Mei he Malaʻe ʻo e Ngāue Fakafaifekaú
Ngaahi Founga ʻe 4 ke Fakaangaanga Ai ki he Kau Taki Fakamisiona Foʻoú
Kapau te ke fakaʻatā kinautolu, ʻe lava ke hoko hoʻo kau taki fakamisioná ko hoʻo kau faifaleʻi ʻofa mo falalaʻanga ʻi hoʻo moʻuí kotoa.
ʻI heʻeku ʻi he senitā akoʻanga fakafaifekaú, naʻá ku ʻilo ai ʻe tukuange vave ʻeku kau taki fakamisioná hili ha uike ʻe ua mei heʻeku tūʻuta ʻi he ngāue fakafaifekaú. Hili ha taimi nounou mei heʻeku tūʻutá, naʻá ku fakatokangaʻi ʻa hono ʻofaʻi mo fakaʻapaʻapaʻi kinautolu ʻe heʻenau kau faifekaú kotoa, kau ai au!
ʻI he aʻu mai ʻemau kau taki fakamisiona foʻoú, naʻe lahi ha ngaahi ongo kehekehe. Naʻe tali kinautolu ʻe ha kau faifekau ʻe niʻihi, kae loto-mamahi ha niʻihi ʻi he liliú.
Hili ha ngaahi māhina siʻi mei ai, naʻe vahe mai ha hoa naʻe taʻe-fakaʻapaʻapa ki heʻemau kau taki fakamisioná mo ʻenau fakahinohinó. Naʻá ku kei foʻou pē ʻi he ngāué, peá u fanongo ki heʻene ngaahi lāungá mo ongoʻi naʻe tonu pē ʻene ngaahi fakaʻuhingá. Naʻe tākiekina lahi au ʻe heʻene tōʻongá pea naʻe kamata ke u tokanga taha ki he meʻa naʻe koví, pea naʻe fakaʻau ke u fakaangaʻi ʻa e ngaahi ngāue mo e faituʻutuʻuni ʻa homau kau taki foʻoú.
ʻI he taimi naʻá ku hiki aí, naʻá ku fakatokangaʻi naʻe ʻikai ke u ʻilo naʻá ku taʻofi pē au mei heʻeku maʻu ʻa e tokoni mo e tupulaki naʻá ku fiemaʻu mei he kau taki ko ʻení. ʻI he toenga ʻo ʻeku ngāue fakafaifekaú, naʻá ku fakaʻatā kinautolu ke nau hoko ko ha kau faifaleʻi ʻofa mo falalaʻanga ʻi heʻeku ului fakalaumālié. Naʻá ku maʻu ha ngaahi fakamoʻoni mālohi ki he ongoongoleleí ʻo fakafou ʻi heʻenau ngaahi akonakí mo e faleʻí. ʻI he taimi ʻoku ou fehangahangai ai mo e faingataʻa fakalaumālié ʻi he ʻaho ní, ʻoku ou kei pīkitai pē ki he meʻa naʻa nau akoʻi maí.
ʻI he taimi ʻoku fetongi ai ʻa e kau taki fakamisioná, ʻe lava ke faingataʻa ia, ka ʻe lava hoʻo founga talí ʻo liliu ʻa e toenga hoʻo ngāue fakafaifekaú—mo hoʻo moʻuí. Ko ha ngaahi meʻa ʻeni ʻe niʻihi naʻá ku ako fekauʻaki mo e fakaangaanga ki he kau taki fakamisiona foʻoú:
1. ʻAmanaki pea Tali ʻa e Liliú
Naʻe fakamatalaʻi ʻe Palesiteni Lāsolo M. Nalesoni (1924–2025) ʻa e founga kuo fakaleleiʻi ai ʻa e ngaahi ouau fakatemipalé ʻi he fakalau ʻa e taimí ʻi hono maʻu ʻe he kau palōfitá ha fakahā mei he ʻOtuá. ʻOku kei hoko pē ʻa e ngaahi liliú ʻi hotau kuongá ni. Naʻá ne fakamamafaʻi, “ʻOku liliu ʻa e foungá, ka ʻoku kei tatau pē ʻa e fuakavá.”
Ko e meʻa tatau pē, ʻe lava ke maʻu ʻe hoʻo palesiteni fakamisiona foʻoú ha fakahā ki hoʻo misioná ʻa ia ʻe fiemaʻu ai ke fai ha liliu ʻi he ngaahi founga ngāué. Manatuʻi—neongo ʻe lava ke liliu ʻa e ngaahi foungá, ka ʻoku kei tatau pē hoʻo taumuʻa ko ha faifekaú pea mo e ongoongolelei ʻo Sīsū Kalaisi ʻokú ke akoʻí. Naʻe fakatou maʻu ʻe hoʻo kau palesiteni fakamisiona lolotongá mo e kau palesiteni fakamisiona kimuʻá ha fakahinohino mei he Tamai Hēvaní. Neongo ʻe lava ke kehekehe ʻa e fakahinohinó, ka ʻoku ʻikai ʻuhinga ia ʻoku hala ha taha. Ko e ngāue fakafaifekaú ko ha konga ia ʻo e hokohoko atu hono Fakafoki Mai ʻo e Ongoongoleleí, pea “ʻoku fiemaʻu ʻi he Fakafoki mai ʻoku hokó ha fakahā ʻoku hokohoko.”
2. Fakaʻapaʻapaʻi Honau Uiuiʻi mei he ʻEikí
Manatuʻi ʻoku “uiuiʻi pea vaheʻi ʻe he ʻOtuá ʻa hoʻo palesiteni fakamisioná mo hono uaifí, ʻa ia ʻokú na ngāue fakataha ko hoʻo taki fakamisioná ke tataki ʻa e misioná.” ʻOku haʻu ʻa e ui ke hoko ko e kau taki fakamisioná mei he Tamai Hēvaní ʻi he fakahā ki Heʻene kau palōfitá mo e kau ʻaposetoló. Falala mo fakaʻapaʻapaʻi Hono finangaló mo ʻEne taimí pea ʻiloʻi ʻoku ʻi ai ʻEne taumuʻa makehe maʻa hoʻo kau taki foʻoú.
Te Ne tataki kinautolu, ʻo hangē pē ko ʻEne tataki mo fakalotolahiʻi koe ʻi hoʻo ngāue fakafaifekaú.
3. Lotua ha Fakamoʻoni ʻo ʻEnau Faleʻí mo e Tuʻunga Fakatakimuʻá
ʻI hoʻo hoko ko e faifekaú, ʻokú ke vahevahe maʻu pē ʻa e talanoa ʻo e ʻUluaki Mata Meʻa-Hā-Mai ʻa Siosefa Sāmitá. Naʻe kamata ʻene aʻusiá ʻe he potufolofola “Ka ai hamou taha ʻoku masiva ʻi he potó, ke kole ʻe ia ki he ʻOtuá” (Sēmisi 1:5). ʻI hoʻo fakaafeʻi ʻa e niʻihi kehé ke nau fehuʻi ki he Tamai Hēvaní fekauʻaki mo e moʻoni ʻo e ongoongoleleí, manatuʻi foki ke ʻeke kiate Ia hoʻo ngaahi fehuʻí foki. Kapau ʻokú ke ongoʻi puputuʻu ʻi he liliú, te ke lava ʻo maʻu ha fakapapau ʻi he fakahā fakafoʻituituí.
Naʻe talaʻofa mai ʻe Palesiteni Nalesoni, “ʻI hoʻo hokohoko atu ke talangofuá, fakahā hoʻo houngaʻia koeʻuhi ko e tāpuaki kotoa pē kuo foaki atu ʻe he ʻEikí, pea ʻi hoʻo fakaʻapaʻapaʻi ʻi he faʻa kātaki ʻa e taimi-tēpile ʻa e ʻEikí, ʻe foaki atu kiate koe ʻa e ʻilo mo e mahino ʻokú ke kumiá.”
4. Tuku ke Nau Faleʻi Fakataautaha Koe
ʻI he taimi naʻá ku veiveiua ai ʻi heʻeku ngāue fakafaifekaú, naʻe lava ʻe heʻeku palesiteni fakamisioná ʻo ʻiloʻi ʻeku ngaahi ongó ʻo fakafou ʻi he Laumālié mo tokoni ke mahino kiate au kuó u hoko ko ha faifekau lavameʻa.
Naʻe pehē ʻe Palesiteni Sefilī R. Hōlani, ko e Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻi haʻane lea ki he kau taki fakamisiona naʻe toki uiuiʻi foʻoú:
“ʻOku kau ʻi he kau papi ului mahuʻinga kotoa pē te mou maʻu ʻi he taʻu ʻe tolu ka hokó ʻa e kau faifekaú tonu. …
“Pea kiate au mo e laui miliona hangē ko aú, te tau manatu ki he ngaahi akonaki mo e fakamoʻoni ʻa hotau kau taki fakamisioná koeʻuhí ko e ngaahi manatumelie ki heʻetau fuofua aʻusia ʻa e tui moʻoní. Kuo moʻui ha tokolahi ʻi he konga kimui ʻo e moʻuí ʻi he mālohi ʻo e ongoongoleleí naʻa nau ako ʻi heʻenau hoko ko ha kau faifekau kei talavou ʻi heʻenau ako mei ha palesiteni fakamisiona mo hono uaifí.”
Ko hai pē hoʻo kau taki fakamisioná, manatuʻi ʻoku nau tauhi kia Sīsū Kalaisi, ko ia te nau fiemaʻu ʻa e meʻa ʻoku lelei tahá maʻau mo hoʻo tupulakí. ʻI hoʻomou kau ʻi he ngāue maʻongoʻonga taha ʻi he māmaní, ʻe lava ke liliu ʻe heʻenau fakamoʻoni mo e ngaahi akonaki fekauʻaki mo e Fakamoʻuí hoʻo moʻuí—kapau te ke fakangofua ia.