Usa ka Giya sa Daang Tugon aron sa Pagdawat sa Balaanong Kailhanan

In The Beginning Was the Word [Sa Sinugdan Mao na ang Pulong], ni Eva Timothy, mahimong kopyahon alang lamang sa paggamit diha sa Simbahan

Mamakak ko kon sultihan ko kamo nga wala gayod ako mangutana sa akong tahas diha sa plano sa Dios.

Unsaon man nako—sa akong pagkadili hingpit—nga posibleng mohaom sa Iyahang hingpit nga plano? Unsaon man nako nga mahimong takos sa ikaduhang mga kahigayonan nga balik-balik nga gihatag sa Langitnong Amahan nako? Unsaon man nako nga masaligan sa pagpakigbahin sa Iyang gugma ngadto sa uban kon ako gani usahay naglisod man nga mobati niini sa akong kaugalingon?

Kon kini nga pabalik-balik nga negatibong hunahuna mura og pamilyar, wala ka mag-inusara.

Usa sa labing dakong taktika sa kaaway mao ang pag-atake sa atong panabot bahin sa balaanong kailhanan. Si Elder Brian K. Taylor sa Seventy mitudlo, “Kining dako nga gubat batok sa balaang pagkatawo pintas nga miulbo isip nagkamaayong paagi ni Satanas sa pagguba sa atong gituohan ug kahibalo sa atong relasyon sa Dios.”

Maayo na lang, ang Langitnong Amahan nagtudlo—ug nagpadayon sa pagtudlo—sa Iyang mga anak mahitungod sa ilang bili. Gikan sa sinugdanan pa lang, ang katawhan diha sa mga kasulatan tingali naglisod sa pagsabot sa pipila sa sama nga mga pangutana nga tingali naa nimo ug nako karon.

Samtang magtuon ka sa Daang Tugon karong tuiga, ikaw makakat-on mahitungod sa imong kaugalingon nga balaanong kailhanan pinaagi sa paggamit sa mga kasinatian sa katawhan diha sa mga kasulatan ngadto sa imong kaugalingong kinabuhi. Ug tingali imong makaplagan ang mga tubag sa importante kaayo nga pangutana sa imong pagpadayon:

Kinsa ako?

Diha ni Adan ug ni Eva nagsugod gayod ang panginahanglan sa katawhan nga makasabot sa balaanong kailhanan. Ang Langitnong Amahan milalang nila diha sa Iyang kaugalingong panagway, ug mihatag nila og pagkatinugyanan ibabaw sa kalibotan ug sa tanang nilalang diha niini, ug misugo nila nga magpasanay ug pun-on ang yuta (tan-awa sa Moises 2:26–28).

Isip kaliwat ni Adan ug Eva, magamit nimo kining sama nga baroganan sa kailhanan diha sa imong kaugalingon. Ikaw literal nga espiritung anak sa Dios nga adunay balaang responsibilidad nga mobuhat isip maalamon nga tinugyanan ug magmugna og mahangtorong pamilya.

Sa dihang si Adan ug si Eva mikaon sa bunga sa kahoy sa kahibalo sa maayo ug sa daotan, sila gipapahawa gikan sa Tanaman sa Eden. Bisan kon sila gipapahawa gikan sa atubangan sa Langitnong Amahan, sa temporal ug espirituhanong paagi, Siya mihatag og Manluluwas aron motabang nila nga mabuntog ang pisikal ug espirituhanong kamatayon pinaagi sa Pag-ula ni Jesukristo.

Sama ni Adan ug Eva, ang imong bili “mahinungdanon sa panan-aw sa Dios” (Doktrina ug mga Pakigsaad 18:10).

Ang istorya ni Abraham direktang nabugkos sa balaanong kailhanan. Ang Ginoo mihimo og saad nga adunay mahangtorong sangpotanan ngadto ni Abraham:

“Hatagan ko ikaw ug daghang kaliwat ug mahimo silang dakong nasod, panalanginan ko ikaw ug himoon kong bantogan ang imong ngalan aron mahimo kang panalangin alang sa uban:

“Panalanginan ko kadtong magapanalangin kanimo, apan tunglohon ko kadtong magtunglo kanimo: pinaagi kanimo, panalanginan ko ang tanan nga nasod sa kalibotan” (Genesis 12:2–3).

Human sa daghang tuig nga pagpaabot nga dunay pagtuo, si Abraham ug Sara gipanalanginan sa pagkatawo sa ilang anak nga lalaki, si Isaac. Ang Dios dayon misugo ni Abraham sa pagsakripisyo kang Isaac isip “simbolo sa Dios ug sa iyang Bugtong Anak” (Jacob 4:5). Sa dihang gipakita ni Abraham nga siya andam sa paghimo niadto nga sakripisyo, siya gipugngan sa anghel sa Ginoo.

Atong mabasa:

“Tungod sa akong kaugalingon nanumpa ako, nagaingon ang Ginoo, nga tungod kay gibuhat mo kini ug wala ka magdumili kanako sa imong anak, sa imong bugtong anak:

“Sa pagpanalangin, ikaw pagapanalanginan ko, ug sa pagpadaghan, pagapadaghanon ko ang imong kaliwatan ingon sa mga bituon sa langit, ug ingon sa balas nga atoa sa baybayon sa dagat; ug ang imong kaliwatan manag-iya sa mga ganghaan sa iyang mga kaaway;

“Ug diha sa imong kaliwat mapanalanginan ang tanan nga mga nasod sa yuta, kay gituman mo ang akong tingog” (Genesis 22:16–18).

Kining gamhanan nga istorya nagtudlo nga tanan nga naghimo ug nagtuman sa mga pakigsaad ngadto sa Langitnong Amahan makadawat sa mga panalangin nga gisaad ngadto sa kaliwatan ni Abraham. Isip anak sa pakigsaad, ikaw makadawat og gisaad nga mga panalangin sa pakigsaad kang Abraham pinaagi sa paghupot ngadto sa mga saad nga imong gihimo ngadto sa Ginoo diha sa mga pakigsaad sa bunyag o templo.

Si Hagar—sulugoon ni Sara ug inahan ni Ismael—nagtudlo sa atong makapahingangha nga kapasidad sa paglahutay. Human sa pagkatawo ni Isaac, ang anak nga lalaki ni Abraham ug Sara, si Hagar ug Ismael gipapuyo ngadto sa disyerto (tan-awa sa Genesis 21:9–14).

Nakita ang iyang kaguol ug hugot nga pangamuyo alang sa kinabuhi ni Ismael, ang Ginoo mipadala og anghel aron sa paghupay kaniya: “Ayaw kahadlok. Nabati sa Dios ang hilak sa bata. Tindog, lakaw, kugosa siya ug pahiloma. Himoon kong dakong nasod ang iyang mga kaliwat” (Genesis 21:17–18).

Bisan kon gibati ni Hagar nga nag-inusara gayod didto sa disyerto, ang Langitnong Amahan wala nagpasagad kaniya. Siya giprotektahan ug gigantihan tungod sa iyang pagtuo ug kakugi.

Sama ni Hagar, tingali mobati ka nga ikaw naglatagaw sa imong kaugalingong disyerto. Apan ikaw adunay dakong bili ngadto sa imong Langitnong Amahan. Tingali maglatagaw ka sa disyerto sa usa ka panahon, apan Siya wala makalimot nimo. Siya nag-andam nimo aron sa pagbuhat og dagkong mga butang alang sa pagtukod sa Iyang gingharian.

Si Moises gitawag sa Langitnong Amahan aron ipalingkawas ang mga Israelita gikan sa pagkaulipon sa Ehipto. Siya mibuhat og nagsunod-sunod nga gamhanang mga milagro nga misangpot sa ilang pag-ikyas sa kataposan (tan-awa sa Exodo 7; 14).

Bisan kon nagmalamposon sa iyang tawag, si Moises dili kanunay nga masaligon sa iyang abilidad sa pagbuhat sa gihangyo sa Langitnong Amahan kaniya. Sa dihang si Moises mipahayag sa iyang pagbati sa pagka-dili angayan, ang Ginoo mitubag, “Ubanan ko ikaw ug inigdala mo na sa katawhan gawas sa Ehipto, simbahon ako ninyo dinhi niining bukira. Mao kini ang magmatuod nga gipadala ko ikaw”(Exodus 3:12).

Gidawat ni Moises ang iyang kailhanan isip anak sa Dios ug nakagamit sa gahom sa Langitnong Amahan aron mabuhat ang Iyang mga milagro. Sama ni Moises, ikaw makagamit sa gahom sa pagbuhat sa buluhaton sa Dios samtang imong gidawat ang imong mahangtorong relasyon ngadto sa Langitnong Amahan.

Mao nga, kinsa ka man?

Karon panahon na nimo aron madiskobre ang tubag alang sa imong kaugalingon.

Susiha ang mga kasulatan alang sa mga tubag sa imong mga pangutana, ug makaplagan nimo kini. Gusto sa Langitnong Amahan nga imong eksaktong masabtan kon si kinsa ka aron imong mahigugma ang imong kaugalingon sama sa Iyang paghigugma kanimo.

Ang kahibalo sa imong mahangtoron, balaanong kailhanan anaa lang sa palibot—mao nga unsa pa man ang imong gipaabot?