Nagatuo Ako
Ang Kaulaw Mibira Kanako Palayo. Ang Gugma sa Dios Midala Nako og Balik
Ang kaulawan tungod sa akong dili maayo nga mga pagpili hinayhinay nga mibabag sa akong abilidad sa pagbati sa gugma sa Dios. Apan sa gihapon, ang Iyang gugma miluwas kanako.
Saving That Which Was Lost [Pagluwas Nianang Nawala], ni Michael Malm
Nag-edad ko og 14 sa dihang ang akong mga ginikanan nagdiborsyo, ug ang makita nga ang akong pamilya nagkabulag makaguba sa kasingkasing. Mikuyog ko ni papa, ug bisan kon iyang gihimo ang iyang labing maayo sa pag-atiman nako, naglisod gyod ko sa pag-adjust. Nagkadepresyon ko ug nabalaka ug sa tinuoray mibati nga nag-inusara.
Usa ka adlaw naghunahuna ko kon ang kalibotan ba mas mahimong maayo kon wala ko. Apan nakadungog ko og tingog sa akong hunahuna nga nag-ingon, “Ikaw importante ngari kanako. Gihigugma ko ikaw.”
Nasayod ko karon nga ang Espiritu mipakigbahin niana nga mensahe ngari nako gikan sa Langitnong Amahan. Ang Iyang walay kinutobang gugma mibira nako gikan sa akong labing lisod nga gutlo, naghatag nako og paglaom.
Paglabay sa usa ka bulan, ang mga misyonaryo nanuktok sa among pultahan. Samtang sila mitudlo nako ug sa akong papa, sa kataposan akong nasabtan nga ako adunay katuyoan dinhi.
Akong nakat-onan nga ang matahom nga mga gasa sa akong kinabuhi nagagikan sa gugma sa Dios alang nako, ug gusto nakong ipakita nga gihigugma usab nako Siya. Busa ang akong papa ug ako nabunyagan.
Nagtuo ko nga wala nay makababag sa akong abilidad sa pagbati sa gugma sa Dios, apan nasayop ko.
Pagtipas sa Dalan
Paglabay sa panahon, sa dihang ang kinabuhi lisod kaayo, mihimo ko og dili maayo nga mga pagpili. Wala na ko mosunod sa Pulong sa Kaalam, ug gipalibotan ang akong kaugalingon og negatibo nga mga impluwensya. Ang akong kaulaw mipatigbabaw sa akong abilidad sa pagbati sa gugma sa Dios alang nako, mao nga mipalayo ko sa Simbahan. Ang akong papa mihunong usab sa pagsunod sa ebanghelyo.
Maghunahuna ko bahin sa pagtuo usahay, apan nahadlok ko kon unsa kahay hunahuna sa mga tawo—ug sa Dios—kon mobalik ko sa simbahan. Mao nga nagpadayon ko sa dalan nga akong gilaktan.
Sa kaulahian, ang akong papa ug ako mibalhin ngadto sa laing nasod. Wala kami pamilya o mga higala didto, walay trabaho, walay kwarta, ug walay sakyanan. Apan maayo nalang, nahimamat namo ang lokal nga mga miyembro sa Simbahan, sila miatiman namo. Sila nahigugma namo sama sa paghigugma ni Jesukristo namo. Akong naamgohan pinaagi nila nga ang Langitnong Amahan nahigugma gihapon nako ug ganahan Siya nga mobalik ko.
Mao nga sa dihang kini nga mga higala midapit namo nga mobalik sa simbahan, among gidawat.
Ang Nawala nga Anak Mibalik
Nahadlok ko nga ang uban mohukom nako sa akong mga pagpili. Apan sa dihang mibalik ko sa simbahan sa unang higayon, ang tanan mabination kaayo.
Gibati nako ang nawala nga anak, nga mibalik sa iyang amahan ug mikompisal sa iyang mga sala (tan-awa sa Lucas 15:18–21). Ug sama sa nawala nga anak, gibati nako ang gugma sa akong Amahan, nga mihangop nako sa akong pagbalik ug nagsaulog sa akong pagpauli (tan-awa saLucas 15:20–24). Mibalik ko tungod kay ako nahigugma Kaniya, ug Siya mihangop nako sa akong pagpauli tungod kay Siya nahigugma nako.
Andam ko nga mohimo og mga kausaban sa paagi sa akong pagpakabuhi.
Human nga ako nakahinulsol ug nagsubay na usab diha sa ebanghelyo, nangandam ko sa pagserbisyo og misyon. Ako adunay pipila ka higala nga naglibog sa akong mga pagpili, apan determinado ko nga magpabilin diha sa bag-ong dalan.
Samtang anaa ko sa missionary training center, akong nahibaloan nga ang duha niadto nga mga higala miadto sa party ug namatay sa aksidente sa sakyanan. Naguol ko ug sa kalit lang nakaamgo nga ang akong kinabuhi natapos na unta kon wala pa ko mag-usab sa paagi sa akong pagpakabuhi. Ang paghinumdom sa gugma sa Dios miluwas nako pag-usab.
Paghangop sa Gugma sa Dios
Daghan ko og nasinati sa tibuok nakong kinabuhi, apan ang labing importante nga leksiyon nga akong nakat-onan mao nga ang matag mahinungdanong punto sa pagbalik sa akong kinabuhi, ang pag-ila sa hingpit nga gugma sa Dios alang nako miluwas nako gikan sa hilabihan nga pag-antos.
Usahay, kon motan-aw ka sa samin, sayon ra ang pagtan-aw sa imong kaugalingon ug moingon nga dili igo ang imong kamaayo—nga ikaw walay kalainan sa imong labing dili maayo nga mga sayop. Apan dili ingon niana ang pagtan-aw sa Dios kanimo.
Si Presidente D. Todd Christofferson, Ikaduhang Magtatambag sa Unang Kapangulohan, nagpahinumdom nato: “Tungod kay [ang Langitnong Amahan ug si Jesukristo] nahigugma kaninyo, Sila dili gusto nga mobiya kaninyo ‘[kon unsa kamo karon].’ Tungod kay Sila nahigugma kaninyo, Sila gusto nga kamo makabaton og hingpit nga kalipay ug kalamposan. Tungod kay Sila nahigugma kaninyo, Sila gusto nga kamo maghinulsol tungod kay kana mao ang dalan ngadto sa kalipay. Apan inyo ang pagpili—Sila motahod sa inyong kabubut-on. Kinahanglan gayod kamo mopili sa paghigugma Kanila, sa pagserbisyo Kanila, sa pagtuman sa Ilang mga sugo. Dayon Sila makapanalangin kaninyo og mas buhong ingon man mohigugma kaninyo.”
Sabta nga ang Langitnong Amahan nahigugma gayod kanimo nga Iyang gipadala ang Iyang Anak, si Jesukristo, aron sa pag-ula alang sa imong mga sala, naghimo kanimo nga makabalik ngadto Kaniya. Siya dili gusto nga ikaw motago gikan Kaniya; gusto Niya nga ikaw mobalik ngadto kaniya.
Kon ikaw nasaag, dili pa ulahi nga mohangop sa Iyang gugma alang nimo. Dili pa ulahi nga mobalik, ug kon kana imong buhaton, Sila magsaulog sama sa mahigugmaong magbalantay sa karnero, nga nag-ingon, “Maglipay kita kay akong nakaplagan ang nawala kong karnero” (Lucas 15:6).