Maʻá e Ngaahi Tamai ʻa e Fānau Īkí
Meʻa ʻe 5 ʻOku Totonu ke ʻIlo ʻe he Tamai Foʻou Kotoa Pē
ʻOku ʻikai faingofua ʻa e hoko ko ha tamaí. Ka kuo foaki mai ʻe he Tamai Hēvaní ha ʻū meʻangāue lahi ke tokoni ʻi he liliú.
Naʻá ku maʻu ha ngaahi ongo kehekehe ʻi heʻeku teuteu ke hoko ko ha tamaí.
Naʻá ku taʻepauʻia, ilifia, mo fie ʻilo lahi pe ʻe fēfē ʻa e meʻa kotoa pē. ʻI he fāifai pea fanauʻi homa fohá, naʻá ku ʻohovale mo fakatumutumu ʻi he lahi ʻo e ʻofa naʻá ku maʻu ki he kiʻi tamasiʻi foʻou ko ʻení.
Kuo ʻikai faingofua ʻa e hoko ko ha tamaí. ʻOku faingataʻa ʻa e fatongia fakaemātuʻá. Ka ʻoku tau ʻiloʻi ʻoku malava ke maʻamaʻa ʻetau kavengá tuʻunga ʻia Sīsū Kalaisi. ʻI he fakakaukau ko iá, tatau ai pē pe ko ha tamai foʻou koe pe ko ha tamai taukei, ko ha ngaahi tefitoʻi moʻoni ʻeni ʻe nima ʻo e ongoongoleleí ke tokoniʻi koe ʻi he hala ʻo e tuʻunga fakaetamaí.
1. Ko e ʻOtuá ʻa hoʻo Tamai Hēvaní, pea ko e Tamai foki ia hoʻo fānaú.
Mahalo te ke fie fai ʻa e meʻa kotoa te ke lavá ke maluʻi mo ʻofa ʻi hoʻo fānaú. Ko ha ongo fakaʻofoʻofa (mo kiʻi fakamafasia) ia! Ka te ke lava ʻo falala ʻoku fiemaʻu foki ʻe he Tamai Hēvaní ʻa e meʻa ʻe lelei taha maʻa hoʻo fānaú pea te Ne tokoniʻi koe ʻi hoʻo tafoki kiate Iá.
Ko ha ongo fakaʻofoʻofa moʻoni ia ke fenāpasi mo ʻetau Tamai Hēvaní!
2. Te ke maʻu ʻa e fiefiá ʻi hoʻo feilaulaú.
Ko e tuʻunga fakaetamaí ʻa e hala ki ha niʻihi ʻo e fiefia maʻongoʻonga taha te tau aʻusia ʻi he moʻuí ni. ʻOku fiemaʻu foki ki ai ʻa e feilaulaú.
Naʻe akoʻi ʻe Palesiteni D. Toti Kulisitofasoni, ko e Tokoni Ua ʻi he Kau Palesitenisī ʻUluakí, “ʻOku fakahaaʻi ʻe he tuʻunga fakaetamaí kiate kitautolu kakai tangatá hotau vaivaiʻangá mo e fiemaʻu ke tau fakalakalaká. ʻOku fiemaʻu ʻe he tuʻunga fakaetamaí ha feilaulau, ka ko ha maʻuʻanga nonga mo ha fiefia ʻoku ʻikai fakatataua. … Naʻe folofola ʻa Sīsū ʻo pehē, ‘ʻOku ʻikai ha tangata ʻe lahi hake ʻene ʻofá ʻi he meʻá ni, ke ne foaki ʻene moʻuí koeʻuhi ko hono kāingá’ [Sione 15:13]. ʻOku fakahā ʻe he ngaahi tamaí ʻa e ʻofa ko iá ʻi heʻenau fakaʻaongaʻi ʻenau moʻuí ʻi he ʻaho takitaha, ke ngāue ʻo tokonaki mo poupou maʻa honau ngaahi fāmilí.”
3. ʻOku ngāue ʻa e ngaahi tamaí ʻi he hoa ngāue tuʻunga tatau mo honau uaifí.
Naʻe akonaki ʻa ʻEletā ʻUlise Soālesi ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē: "ʻOku fekauʻaki ʻa e lehilehiʻí mo e pulé pea fepikitaki ʻa e ngaahi fatongiá, ʻa ia ko hono ʻuhingá ko e ngaahi faʻeé mo e ngaahi tamaí ʻoku nau haʻisia ke fetokoniʻaki ko ha kaungā-ngāue tuʻunga tatau mo vahevahe ha tuʻunga fakatakimuʻa potupotutatau ʻi honau ʻapí."
ʻOku fiemaʻu ke tau faaitaha mo hotau uaifí ʻi he meʻa kotoa pē ʻoku tau faí, tautautefito ki hono tokangaʻi mo lehilehiʻi hotau ngaahi fāmilí. ʻOku ʻikai ha mēmipa ʻi he hoa ngāué ʻe siʻisiʻi ange pe lahi ange ʻi he hoa ʻe tahá; ʻoku totonu ke tau tuʻunga tatau. ʻI hono fakalea ʻe tahá, ʻoku ʻikai ke ke tuenoa!
4. ʻE lava ke tāpuekina ʻe he lakanga fakataulaʻeikí ho fāmilí.
Naʻe akoʻi ʻe Palesiteni Hāloti B. Lī (1899–1973) ʻo pehē: “ʻOku ʻikai ha taimi ʻe toe fakaʻofoʻofa ange ai ʻa e mālohi ʻo e lakanga fakataulaʻeiki ko ia ʻoku mou maʻú ka ko e taimi ʻoku hoko ai ha faingataʻa ʻi homou ʻapí, ha puke lahi, pe ko ha fili mahuʻinga ke fai. … ʻOku ʻi he mālohi ʻo e lakanga fakataulaʻeikí, ʻa ia ko e mālohi ia ʻo e ʻOtua Māfimafí, ʻa e mālohi ke fakahoko ha ngaahi mana ʻo kapau ko e finangalo ia ʻo e ʻEikí, ka kuo pau ke tau taau mo feʻunga kae toki lava ke tau ngāue ʻaki ʻa e lakanga fakataulaʻeiki ko iá. Kapau ʻe ʻikai ke mahino ʻa e tefitoʻi moʻoni ko ʻení ʻe ʻikai ke lava ʻo maʻu ʻa e ngaahi tāpuaki ia ʻo hono maʻu ʻo e lakanga fakataulaʻeiki mahuʻinga ko iá.”
Kuo foaki mai ʻa e lakanga fakataulaʻeiki ʻo e ʻOtuá ke ʻaonga kiate kinautolu ʻoku tau feohí, tautautefito ki hotau fāmilí. Fai ho lelei tahá ke ke taau mo e mafai ʻo e lakanga fakataulaʻeiki ko iá. Fakaʻaongaʻi ia ke faitāpuekina ʻa e moʻui ho uaifí mo e fānaú.
5. ʻE fakalahi ʻe he Tamai Hēvaní hoʻo ngaahi feingá.
ʻE ala faingofua ke te ongoʻi ʻoku ʻikai feʻunga ʻete meʻa ʻoku fai maʻa hoto fāmilí. Naʻe lea ʻa Palesiteni Kulisitofasoni ki he ngaahi tamaí ʻo pehē: “ʻOku ou ʻiloʻi hoʻo fakaʻamu ke hoko ko ha tamai lelei angé. Naʻáe ku fakaʻamu pehē pē mo au. Ka neongo hotau ngaahi fakangatangatá, tau vilitaki atu pē muʻa. Tau liʻaki ʻa e moʻui fakatāutahá mo e tōʻonga tauʻatāina ʻoku talaki ʻe he kuonga ní ka tau tomuʻa fakakaukauʻi ʻa e fiefia mo e lelei ʻa e niʻihi kehé. Ko e moʻoni ʻe hanga ʻe heʻetau Tamai Hēvaní ʻo fakatupulaki kitautolu pea ʻai ke ola lelei ʻetau ngaahi feingá, neongo ʻetau taʻefeʻungá.”
Falala ʻe fakatupu ʻe he ʻOtuá ha lelei lahi ange ʻiate koe ʻi he meʻa te ke lavaʻí.
ʻE ngaahi tamai, ʻoku ʻofa ʻa e ʻOtuá ʻiate kimoutolu. ʻOkú Ne ʻofa ʻi ho fāmilí. Te Ne tokangaʻi koe ʻi hoʻo fekumi ki Heʻene tokoní, fokotuʻu ʻa Sīsū Kalaisi ko e fakavaʻe ʻo ho ʻapí, mo fai ho lelei tahá ke tataki ho fāmilí ʻi he ʻofa mo e māʻoniʻoni.