ʻOku ou Tui
Naʻá Ku Mavahe ʻi Heʻeku Maá. Naʻe Fakafoki Mai Au ʻe he ʻOfa ʻa e ʻOtuá
Naʻe kamata māmālie ʻa hono fakafeʻātungiaʻi ʻe he mā ʻi heʻeku ngaahi fili taʻe-fakapotopotó ʻa ʻeku malava ke ongoʻi e ʻofa ʻa e ʻOtuá. Ka naʻe kei fakahaofi pē au ʻe Heʻene ʻofá.
Fakahaofi ʻa Ia Naʻe Molé, tā fakatātā ʻa Michael Malm
Naʻá ku taʻu 14 ʻi he taimi naʻe vete ai ʻeku ongomātuʻá, pea naʻe fakamamahi moʻoni ʻa e vakai ki he movete hoku fāmilí. Naʻá ku hiki ʻo nofo mo ʻeku tangataʻeikí, pea neongo naʻá ne fai hono lelei tahá ke tauhi au, ka naʻe faingataʻa ke u anga ki ai. Naʻe kamata ke u maʻu ʻa e loto-mafasiá mo e loto-hohaʻá pea naʻá ku ongoʻi tuenoa moʻoni.
Naʻá ku fifili ʻi ha ʻaho ʻe taha pe ʻe lelei ange ʻa e māmaní kapau he ʻikai ke u ʻi ai. Ka naʻá ku fanongo ki ha leʻo ʻi hoku ʻatamaí ʻoku pehē mai, “ʻOkú ke mahuʻinga kiate au. ʻOku ou ʻofa atu.”
ʻOku ou ʻiloʻi ʻi he taimí ni naʻe vahevahe mai ʻe he Laumālié ʻa e pōpoaki ko iá kiate au mei he Tamai Hēvaní. Naʻe hoko ʻEne ʻofa taʻefakangatangatá ke fakahaofi ai au mei ha taimi faingataʻa moʻoni, ʻo u maʻu ai ha ʻamanaki lelei.
Hili ha māhina ʻe taha mei ai, naʻe tukituki mai ʻa e ongo faifekaú ʻi homau matapaá. ʻI heʻena akoʻi au mo ʻeku tamaí, naʻe faifai pea mahino kiate au ʻoku ʻi ai haʻaku taumuʻa ʻi heni.
Naʻá ku ako naʻe haʻu ʻa e ngaahi meʻaʻofa fakaʻofoʻofa ʻi heʻeku moʻuí mei he ʻofa ʻa e ʻOtuá kiate aú, pea naʻá ku loto ke fakahaaʻi naʻá ku ʻofa foki mo au ʻiate Ia. Ko ia naʻá ku papitaiso leva mo ʻeku tangataʻeikí.
Naʻe ʻikai ke u fakakaukau ʻe lava ʻe ha faʻahinga meʻa ʻo uesia ʻeku malava ke ongoʻi e ʻofa ʻa e ʻOtuá, ka naʻe hala ʻeku maʻú.
Ko e Mavahe mei he Halá
ʻI he fakalau ʻa e taimí, ʻi he taimi naʻe faingataʻa ai ʻa e moʻuí, naʻá ku fai ha ngaahi fili hala. Naʻe ʻikai ke u tauhi ʻa e Lea ʻo e Potó, pea naʻá ku ʻākilotoa au ʻaki ha ngaahi tākiekina ʻoku kovi. Naʻe kamata kemālohi ange ʻeku ongoʻi maá ʻi heʻeku malava ke ongoʻi e ʻofa ʻa e ʻOtuá kiate aú, ko ia naʻá ku fakamamaʻo ai mei he Siasí. Naʻe ʻikai foki ke toe moʻui ʻaki ʻe heʻeku tangataʻeikí ʻa e ongoongoleleí.
Naʻá ku fakakaukau ʻi he taimi ʻe niʻihi ki he tuí, ka naʻá ku fuʻu ilifia ʻaupito ki he meʻa ʻe fakakaukau ki ai ʻa e kakaí—mo e ʻOtuá—kapau ʻe faifai angé peá u toe foki ki he lotú. Ko ia naʻá ku hokohoko atu ʻi he hala naʻá ku ʻi aí.
Naʻe faifai peá u hiki mo ʻeku tangataʻeikí ki ha fonua ʻe taha. Naʻe ʻikai haʻama fāmili pe kaungāmeʻa, ʻikai ha ngāue, ʻikai ha paʻanga, pe ko ha meʻalele. Ka ko e meʻa mālié, naʻá ma fetaulaki mo e kāingalotu fakalotofonua ʻo e Siasí, pea naʻa nau tokangaʻi kimaua. Naʻa nau ʻofa ʻiate kimaua ʻo hangē ko ia naʻe mei fai ʻe Sīsū Kalaisi kiate kimauá. Naʻe fakafou ʻiate kinautolu ʻa ʻeku fakatokangaʻi ʻoku kei ʻofa pē ʻa e Tamai Hēvaní ʻiate au pea ʻokú Ne finangalo ke u toe foki mai.
Ko ia ko e taimi naʻe fakaafeʻi ai kimaua ʻe he ngaahi kaungāmeʻa ko ʻení ke ma foki mai ki he lotú, naʻá ma tali ia.
Ko e Foki Mai ʻa e Foha Maumau Koloá
Naʻá ku ilifia naʻa fakamāuʻi au ʻe he niʻihi kehé koeʻuhí ko ʻeku ngaahi filí. Ka ʻi heʻeku fuofua foki ki he lotú, naʻe angaʻofa ʻa e tokotaha kotoa pē.
Naʻá ku ongoʻi ʻo tatau mo e foha maumau koloá, ʻi heʻene foki ki heʻene tamaí ʻo vete ʻene ngaahi angahalá (vakai, Luke 15:18–21). Pea hangē pē ko e foha maumau koloá, naʻá ku ongoʻi ʻa e ʻofa ʻa ʻeku Tamaí, ʻa ia naʻá Ne talitali lelei au mo fiefia ʻi heʻeku foki maí (vakai, Luke 15:20–24). Naʻá ku foki mai he ʻoku ou ʻofa ʻiate Ia, pea naʻá Ne talitali lelei au koeʻuhí he ʻokú Ne ʻofa ʻiate au.
Naʻá ku mateuteu ke fai ha ngaahi liliu ʻi heʻeku tōʻonga moʻuí.
Hili ʻeku fakatomala peá u toe mālohi ʻi he ongoongoleleí, naʻá ku teuteu ke u ʻalu ʻo ngāue fakafaifekau. Naʻe ʻi ai haʻaku ngaahi kaungāmeʻa naʻa nau puputuʻu ʻi heʻeku ngaahi filí, ka naʻá ku fakapapauʻi te u nofo ʻi ha hala foʻou.
Lolotonga ʻeku ʻi he senitā akoʻanga fakafaifekaú, naʻá ku ʻilo ai naʻe ō fakataha ha toko ua ʻo e ngaahi kaungāmeʻa ko iá ki ha paati pea naʻá na mālōlō fakamamahi ʻi ha fakatuʻutāmaki ʻi he meʻalelé. Naʻá ku loto-mamahi pea fakafokifā pē kuó u ʻiloʻi naʻe mei ngata ʻeku moʻuí kapau naʻe ʻikai ke liliu ʻeku tōʻonga moʻuí. Kuo toe fakahaofi au ʻe heʻeku manatu ki he ʻofa ʻa e ʻOtuá.
Ko Hono Tali e ʻOfa ʻa e ʻOtuá
Kuó u aʻusia ha meʻa lahi ʻi he kotoa ʻo ʻeku moʻuí, ka ko e lēsoni mahuʻinga taha kuó u akó ko e momeniti mahuʻinga kotoa pē ʻi heʻeku moʻuí, kuo fakahaofi au ʻi hono fakatokangaʻi ʻa e ʻofa haohaoa ʻa e ʻOtuá kiate aú mei he ngaahi faingataʻa lahi.
Ko e taimi ʻe niʻihi, ʻi hoʻo sio ki he sioʻatá, ʻoku faingofua ke ke sio kiate koe mo pehē ʻoku ʻikai ke ke lelei feʻunga—ʻoku ʻiloʻi ʻaki pē koe ʻa hoʻo ngaahi fehalaaki kovi tahá. Ka ʻoku ʻikai ko e founga ia ʻoku ʻafio mai ai ʻa e ʻOtuá kiate koé.
ʻOku fakamanatu mai ʻe Palesiteni D. Toti Kulisitofasoni, ko e Tokoni Ua ʻi he Kau Palesitenisī ʻUluakí: “Tuʻunga ʻi [he ʻofa ʻa e Tamai Hēvaní mo Sīsū Kalaisí] ʻiate koe, ʻoku ʻikai ai ke Na finangalo ke tuku koe ʻi he tuʻunga ʻokú ke ʻi aí.’ Tuʻunga ʻi Heʻena ʻofa ʻiate koé, ʻokú Na finangalo ke ke [maʻu ʻa e fiefiá mo lavameʻa]. Tuʻunga ʻi Heʻena ʻofa ʻiate koé, ʻokú Na finangalo ke ke fakatomala he ko e hala ia ki he fiefiá. Ka ko e fili pē ia ʻaʻau—ʻokú Na fakaʻapaʻapaʻi hoʻo tauʻatāina ke filí. Kuo pau ke ke fili ke ʻofa ʻiate Kinaua, ke ngāue Maʻanaua, ke tauhi ʻEna ngaahi fekaú. Pea ʻe lava leva ke Na faitāpuekina lahi ange koe mo ʻofa foki ʻiate koe.”
Maʻu ha mahino ʻoku ʻofa lahi ʻa e Tamai Hēvaní ʻiate koe naʻá Ne fekauʻi mai ai Hono ʻAlo ko Sīsū Kalaisí, ke fakalelei maʻa hoʻo ngaahi angahalá, ʻo malava ai ke ke toe foki hake kiate Ia. ʻOku ʻikai ke Ne finangalo ke ke toitoi meiate Ia; ʻokú Ne finangalo ke ke foki ange kiate Ia.
Kapau kuó ke hē, ʻoku ʻikai tōmui ke ke tali ʻEne ʻofa kiate koé. ʻOku ʻikai tōmui ke foki mai, pea ʻi hoʻo fai iá, te Na fiefia ʻo hangē ko e tauhisipi ʻofá, ʻo pehē, “Tau fiefia mo au, he kuó u ʻilo ʻa ʻeku sipi ʻa ia naʻe molé” (Luke 15:6).