsa ang kahulogan alang nila niini nga panahon sa tuig. Dayon hunahunaa unsa nga mga tradisyon ang gihimo na nimo sa pagsentro Kaniya sa imong kaugalingong mga pagsaulog ug unsaon nga mapakigbahin nimo kana ngadto sa ubang mga sumusunod ni Kristo.
Pananglitan, sa akong pamilya, moapil kami kanunay sa choir sa ward panahon sa Pasko sa Pagkabanhaw sa pagpasundayag sa mga himno mahitungod sa Pagkabanhaw ni Kristo. Mao kini ang usa sa akong paborito nga mga tradisyon, ug usa ka kini ka butang nga sayon hisgotan ngadto sa ubang mga tawo.
3. Motudlo ngadto sa Iyang Buhi nga mga Saksi
Ang kasamtangang mga propeta ug apostoles nagpamatuod ni Kristo. Ang pagpakigbahin sa ilang yano, tinuod nga mga pagtulun-an mahitungod sa Pasko sa Pagkabanhaw makatabang nato sa pagpasabot sa atong pagtuo ngadto niadtong wala kaayoy nahibaloan mahitungod niini.
Si Presidente Dallin H. Oaks mipamatuod: “Atong gisaulog ang katinuod sa Pagkabanhaw niining panahon sa Pasko sa Pagkabanhaw. Kini naghatag nato sa panglantaw ug kalig-on sa paglahutay sa mortal nga mga hagit nga giatubang sa matag usa kanato ug niadtong atong gihigugma.”
Ang pagtudlo sa uban ngadto sa buhing mga propeta ug sa ilang mga pagtulun-an makatabang nila nga makasabot sa atong gituohan diha sa moderno nga pagpadayag nga nagagikan sa usa ka buhi, nabanhaw nga Manunubos. Ang Pasko sa Pagkabanhaw mao ang tukmang panahon sa pagpakigbahin mahitungod sa buhi nga mga propeta ug buhi nga Kristo.
Samtang nagtan-aw ko niini nga mga matang sa mga kahigayonan sa Pasko sa Pagkabanhaw, nakahimo ko og daghang pakighinabi mahitungod sa ebanghelyo ug nalingaw niini. Nakatabang kini kanako nga mabuntog ang daghang kaulaw nga akong nasinati sa batan-on pa, ug nakakonektar ko sa mga tawo sa mas lawom nga paagi samtang nagkat-on sa usag usa.
Mao nga niini nga Pasko sa Pagkabanhaw, nagkanta man ka sa choir, nagpakigbahin og kasulatan, yanong nagtubag sa pangutana sa usa ka higala, hinumdomi—ikaw nagpamatuod sa labing importante nga kamatuoran nga anaa niini: nga si Jesukristo buhi.